KAMHÔKA 16
16
I Kāsā Ang Sëmsön
1Chuh Kāsā ngaich ang Semsön, ngaich meuk ök kikānö mi-inyihköre umuh, ngaich kuhēthötre nö in ò. 2Ngaich ngö ṙô yik aṅ Kāsā nö vënyen ò, Yih öp Sëmsön nö ihih. Ngaich cha-a nö havīlen ò, hĕng mitööm nö ikūö inkūp öp elpanam nö höngan ngaich hĕng mitööm cha-a ngaich ngö ṙô, Höklö öp hanātö öp peuheū ngaich fëlngen ò min ayī-ö. 3Söl chūöl hatööm ngaich Semsön nö hulalhaka, choholre ngaich ik chūöl hatööm, kētö tīre ngaich nö i nuk inkūp lökhöt ik elpanam, in nuk tönët machööḵlö inrē, ngaich teuklö u, ṙòkhöre nuk kālkūö inrē, tayūkö ngaich tö ò nö elranôṙö ò ngaich keunngö u nö ip rôngö lākūö Hepròn.
Sëmsön Nāṅ Tilaila
4Ngaich unôichngöre, anga-aṅ nö hāngenlōn tök kikānö el achāṙö Sōrek, ök töminënyu tö Tīlaila. 5Ngaich yik mā aṅ Filistain nö yihtöre nö in ò, ngaich ngö ṙô tö ò, Haṙöiyan, ngëichkö chūök öp yöng kumlēḵ ò, töp aṅtī hī inrē öi mihôiṅ lā-al ò, hòṅ hī nyëkan öi hakihten ò: ngaich kö tī-ivö min īhö in meh tö rupīö kahuk sīönòng. 6Ngaich ngö ṙô Tilaila tö Sëmsön, Vë-ekūö meh chin, vë-enynang chu tö chūök öp yöng kumlēḵ meh, töp nyanëk meh inrē öm hakihtuṙen. 7Ngö ṙô ngaich Semsön tö ò, Yē cha nö nyëkö chu nö sātö aṅtī tö tö-uhāv inröt linreny, nup töt hanyôṙö, ngaich min chū-ö öt kalēḵ, ngaich höng sā töng tarīka. 8Ngaich yik mā aṅ Filistain nö sātö kahëti nö in ò tö tö-uhāv inröt linreny nup töthanyôṙö, aṅtīten tö u ngaich anga-aṅ nö nyëkan. 9El ök lātuhēt urôhò yik mahayūnan nöng ngöh tö tī ò. Ngaich ngö ṙô anga-aṅ tö ò, Semsön, Filistain yin vē in meh. Litòkngö nuk inröt linreny anga-aṅ ngaich höng sā tökuvaha tanūök nö latôki yē e nö ökngö tökūö tameūyö. Ngatī öp kumlēḵ ò nö öt ankahen chūök.
10Ngaich ngö ṙô Tilaila tö Semsön, Yĕh meuk miyëḵ man tö chu, minyôinyaṅ ṙô in chu inrē: Vë-ekūö meh chin, vë-enynang chu töngamuh, öp yòh öp tökô nyanëk meh. 11Ngaich ngö ṙô anga-aṅ tö ò, Yē cha nö nyëkö chu nö aṅtī tö tufömngöre pisik öp tö-öl nö kētu kūö nö i lā-en ngaich min chū-ö öt kalēḵ, sā töng tarīka inrēngöre. 12Kē tufömngöre ngaich pisik ang Tilaila ngaich nyëkan tö e, ngaich ngö ṙô tö ò, Semsön Filistain yin vē in meh. El öp lātuhēt urôhò yik hamöng nöng ngöh. Litòkngö u ngaich anga-aṅ nö i këlre nöng sā tā-īö.
13Ngö ṙô ngaich Tīlaila tö Semsön, Ihih man inrē hayëngen chu, minyôinyaṅ ṙô inrē in chu: ve-enynang chu man töp tökô nyanëk meh. Ngaich ngö ṙô anga-aṅ tö ò, Yē meh kupat në tösat keūyö el kui chu nö hol tö haveūngö. 14Kapòkngö e ngaich anga-aṅ nö ik tumnôkö, ngaich ngö ṙô tö ò, Semsön Filistain yin vē in meh. Aṅhen ngaich anga-aṅ, teuklö ök tumnôkö ngaich nö ik mikeūnö, tök haveūngö inrē.
15Ngö ṙô anga-aṅ tö ò, sitih kanô-òṅ öm ngö ṙô, Hāngenlōn chin tö meh, yē ngam ellōn meh nö öt in chu? Ngaich man yih lūöi heuh hayëḵngen chu, öt vë-enynang chu inrē tö chūök öp tökiröng kumlēḵre. 16Ngaich hē ò nö öt hĕng hang sumkam nö līpnyö ṙô ò, nö mileūchen, ngaich hòṅ kapah anga-aṅ tö kanihngen ellōnre. 17Ngaich keuheūtnyö ellōnre anga-aṅ nö ve-enynang ò, nö ngö ṙô tö ò, Öt hĕng nòng kinmöp tö ngaich nö el kui chu: pò chu löktökūö el chūök kanūönö yöngre öich Nasaret im Tēv. Yē chu kuhāki, ngaich öp kumlēḵ chu min nö kiröönngöre nö ṙāngen chu, ngaich chū-ö min öt kalēḵ, sā töng tarīka inrēngöre.
