KAMHÔKA 19
19
Lēvi Tök Töngtöl Pīhö Ò
1Ngaich i nuk sakāmö anū-ö, hē ranö-ö rācha Israĕl, ök töhĕng tak Lēvi kumröönngöre nö marô-òlkūö nö ip rung panam Ifrēm, ök kamë töngtöl pīhöre nö i Pethlihem Yūtā. 2Ngaich ök töngtöl pīhö ò nö hayëngen ò nö inyihköre, ngaich kiröönngöre nö ṙāngen ò nö i patī ök yöngre kikōnyö i Petlihem Yūtā, ngaich fën chumngëṅtö nö in e. 3Choholre ngaich ök pīhö ò kikōnyö, ngaich fachūken ò, vë-ekūö ò nö hāngenlōn ṙô, nö havanten ò nö hēk hōlu anga-aṅ tök tarikre, hĕng tahôl inrē nuk köttö: ngaich ök kikānö nö hachōten ò nö i patī ök yöngre kikōnyö: ngaich hē ök kikōnyö yöng ök kikānö nö meūkan, ṙāmölōn anga-aṅ ngaich nö meukkūö ò. 4Ngaich ök yöng pīhö ò, ök yöng ngam kikānö, nö ma-īṅten ò; ngaich ngöh anga-aṅ nö in ò lūöi sumkam: nyā cha-a ngaich òk inrē, ngaich iyöng umuh. 5Ngaich im finënö sakāmö, nö ka-euilökūö cha-a nö choholre, hōklöre ngaich anga-aṅ nö hòṅ ngaich: ngaich ngö ṙô ök yöng ngam kikānö tök köiny kūönre, haṙamlōnre man hĕng hanam tö rôti, ngaich möl pömchö kiröönngöre im kū-ö meh. 6Ūichngöre cha-a ngaich, ngaich nyā òk inrē, nö holkūöre: ngaich ngö ṙô ök yöng ök kikānö tök tarik, Vë-ekūö meh chin, hōḵ man yĕh hĕng mitööm höngngöh hòṅ ngam ellōn meh nö ṙāmölōn. 7Hōklöre ngaich ngam tarik nö hòṅ ngaich; mileūchen pöri ök yöng pīhö ò tö ò, iyöng umuh anga-aṅ ngaich nö hēk. 8Im timneūyö sakāmö ka-eūilökūö anga-aṅ nö choholre nö hòṅ ngaich; ngaich ngö ṙô ök yöng ngam kikānö, Haṙamlōnre man, ve-ekūö meh chin öm höngngöh hanöng saha ngam sakāmö nö kūöntit; nëtre taka cha-a ngaich nö nyā. 9Ngaich hē ngam tarik nö hòṅ hōklöre nö hòṅ ngaich, anga-aṅ, tök töngtöl pīhö ò inrē, tök tarik ò inrē, ngaich ngö ṙô tö ò, ök yöng pīhö ò, ök yöng ök kikānö, Yĕh meuk ngaich an ngam sakāmö nö lā harap, ve-ekūö meh chin öm höngngöh hĕng mitööm: yĕh meuk, hòṅ keuheūt an ngam sakāmö nö ngaich, iyöng ihih man hòṅ meh ṙāmö ellōn; huṙöich pömchö ka-eūilökūö kiröönngöre, hòṅ meh ngaich chuh patīre.
10Sōḵ pöri ngam tarik nöng ngöh im hatööm, hōklöre ngaich nö kiröönngöre, sölngö ngaich nö i Yapus (angū-ö an Yērusalem) hĕng tahôl nuk köttö in ò töhanāmtu uk nö ngaich; in ò inrē ök töngtöl pīhö ò. 11Hē cha ngaich nö i Yapus, keuheūt ök sakāmö ngaich; ngaich ngö ṙô ök tarik ò tök yöngre, Vë-ekūömeh chin, tā-a töi kāntöre i ngih elpanam yip aṅ Yapus öi ngöh in e. 12Ngaich ngö ṙô ök yöng ò tö ò, Hö-ö in hòṅ kāntöre elpanam aṅ tahëng, öp töt elpanam kūön Israĕl; havāngngöre pöri ayī-ö i Kīpiā. 13Ngaich ngö ṙô anga-aṅ tök tarikre. Tā-a töi ṙūötöre i töhĕng i në chūökö hòṅ hī min iyöng Kīpiā, hēk i Rāma. 14Chöö-ökūöre cha-a ngaich nö kiröönngöre; meutti ngaich ngam tavūöi tö ranöhta cha nö i Kīpiā, öp panam Penyamin. 15Kānhötre cha-a ngaich nö umuh, nö hòṅ iyöng Kīpiā: kuhēthötre anga-aṅ ngaich, ngaich ūichngöre nö el talöökö ngam elpanam: pòn öt tarīku tö hòṅ hachūöklen cha nö elpatīre.
