KAMHÔKA 20
20
Halēnkö Kinyūngö Yik Israel
1Ṙòkhöre ngaich yik kūön Israĕl nö kunyī-inyre nö im Mā Tēv nö i Mispah, hamūlöre ngaich yik tömaṙôngö nö sā töng hĕngtak tarik, löktökūö Tën tölngö Pirsīpa, holtö ngam panam Kilīöt. 2Ngaich yik mākūö yik tarik nö ṙòkhöre, yik miyöngö Israĕl nö ṙòkhöre, nö hamūltöre nö i yik ṙôngö tarik ngam Tēv, fënòng köny kumröön tarik tö sānëtu. 3(Ngaich yik kūön Penyamin nö hang yik kūön Israĕl nö chuh Mispah) Ngaich ngö ṙô yik kūön Israĕl, Vë-eny nang ih, sitih löktö yīhih öng ngih öt lanöökö? 4Ngaich ök Lēvī, ök pīhö ök töfëli kikānö, nö ngö ṙô nö sap ṙô, Yih chin i Kīpīā öp panam Penyamin öich iyöng, āyö tök pīhö chu töl. 5Hōklöre ngaich yip tarik aṅ Kīpiā nö lā-al chu, ngaich havīlen chu el öp patī tö hatööm, hòṅ lōnu cha-a tö finëlngö chu ane inrē ök pīhö chu töl öt lēkaṙen tö cha, ngaich ök nö kapah. 6Kē ök pīhöre töl chū-ö ngaich, tālan ngaich nö rökö ngaich söömngen ò i nup panam nö ṙòkhöre amin Israĕl: pò cha nö kēken töchōich la-en nö i Israĕl kumlō-ov inrē. 7Yĕh meuk, yī-ö kūön Israĕl ṙòkhöre yī-ö, mikahten ih yin ihih halēnö ih inrē.
8Ṙòkhöre ngaich yik tarik nö hōklöre sā töng hĕng tak tarik, nö ngö ṙô, Öt hĕng tak tö hī chamuh patīre, öt rēhĕn nö hĕng tak tö hī min kumhëthötre nö el patīre. 9Ngih pöri min tī hī tö Kīpiā; michööḵlöre in kiröönngöre lā-al e; 10Ngaich īhö min kē tarik söm tak i töhēngòng keuheūt miyöngö Israĕl, hēngòng i töhĕng köny, hĕng köny i tö sömköny, kamë nyā-aṅkūö yip tarik, hòṅ cha yē cha nö teung nö i Kīpiā öp i Penyamin nö asā nup kumlō-ov tī cha nö in Israĕl. 11Lökten yik tarik Israĕl nö ṙòkhöre nö hamūlöre nö lā-al ngam elpanam, mūlhen höö sā töhĕng tak tarik.
12Ngaich yik miyöngö Israĕl nö tīnngö tarik nö keuheūt miyöngö Penyamin, nö ngö ṙô, Asuh öng ngih ötlanöökö tameungtöre nö in yīö? 13Lökten kētö yip tarik yin yip kūön sāṙen, nö i Kīpiā, hòṅ ih kumpahang vah cha, hòn ṙā-ai ngam tötlöök nö in Israĕl. Sōḵ pöri Penyamin nö hang ṙô yik holre yik kūön Israĕl. 14Hamūlöre pöri yik Penyamin ṙā-ang i nup elpanam Kīpiā, kiröönngöre nö lā-al yik kūön Israĕl nö kiyung. 15Ngaich yik kūön Penyamin nö kaheūkö nö i nup elpanam nö nët aṅāi tafūöl köny tarik tö sanëtu, nö holre tö aṅ Kīpiā yik tökaheuklöng sātòng tarik tökatöllöng. 16In vē tarik nö ṙòkhöre sātòng yik tarik tötavē tökatöllöng; tö öthō nö vaich tö tösā ṙôngòng keūyö nö aṅtī tö chinvil ihong. 17Ngaich yik tarik Israĕl, nö holre tö Penyamin, kaheuklöng nö fënòng köny tö sanëtu: ṙòkhöre acha-a vē nö tarik kumyung.
