KAMHÔKA 2
2
Ma-ahānga Ngam Tēv, Nö I Pôkim
1Ngaich ök ma-ahānga ngam Mā Tēv nö yih nö ṙā-ang Kilkāl nö i Pōkim. Ngaich ngö ṙô anga-aṅ, Vīten yīö chin kiröön-ngöre ṙā-ang Aikup, ngaich kēten yīö im panam ngam ṙô chu kilēḵngôre in yik muvöhngö yīö; öich ngö ṙô, Öt hētu chin min piyāingö ngam kinlēḵngô chu in yīö. 2Hö-ö yin min vīkinlēḵngô in yip aṅ ngih panam; tiṙölngö nup tanööngö cha öi pöich: hö-ö pöri yī-ö hang ṙô chu: kūöyòh öi ngatī? 3Lökten chin ve-enynang yīö tö ngamuh, töre öt ahōngen vē tarik isā yīö hòṅ lökṙen cha. Pô cha min nö lā-al yīö, ngaich tingöpö yī-ö min i vine-ekūö nup insā tēv cha. 4Ngaich ngö inlahen angū-ö, hē ök ma-ahānga aṅ im Mā Tēv nö ṙônyö në ṙô nö in yik kuön Israel, kaknyöre ngaich yik tarik nö pōitô, peuny inrē. 5Ngaich cha-a nö kaheuk minënyö ök chūökö nö Pōkim: ngaich umuh cha-a nö kētö tökētu nö im Mā Tēv.
Kinpāha Yôsuā
6Hē Yôsuā nö ngaich nö tīnngörit yik tarik, ngaich yik kūön Israel nö kö kiröönngöre nö i nup amin cha nö hayōm ngam panam. 7Irô-ò tö sakāmö Yôsuā yik tarik nö lök la-en ngam Mā Tēv, irô-òtö sakāmö yik minṙöinylen inrē yik tösaṙaklöng-kūö rô-òten tö Yôsuā, yik mameuk nuk tökiröng la-en ngam Mā Tēv, nuk tī ò nö chöö-önyten tö Israel. 8Ngaich Yôsuā ök kikōnyö kūön Nön, ök tarik ngam Mā Tēv nö kapah, nö ngaich nö hēngòng söm samyeūheu ṙēti. 9Lāpngen ò cha-a ngaich nö ip kūöngö öp amin ò i Tim-nāthërös, ip rung panam Ifrēm, lā kapā öp rôngö Kā-as. 10Ṙòkhöre inrē ök tumköl chap angū-ö nö hamūliyö nö in yik muvöhngö cha: tahëng ngaich yik tö-sīöplö tumkölchap unôichrit cha, yik töt akahakūö tö ngam Mā Tēv öt rēhĕn tö nuk la-en nuk tī ò nö chöönyöten tö Israel.
Öt Vë-ekūötēvhaṙa Yik Israel
11Ngaich yik kūön Israel nö la-evṙen tö tötlöök nö i kūö ngam Mā Tēv, ngaich lökla-en nup Pēal: 12Ṙāngö ngam mā Tev cha-a, ngam Tēv yik muvöhngö cha, ngam kamënyen cha nö ṙā-ang öp panam Aikup, ngaich tömrit nup tahëng tēv, nup tēv yik tarik mahavīlen cha, sōntöre inrē nö in u: ngaich cha-a nö harunnyö lanīnö ngam Mā Tēv. 13Ṙāngö ngam Mā Tēv cha-a, ngaich lök la-en Pē-al, Astaròt inrē. 14Tōttöre kūö ngaich ngam lanīnö ngam Mā Tēv nö in Israel ngaich kēten cha anga-aṅ nö eltī yik tömināch yik maha-āich-ngen cha, inyihngen cha anga-aṅ inrē nö eltī yik lā-al cha maha-vīlen cha, lökngen cha nö öt ōtre kanô-òṅ nö sökhaka nö i kūö yik lā-alre. 15Ik töng kū-ö cha nö kiröönngöre, ngaich ngam kël ngam Mā Tēv nö lā-al cha im tötlöök, sā ṙô ngam Mā Tēv nö ngaich, sā ṙô ngam Mā Tēv inrē nö chūökuṙô nö in cha: ngaich cha-a nö kiröngö kanihten.
16Hachohlö ma-akah fālen ngaich ngam Mā Tēv, yik mahayööken cha nö ṙā-ang eltī yik tömināich tö cha. 17Ngaich sönngenre cha-a nö öt hang ṙô yik ma-akah fālen, pò cha nö kiröönngöre nö asĕhkö nup tahëng tēv, ngaich sōntöre nö in u; ka-euingen cha-a nö kānngöre nö ṙā-ang el ngam talöökö lahök ël yik muvökngö cha misī hamang nup chöngö ngam Mā Tēv: hö-ö pöri cha-a nö ngatī. 18Hē ngam Mā Tēv nö hachohlö ma-akaha fālen nö in cha, ngaich ngam Mā Tēv nö in öp ma-akah fālen, ngaich hayööken cha nö ṙā-ang eltī yip lā-al i ṙô-òtö sakāmö öp ma-akah fālen: pò ngam Mā Tēv nö havanrit lōnre kūö nup ṙô inlöinyö cha tökūö cha yip tamṙāmö cha nö hakihten cha. 19Ngaich angū-ö nö ngö inlahen, hē öp ma-akah fālen nö kapah, ngaich cha-a nö havanrītre, ngaich mötlö chanôichen tö yik muvöhngö cha, i tinömrit tahëng tēv nö lök la-en u, sōntöre nö in u; öt ṙākenre cha-a nö i nuk la-en cha, ötrēhĕn nö ṙākenre nö im töngëḵ inhôngen. 20Tōttörekūö ngaich ngam lanīnö ngam Mā Tēv nö in Israĕl; ngaich ngö ṙô anga-aṅ, Kūö ngih pumnāmö tarik nö tôichngen tö ngam chöngö chu ngam tinöölô yik muvöhngö cha tö chu, öt hang ṙô chu inrē; 21Töngamūhangen chin min chū-ö inrē öt ahōnguvö tö vē pumnāmö tarik nö ṙā-ang i kūö cha vē ṙahāngö Yôsuā hē ò nö kapah nö ngaich: 22Hòṅ chu lökten in cha kalah vē Israĕl, yē cha min nö köp tö ngam talöökö ngam Mā Tēv nö lök in e, nö sā yik muvöhngö cha nö köp tö e, hēk rö-ö. 23Ngaich ngam Mā Tēv nö ṙātö yip pumnāmö tarik, nö öthēṙen nö ahōngen cha: öt rēhĕn nö kēten cha nö eltī Yôsuā.
Currently Selected:
KAMHÔKA 2: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
