KAMHÔKA 1
1
Kēḵ Panam Atonipesek Ngam Mikūönö Nā Yūtā Nāṅ Simōn
1Ngaich ngö inlahen angū-ö unôichrit kinpaha Yôsuā tö yik kūön Israĕl nö hatöntöre nö i ngam Mā Tēv, nö ngö ṙô, Achiāp min kumröönngöre nö hol ih urĕh lā-al yip aṅ Kanā-an, öi kiyung lā-al cha? 2Ngaich ngö ṙô ngam Mā Tēv, Yūtā öp min kumröönngöre: Yĕh meuk, ngaich chin kētö ngih panam eltī ò. 3Ngaich Yūtā nö ngö ṙô tö Sīmōn ök kahëm ò, Tā-a in chu man ing kintölö chu, hòṅ hī kiyung lā-al yip Kanā-an; ngaich ngatī chū-ö min inrē hol meh im kintölö meh. Lökten Sīmōn nö kiröönngöre nö hol ò. 4Kiröönngöre ngaich Yūtā: ngaich ngam Mā Tēv nö kēten yik aṅ Kanā-an tö yik aṅ Peris nö eltī cha: ngaich cha-a nö fëlngen cha i Pēsek söm köny yik tarik. 5Ngaich kôtökūö cha-a tö Atōnipēsek nö i Pēsek: kiyung cha-a ngaich nö lā-al ò, fëlngen yik aṅ Kanā-an inrē tö yik aṅ Peris. 6Falngöre pöri Atōnipēsek; ngaich cha-a nö lūḵ an, ngaich kô-òngvah tī tö ò, röki ngaich nuk inyöng kuntī ò tö nuk inyöng kunröön ò. 7Ngaich Atōnipēsek nö ngö ṙô, Sat anāi tumtak yik rācha töröki inyöng kuntī inyöng kunröön inrē, hamūl nyā-aṅkūöre nö elkatòh mīs chu: sā tī chu chū-ö ngaich, ngati tī ngam Tēv tö chu. Kēten ò cha-a ngaich nö i Yēruselem, ngaich in e anga-aṅ nö kapah.
Kiyūngö Yěrūselem Tö Hepròn Ngam Mikūönö Yūtā
8Ngaich yik kūön Yūtā nö kiyung nö lā-al Yēruselem, ngaich kē-ĕ e, ngaich fangngen e nö aṅtī tö fël, ngaich föngtökūö ök elpanam tö tameūyö. 9Unôichngöre inrē yik kūön Yūtā nö peūtöre nö kiyung lā-al yik aṅ Kanā-an yik mī-iyöng ik rung panam, lā lòhngö, im töṙā-akūö panam inrē. 10Ngaich kiröönngöre Yūtā nö lā-al yik aṅ Kanā-an yik mī-iyöng Hepròn; (Kiriātarpā ap misī minë-eny Hepròn nö lā-urĕh) ngaich cha-a nö fëlö Sisāi, Ahīman, Talmai inrē.
Kiyung Nup Elyöngö Tepīr Ang Otnīĕl
(Yôs 15.13-19)
11Ṙeū-eung umuh anga-aṅ ngaich nö kiröönngöre nö lā-al yik aṅ Tīpir. (Kiriātseför ök misī minë-eny Tīpir nö lā-urĕh.) 12Ngaich ngö ṙô ang Kalĕp, Öp kumyūngö Kīrātseför, kē-ĕ e inrē, anga-aṅ min tö kē-ĕvkūö tö Aksā öp kikānö kūön chu nö pīhö ò. 13Ngaich Otnīĕl ök kikōnyö kūön Kēnās, ök manāngö kahëm Kalĕp, nö kē-ĕ e: ngaich anga-aṅ nö kūön ò nö pīhö ò. 14Ngaich angū-ö nö ngö inlahen hē Aksā nö yihtöre nö in ò, ngaich hōten ò anga-aṅ nö havëkö ök taṙeū nö in ök yöng ò kikōnyö: yôkti ngaich Aksā nö ṙā-ang uk ök köttö ò; ngaich ngö ṙô Kalĕp tö ò, Asuh ap lōn meh? 15Ngaich ngö ṙô anga-aṅ tö ò, Alōnten chu man yĕh; sā meh ngaich ṙāten chu im panam lā lòhngö, kētö në töhëmlö mak in chu inrē. Ngaich Kalĕp nö kētö nuk lātulöng töhëm mak tö nuk lātaṙeū inrē.
Mīnhôiṅyö Mīkūönö Nā Yūtā Nāṅ Penyāmin.