Kiyung Lā-al Mikūönö Penyāmin
18Hōklöre ngaich yik kūön Israĕl, ngaich peūlöre nö i Pētĕl, ngaich havëkö inlēnönre nö im Tēv; ngö ṙô cha-a achīö ap min hol ih kiröönngöre urĕh kiyung lā-al yip kūön Penyamin? Ngaich ngö ṙô ngam Mā Tēv, Yūtā öp min urĕh nö kiröönngöre.
19Hōklöre ngaich yik kūön Israĕl tö peuheū, ngaich iyöngtöre nö lā-al Kīpā. 20Ngaich yik tarik Israĕl nö kunyī-inyre nö lā-al Penyamin nö kiyung: haṙāköre ngaich yik tarik Israĕl nö kiyung nö lā-al cha nö i Kīpiā. 21Kunyī-inyre ngaich yik kūön Penyamin nö ṙā-ang Kīpiā, lökngö kui ngam tumlat tī ngaich nö ahatngö yik Israĕl ik sakāmö angū-ö, nët anāi nët köny tarik. 22Ngaich yik tömaṙôngö, yik tarik Israĕl, nö hangëṅlö alahare, haṙāköre hēk nö im kinyūngö ik chūök cha nö haṙāköre sin ik raneh sakāmö, 23(Ngaich yik kūön Israĕl nö kiröönngöre nö peuinynö i kūö ngam Mā Tēv söl harap; hatön ngam Mā Tēv cha-a, hēk öichu ṙūötöre im kinyūngö lā-al yip kūön Penyamin öp kahëm chu? Ngö ṙô ngam Mā Tēv. Kiröönngöre man lā-al ò.)
24Ngaich yik kūön Israĕl nö yihtöre nö lā-al yik kūön Penyamin im innëtö sakāmö. 25Kunyī-inyre ngaich Penyamin nö ṙā-ang Kīpiā nö lā-al cha im innëtö sakāmö, ngaich hēk nö lökngö kui tumlat tī nö ahatngö yik kūön Israĕl hëvhör sīön köny tarik; ṙòkhöre cha-a nö tösanëtu. 26Ngaich yik kūön Israĕl nö ṙòkhöre, yik tarik inrē, nö peūlöre, ngaich yih nö i Pētĕl, ngaich peuiny, ūichngöre ngaich nö umuh i kūö ngam Mā Tēv, söl harap ngaich nö ahik ik sakāmö angū-ö; kētö töföngö cha-a tökētu nö i kūö ngam Mā Tēv tökētu inrē nö inlāmö. 27Ngaich yik kūön Israĕl nö ve-ekūö ngam Mā Tēv, (pò ök kasòng kinlēḵngô ngam Tēv nö umuh i nuk sakāmö anū-ö. 28Sökhak nö i kūö e i nuk sakāmö anū-ö, ang Finehes, ök kikōnyö kūön Ēliēsör, ök kikōnyö kūön Āròn) nö ngö ṙô, Sön öich hēk kiröönngöre lā-al yip kūön öp kahëm chu Penyamin öich kiyung, hēk ṙāngenre ṙöng? Ngaich ngö ṙô ngam Mā Tēv, Kiröönngöre man; tön huṙöich chin kēten ò nö eltī meh.