18Ngaich hē Tilaila nö meūkan nö ṙā-ang ellōnre ṙô nö ve-enynang ò, tīnngö mahavëtö yik mā aṅ Filistain anga-aṅ nö ngö ṙô Yih yin höng hĕng tör heuh, tön ngaich ön nö löknyö ellōnre ṙô nö ve-enynang chu. Yih ngaich yik mā aṅ Filistain nö in ò, kumtö nuk rupīö inrē nö eltīre. 19Miṙôhan ngaich anga-aṅ nö i kui kinmônöre; hĕng tak havëti ngaich tö tarik, ngaich kuhākngö nuk tösat keūyö i kui ò; rultöre ngaich anga-aṅ nö hakihten ò, ngaich ök kumlēḵ ò nö kiröönngöre nö ṙā-ang in ò. 20Ngaich ngö ṙô anga-aṅ, Semsön Filistian yin vē in meh. Choholre ngaich anga-aṅ nö ṙā-ang ik inṙôhò, ngaich ngö ṙô, Hòṅ kunnyī-inyre chin sāre ṙung, öich piyònglö alahare. Öt akahalōn pöri anga-aṅ tö ngam Mā Tēv nö rāngen ò. 21Kētö tīre ngaich yik Filistain tö ò, ngaich piòknyö mat ò, ngaich kēten ò cha-a nö i Kāsā, nyëkan inrē tö mās sayōk; ngaich kiṙīöt atra anga-aṅ nö el ök patī inkövö. 22Sīöplöre pöri nö hēk nuk keūyö ò nö i kui ò unôichrit kunhākngö ò.
Kapah Sëmsön
23Hamūlöre ngaich yik mā aṅ Filistain nö kētö tökiröngen tökētu ik tēv cha Takòn, haṙamlōnre inrē: pò cha nö ngö ṙô, Kēten Semsön an ngam tēv hī nö eltī hī, ngam tökunyaha elmat tö hī. 24Ngaich hē yik tarik nö meūkan, ha-öiny ngam tēvre ngaich cha-a pò cha nö ngö ṙô, Kētö ngam tökunyaha elmat an tö hī ngam tēv hī, nö eltī hī, ngam mahalëlngö ngam panam hī inrē, ngam töpōihangvah tī nö fëlngen hī 25Ngaich hē cha nö ṙāmö ellōn, löknyö ṙô cha nö ngö. Havëten Semsön, hòṅ ò nö nyamkö kūö hī. Havënyen Semsön cha-a ngaich nö ṙā-ang el ök patī chūök inkövö; ngaich nyamkö kūö cha anga-aṅ; ngaich ha-ūichngen ò cha-a ihôi nuk machööḵlö. 26Ngaich ngö ṙô Semsön tök ṙāl tarik ṙamapkö kël ò, Höktötī chu man ṙēpkö nup machööḵlö nup tö aṅhaṅv kui töng patī, hòṅ chu harôntöre in u. 27Tööḵlö ök patī tö kikōnyö tarik kikānö inrē; umuh inrē yik mā aṅ Filistain nö ṙòkhöre; i kui patī yik inrē umuh kikōnyö kikānö inrē, lūöi köny yip mameūkö Semsön nö nyamhötô.
28Ngaich Semsön nö havëkö ngam Mā Tēv, nö ngö ṙô. Ō Mā Tēv, fē-ĕlre tö chu, vë-ekūö meh chin, hangëken chu, vë-ekūö meh chin, höng hĕng törheuh. Ō Tēv, hòṅ chu havāhalvah re i vē Filistain tö në tönët matre. 29Ṙapngö tīre ngaich Semsön nö i nuk tönët elmilūkö machöḵlö nuk chūök ngam patī nö töönghakaṙen, harôntöre ngaich nö in u, hĕng ök i lāhāmö eltī ò, lātavē ò ök tahëng. 30Ngaich ngö ṙô Sēmsön, Hökngen chu kapah anòngngen vē Filistain. Holtö kumlēḵre ngaich anga-aṅ nö sōnngöre; fukngö ngaich ngam patī nö i kui yik mā, i kui yik tarik inrē nö ṙòkhöre me-ël e. Lökten yik tökapah fahëlngö ò ik kinpaha ò nö mötlö tö yik fahëlngö ò hē ò nö aṅ. 31Yih ngaich yik hanöng kisānö ò yik aṅ patī ök yöng ò kikōnyö inrē, ngaich kē an, kēnyen ò inrē, ngaich lāpngen ò ihôi Sōrah tö Esta-ôl inrē ik kui kupah Manôa ök kikōnyö yöng ò. Nët anāi samyeūheu anga-aṅ nö hayöngö Israĕl.
Currently Selected:
KAMHÔKA 16: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