16Ngaich yik kūön aṅ Kēn, ök yöng pīhö Môsös, nö kiröönngöre nö ṙā-ang ip elpanam chūök kachūr nö hol yip kūön Yūtā, nö ik tönyalnyi i Yūtā, ök lā lòhngo tö Arāt; kiröönngöre cha-a ngaich, ngaich iyöng in yik tarik. 17Ngaich hol ök kahëmre Yūtā ang Simōn nö kiröönngöre, kiyung yik aṅ Kanā-an cha-a ngaich yik mi-iyöng Sefāt ngaich hatngö tī tö e. Ngaich kaheūkö minë-eny ök elpanam nö Hòrmā. 18Kē-ĕ Kāsā inrē ang Yūtā holre töp kūöngö e, Askēlòn holre töp kūöngö e, Ĕkròn inrē holre töp kūöngö e. 19Holtöṙah Yūtā ngam Mā Tēv; ngaich anga-aṅ nö ahōngö yik aṅ ngam rung panam, pò ò nö ötkô nö ahōngö yik aṅ el achāṙö, pò cha nö inröl tö vët. 20Ngaich cha-a nö kēten Hepròn nö in Kalĕp, sā ṙô Môsös: ngaich anga-aṅ nö ahōngen yik tölūöi tak kikōnyö kūön Anak nö ṙā-ang umuh. 21Öt ahōngö yik Yepus yik kūön Penyamin yik aṅ Yēruselem; ngaich pöri yik Yepus nöng holtöṙah yik kūön Penyamin nö iyöng Yēruselem, söl i ngih sakāmö.
Kiyungö Pētĕl Nā Efrēm Nāṅ Manasē
22Kiröönngöre inrē yik aṅ patī Yôsĕf nö lā-al Pētĕl: ngaich holtöṙah cha ngam Mā Tēv inrē. 23Ngaich yik aṅ patī Yôsĕf nö tīnngö mahayuntö matre tö Pētĕl. (Lus ök misī minë-eny ngam elpanam nö lā-urĕh.) 24Ngaich yik amahati nö hĕng tak maheuk tö tarik kumnyī-inyre nö ṙā-ang elpanam, ngaich ngö ṙô cha-a tö ò, Vë-ekūö meh in, hameukhömat ih man tö ap lökhöt im elpanam, ngaich īhö min aṙē-ĕlōn tö meh. 25Ngaich anga-aṅ nö hameukhömat cha tök lökhöt im elpanam, aṅtī tö fël cha-a ngaich nö kiyung ngam elpanam, ngaich cha-a nö kiyung ngam elpanam nö aṅtī tö kūö fël; höö-kīṙen pöri ök tarik tö cha nö kiröönngöre ṙòkhöre inrē yip kūön ò. 26Ngaich öktarik nö chuh panam yik Hitait, ngaich vī-il elpanam, ngaich haheuk minë-eny e nö Lus; ngam minë-eny e söl i ngih sakāmö.
Tarik Töt Ha-ōriyö Tö Yik Israel
27Ngaich hö-ö Manasē nö ahōngen yik aṅ Petsīan tö yik kikānö kūön ò inrē, öt rēhĕn Tā-anak tö yik kikānö kūön ò inrē, öt rēhĕn yik aṅ Tòr tö yik kikānö kūön ò inrē, öt rēhĕn yik aṅ Iptēm tö yik kikānö kūön ò inrē, öt rēhĕn yik aṅ Mekitō tö yik kikānö kūön ò inrē: im panam pöri yik aṅ Kanā-an nö iyöng. 28Ngaich ngö inlahen angū-ö, hē Israĕl nö ngaich nö ṙūöhölre kumlēḵ, ngaich cha-a nö kēten yik aṅ Kanā-an nöng töla-evṙen, ngaich öt keuheūtnyöre tī nö ahōnyen cha. 29Hö-ö inrē Ifrēm nö ahōnyen yik aṅ Kanā-an yik mī-iyöng Kēsör, höng in cha pöri yik aṅ Kanā-an mi-iyöng Kēsör.
30Öt ahōnyen yik aṅ Kitròn ang Sepulön, ötrēhĕn yik aṅ Nahalol; höng iyöng in cha pöri yik aṅ Kanā-an, ngaich nö töng la-evṙen.
31Öt ahōngö yik aṅ Akkō an Asēr, öt rēhĕn yik aṅ Sītōn, öt rēhĕn aṅ Ahlap, öt rēhĕn aṅ Aksip, öt rēhĕn aṅ Helpah, öt rēhĕn aṅ Afik, öt rēhĕn aṅ Rēhòp; 32Ngaich pöri yip aṅ Asēr nöng iyöng in yip aṅ Kanā-an, yik aṅ ngam panam: pò cha nö öt ahōnyen cha.
33Öt ahōnyö yik aṅ Petsimes ang Naftalī, öt rēhĕn yik aṅ Petanāt; ngaich pöri anga-aṅ nöng iyöng in yik aṅ Kanā-aṅ yik aṅ ngam panam; höng kētuṙen pöri yik aṅ Petsimes aṅ Petanāt inrē nö in cha.
34Ngaich yik aṅ Amôr nö līpngen yik kūön Tën nö im rung panam: pò cha nö öt halöngten cha nö peūtöre nö im achāṙö; 35Iyöng ip rôngö Harheres pöri yik aṅ Amôr, i Ayialòn, i Sā alpim inrē: mihôiṅ pöri ngam kël yik aṅ patī Yôsĕf, lökten cha nö ngaich nö töng la-evṙen. 36Ngaich ngam kūöngö yik aṅ Amôr nö löktö kūö im paneūlö Akrapim, löktö kūö im ihong, kū-ötö tulöng inrē.
Currently Selected:
KAMHÔKA 1: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