29Ngaich ṙātö hamöng Israĕl nö havīlen Kīpiā. 30Ngaich yik kūön Israĕl nö kiröönngöre nö lā-al yik kūön Penyamin im linūöyö sakāmö, ngaich haṙāköre nö lā-al Kīpiā, nö sā re sin. 31Kunyī-inyre ngaich yik kūön Penyamin nö lā-al yik tarik, ngaich cha-a nöng haṙöiyiyö nö ṙā-ang im elpanam; ngaich rultöre cha-a nö fël kumpah tarik inrē, nö sā tīre sin, el nuk tökiröng talöökö, hĕng ök tö kū-ö tö Pētĕl, kū-ö tö Kīpiā ök tahëng, el panô-òṅ lūöi hang anāi yik tarik Israĕl. 32Ngaich ngö ṙô yik kūön Penyamin, Ngaich yin nö ötkô tö hī, sā re ik raneh. Ngö ṙô pöri yik kūön Israĕl. Tā-a töi falngöre, öi haṙöingen cha nö ṙā-ang im elpanam nö ël minë tökiröng talöökö. 33Hōklöre ngaich yik tarik Israĕl nö ṙā-ang ik chūökre, ngaich hatöököre nö i Pē-altēmar: ngaich yik hamöng Israĕl nö meutnyi nö ṙā-ang el chūökre, ṙā-ang i Mēarehkīpiā. 34Söm köny yik tarik tökatöllöng aṅ Israĕl nö ṙòkhöre yamihtöre nö lā-al Kīpiā, kalēḵ ngaich ngam kinyūngö: hö-ö pöri cha-a nö akahalōn tök tötlöök nö i kui cha. 35Ngaich ngam Mā Tēv nö i kūö Israĕl nö fël yik aṅ Penyamin: ngaich yik kūön Israĕl nö hatngötī tö Penyamin ik sakāmö angū-ö nö nët anāi taneūi köny hēngòng tarik: ṙòkhöre yik nö tösanëtu. 36Meūköre ngaich yik kūön Penyamin nö ötkô:
Sitih Minhôiṅyö Yik Israel
Pò yik tarik Israĕl nö kētö chūök Penyamin, pòn hayönglenre cha-a nö in yik hamöng ṙahātö cha nö i Kīpiā. 37Ka-eūyen ngaich yik hamöng, hayahtöre ngaich nö i Kīpiā; haṙakngöre ngaich yik hamöng, ngaich keuheūtngörevah tī tö ngam elpanam nö aṅtī tö kūö sanët. 38Ngaich ngam minkahngö tī yik tarik Israĕl tö yik hamöng inrē nö ngih, tö cha nö hōtu nö pōyen tī nö halullö kui ngam elpanam. 39Havöölökūöre ngaich yik Israĕl nö im kinyūngö, ngaich Penyamin nö lūöi anāi pôḵ tö tarik nö kumpah yik tarik Israĕl: pò cha nö ngö ṙô, Ötkô takô yin nö ngaich tö hī, sāre ik raneh kinyūngö. 40Hē ngam taṙul pöri nö chahīölöngö nö ṙā-ang im elpanam nö kufëi nö lul, tēk ukre ngaich yik aṅ Penyamin, yĕh meuk ngaich, keuheūtngöre ök elpanam nö chuh el halīöngö nö lul. 41Havöölökūöre ngaich yik tarik Israĕl, pingangkūö ngaich yik tarik Penyamin: pò cha nö ngaich nö meuk ngam tötlöök yamih nö i kui cha. 42Lökten cha nö hapungtö ukre nö i kūö yik tarik Israĕl nö kū-ötö el tönyalnyi: ngaich pöri ngam kinyūngö nö tömkörit cha nö röhlö lā-unôich tö cha; ngaich acha-a yik rameū-eung nuk elpanam nö hatngötī tö yik aṅ u. 43Havīlö yik aṅ Penyamin cha-a ngaich, lū-u cha, rööntökui cha inrē nö el nup chūök cha, sölngö nö i Kīpiā lā maneutlö ngam tavūöi. 44Hëvhör sīön köny yik tarik umuh aṅ Penyamin töfukngö: ṙòkhöre nö tarik töt pa-ekūö. 45Havöökūöre cha-a ngaich ngaich falngöre nö kū-ötö el tönyalnyi nö ip ihong Rimōn: el nup tökiröng talöökö cha-a nö chap yik tö taneūi köny tarik; ngaich tölngö Kītöm nö lū-u cha, nët köny yik tarik pôḵ cha nö fëli. 46Lökten nö ṙòkhöre yik töfukngö aṅ Penyamin ik sakāmö angū-ö nö nët anāi taneui köny tarik yik tösanëtu; ṙòkhöre yik cha-a tarik nö tötpa-ekūö. 47Tafūölòng pöri yik tarik mahavöökūöre nö falngöre kū-ötö el tönyalnyi ip ihong Rimōn, ngaich fën chumngëṅtö nö iyöng el öp ihong Rimōn. 48Havöökūöre yik tarik Israĕl hēk nö in yik kūön Penyamin, fëlö cha ngaich nö aṅtī tösanët, hĕnghöre ök elpanam nö keuheūtngöre, tö nuk nuā, ṙòkhöre inrē nuk kanôtökūö cha: nup elpanam inrē kanôtökūö cha ṙòkhöre nö föngtukūö.
Currently Selected:
KAMHÔKA 20: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