16Ngaich yih ök umuh tököiny tarik tö harap ṙā-ang i la-enre nö elpanô-òṅ; aṅ ik rung panam Ifrēm ök tarik; ngaich iyöng anga-aṅ nö i Kīpiā: aṅ Penyamin pöri yip tarik in e. 17Ngaich chingôhòlkūöre anga-aṅ, ngaich meuk ök kumröön tarik nö el talöökö ök elpanam; ngö ṙô ngaich ök tököiny tarik, Chuh yih ömeh? Ṙā-ang yih öm inrē? 18Ngaich ngö ṙô anga-aṅ tö ò, Ṙā-ang Petlihem Yūtā in öi lök hih öi chuh lā muh töp rung panam Ifrēm; öp ṙeūngö chu, ngaich chuh Petlihem Yūtā chū-ö: ngaich chin töngamuh chuh i patī ngam Mā Tēv; öt tarīkuvö pöri mahachūöklen chu nö elpatīre. 19Kiyôp nun në tönyô nyā-aṅkūö në köttö ih; rôtī, vāin inrē nyā-aṅkūö chu, nyā-aṅkūö ngòh kūön meh kikānö, nyā-aṅkūö ngòh ṙāl tarik inrē ngam hol më tarik meh: öthanātuṙen in tö yô-òv. 20Ngaich ngö ṙô ök tököiny tarik, Kumchikṙen yēḵ in meh; hökngen nup hanāten meh nö ṙòkhöre nö i kui chu; höng uh pöri öm iyöng el talöökö. 21Ngaich kēhöt ò anga-aṅ nö el patī re, kētö nyā-aṅkūö nup köttö ò ngaich tö tönyô kiyôp: söichröönre cha-a ngaich, ngaich nyā òk inrē.
22Hē cha nö ngaich nö ṙāmölōn, ngaich yik tarik aṅ ngam elpanam kūön tötlöök, nö havīlö ngam patī, foh kūö ök inkūp; ngaich ngö ṙô cha-a tök töpatī-ivö ök tököiny tarik, Kē töp tarik man öp yamih nö el patī meh, hòṅ ih akahakūö tö ò. 23Ngaich ök tarik, ök töpatī-iv, nö kunyī-inyre nö in cha nö ngö ṙô, Hö-ö, hol chu, vë-ekūö meh chin, un ngatī öt lanöökö la-en; tön yih ön ngòh tarik nö el patī chu, un tītö ngih kumlō-ov. 24Yĕh meuk, kūön chu öp ihih rēlö kikānö, tö ngam töngtöl pīhö ò inrē; kēnyen cha chin kô-òren nö el kahôyö töngamuh, ngaich kô-òren yī-ö hayëḵngen cha, kahang tīre inrē tö cha sā öp tölöök lōn yīö: uh pöri öi tī tö töngatī kumlō-ov i ngòh tarik. 25Ngaich pöri yik tarik nö sōḵ nö hang ṙô ò lökten ngam tarik nö kētö tīre nö ik töngtöl pīhö ò, ngaich kēnyen ò nö in cha, ngaich lök alaha ò cha-a, hĕng mitööm inrē nö öt lēken ò söllö peuheū: ngaich hē ranāklö ngam peuheū, hökngen ò cha-a ngaich nö kiröönngöre. 26Im minlīlö ngam sakāmö ngam kikānö nö yih, fukngö ngaich nö i kūö inkūp ök tarik i chūök ök pīhö ò, hanöng saha e nö hat nö ngaich.
27Choholre ngaich ök pīhö ò tö peuheū, löpnyökūö nuk inkūp ök patī ngaich, ngaich kunyī-inyre nö hòṅ kiröönngöre ngaich meuk ök kikānö ök töngtöl pīhö nö hulaltöhëichṙen nö i kūö inkūp ök patī i kui ök chūök pinṙōngö sāiny nuk kël ò. 28Ngaich ngö ṙô anga-aṅ tö ò, Choholre, ta-a töi ngaich kiröönngöre; öt sināpuṙô pöri: ngaich chaplen ò anga-aṅ nö i uk ök köttö; hōklöre ngaich ök tarik, ngaich chuh panamre. 29Ngaich hē ò nö yih nö i patīre, kē surītö ngaich anga-aṅ kētö tīre ngaich nö ik töngtöl pīhöre, li-ehan ngaich, nö sā mupākö ò, nö nëtsīön tit, söömngen ò ngaich nö keuheūt kūöngö panam Israĕl. 30Ngaich ṙòkhöre yik mameūkö e nö ngö ṙô, Öt töngatī-ivö nö ngaich öt rēhĕn nö meūkö löktökūö ök sakāmö vē kūön Israĕl, nö ṙā-ang panam Aikūp söl ing töngamuh: ngëichkö e, halēn, ṙô-òv inrē.
Currently Selected:
KAMHÔKA 19: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
