KAMHÔKA 21
21
Kikānö Pīhö Miyöngö Penyāmin
1Chūöku ṙô ngaich yik tarik Israĕl nö kilēḵngôre i Mispah, nö ngöṙô, Öt hĕng tak min tö hī kamëtö kūönre tö kikānö nö pīhö aṅ Penyamin. 2Yih ngaich yik tarik nö i Pētĕl, ngaich i kūö ngam Tēv nö ūichhak söl harap, pōitô ngaich cha-a nö ayôṙa, kalē-ĕ ṙô inrē nö peuiny. 3Ngö ṙô cha-a ngaich, Ō Mā Tēv, Tēv Israĕl, kūöyòh öng ngih nö yih nö in Israĕl, nö hĕnghang miyöngö min törö-ö in Israĕl? 4Ngaich im huṙöich, yik tarik nö ka-eūilökūö nö choholre, vīlö ök tahāklö ngaich ngaich kētö töföngö tökētu, tökētu inrē nö inlām. 5Ngaich yik kūön Israĕl nö ngö ṙô, Achiāp i miyöngö Israĕl nö ṙòkhöre öp töt yamih nö im inmūlö im Mā Tēv? Pò cha nö kirööngen ṙô nö chūökuṙô nö kilēḵngôre tö ò öp töt yamih nö im Mā Tēv nö i Mispah, nö ngö ṙô, Hakò-òi vah ap min nö kumpaha. 6Ngaich yik kūön Israĕl nö havöötö ellōnre nö ik kahëm cha Penyamin, ngaich ngö ṙô, Hĕng hang miyöngö ök töngamuh töröki in Israĕl: 7Sitih inlahen öi min tö pīhö cha yip tö ōtren, tö hī yih ngaich kilēḵngôre chūökuṙô im Mā Tēv tö hī min öt kētö kūönre tö kikānö nö pīhö cha?
8Ngaich ngö ṙô cha-a, Achīö ap töhĕng hang tak aṅ miyöngö Israĕl töt yamih nö im Mā Tēv nö i Mispah? Ngaich meūkö nö öt hĕng tak yamih nö im elyöngö manūlö ṙameū-eung Yapeskilīöt. 9Pòn hē më tarik nö kaheūkö, ngaich öt hĕng tak aṅ Yapeskilīöt umuh. 10Ngaich yik tömaṙôngö nö tīnngö tarik nët sīön köny töt pa-ekūö, ngaich ngö ṙô nö tölṙô cha, Kuṙòh aṅtī tö sanët yin fëlngö yip aṅ Yapeskīlīöt, kumngöre tī tö kikānö tö nyīö inrē. 11Angū-ö ön min ngih tī yīö; keuheūtngöre vahtī yin fëlngö kikōnyö, kikānö inrē töyōmu tö kikōnyö. 12Ngaich cha-a nö kôtikūö tö aṅ Yapeskilīöt fënòng tö ayal rēlö, tö-öl nö akahakūö tö tarik nö holtuṙah: ngaich cha-a nö kēten cha nö ik elyöngö i Sailō, öp i panam Kanā-an.
13Ngaich yik tömaṙôngö nö tīnngö vamë-eṅkūö yik kūön Penyamin yik me-el ök ihong Rimōn, ngaich ahangken cha tölanöökö. 14Havan ngaich Penyamin hē e; ngaich cha-a nö kētö yik kikānö nö in cha yik tö-aṅ aṅ i yik kikānö i Yapeskilīöt: sön pöri cha-a nö öt kô-òre kūö tö cha. 15Havöötö ellōnre ngaich yik tarik nö in Penyamin, pò ngam Mā Tēv nö hôingötī tö miyöngö Israĕl.
16Ngaich yik makūö yik tömaṙôngö nö ngö ṙô, Sitih inlahen öi min tö pīhö cha yip tö-ōtren tö yik kikānö in Penyamin nö keuheūtngöre vah nö ngaich? 17Ngaich ngö ṙô cha-a, Hòṅ amīnu yip cha-a yip töt kô-òngvah aṅ in Penyamin, hòn öt hĕng hang miyöngö tö sīchiyö nö ṙā-ang Israĕl. 18Uh pöri ayī-ö kētö pīhö cha tö kūönre kikānö pò yik kūön Israĕl nö chūöku ṙô nö kilēḵngôre, nö ngö ṙô, Rūtivah öp min kamëtö pīhö Penyamin. 19Ngaich ngö ṙô cha-a, Yĕh meuk kaheuk samyeūheu öp paratīn ngam Mā Tēv i Sailō, öp lā kapā tö Pētĕl, lā chuhöt töp tökiröng talöökö chamuh Pētĕl nö söl Sīkem, lā lòhngö inrē tö Leponā. 20Ngaich ngö ṙô cha-a nö töl ṙô yik kūön Penyamin, Kuṙòh höng yin el nup panô-òṅ vāin; 21Ngëicha inrē yē yip kikānö kūön aṅ Sailō nö yih nö kiṙīöm nö i nup kinṙīömö, ngaich meutnyi yī-ö ṙā-ang el nup panò-òṅ vāin ngaich kö kahĕng tak kahë yī-ö tö pīhöre tö aṅ i yip kikānö kūön aṅ Sailō, kiröönngöre ngaich chuh panam Penyamin. 22Ngaich mīnö yē yip kikōnyö yöng cha hēk inrē yip kanônyö cha nö yihtöre nö ih nö vë-eny miṙivlōnre, ngaich ngö ṙô min īhö tö cha, Kēten cha aṙē-ĕlōn tö ih: tön rö-ö in kö kē pīhö cha ik kinyūngö: rö-ö yī-ö inrē kē-ĕti in cha; yī-ö yin min töfaluṙen yĕi öt ngatī. 23Ngaich ngatī yik kūön Penyamin, kē pīhöre cha-a ngaich, sā tum tak cha, tö aṅ i yik kumṙīöm, yik tö tayūki tö cha: havantöre cha-a ngaich nö ik aminre, vīlö nuk elpanam ngaich, iyöng ël u ngaich. 24Hē e ngaich yik kūön Israĕl nö kiröönngöre nö ṙā-ang umuh, kö i miyöngöre kö i mupīhöre inrē, kiröönngöre cha-a ngaich nö ṙā-ang muh nö kö löö i amin re.
25Öt rāchavö i Israĕl hē nuk sakāmö anū-ö: höng kö kahngenre ngaich tarik töp töng huveū nö elmatre.
Currently Selected:
KAMHÔKA 21: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
