KAMHÔKA 17
17
Nuk Insātēv Maika
1Ngaich hĕng tak ök umuh tarik aṅ ip rung panam Ifrēm, Maika ök minë-eny ò. 2Ngö ṙô anga-aṅ tök yöngre kikānö, Nuk tökahuk sīönnòng rupīö nuk tö kē-ĕyö nö ṙā-ang in meh, nuk ṙô meh chūökuṙô öt lēkôre, ngaich vë-eny nang chu inrē tö e, yĕh meuk in chu nun në rupīö; chū-ö chin kamë-eṅ u. Ngaich ngö ṙô ök yöng ò kikānö. Më-eṅ kūön chu kikōnyö, tökôlò man im Mā Tēv. 3Ngaich anga-aṅ nö havantö nuk tökahuk sīönnòng rupīö nö ik yöngre kikānö. Hòṅ kētö ngih rupīö chin im Mā Tēv öich hakôtö tīre nö tī öp kūön chu kikōnyö, nö vī-i nö insātēv töhaṙöichö insā inrē lökten chin hòṅ havantö u in meh. 4Ngaich hē ò nö havan tö nuk rupīö nö ik yöngre kikānö nëtòng kahë ngaich tö rupīö ök yöng ò kikānö, ngaich kēten u nö ik mahaṙöich ök vamī i e nö insā tēv töhaṙöichö insā inrē: ngaich angū-ö nö i patī Maika. 5Ngaich ök tarik Maika nö patī-ivö tö patī tēv, vī fanūömṙat ngaich anga-aṅ, insā tarik inrē, ngaich hĕng tak ahetlö tö aṅ i yip kūönre kikōnyö ök tövītuṙen nö kūönṙô ò. 6I nuk sakāmö anū-ö misī öt rāchavö i Israĕl: höng kö kahngenre tarik töp töhuveū maheuṅk ò.
7Ngaich hĕng tak ök umuh ṙāl tarik aṅ Petlihem Yūtā, aṅ mupīhö Yūtā, ök Lēvī, ngaich chuh umuh anga-aṅ. 8Ṙāngö elpanam Petlihem Yūtā ngaich ngam tarik, nö kiröönngöre nö chöh chūökṙen re: teungtökūö anga-aṅ ngaich nö ip rung panam Ifrēm nö i patī Maika, ip kinröönö ò. 9Ngaich Maika nö ngö ṙô tö ò, Ṙā-ang yih ömeh? Ngaich ngö ṙô anga-aṅ tö ò, Lēvi chin aṅ Petlihem Yūtā, höng kiröön chin ip kanôtökūöre chūökö 10Ngaich ngö ṙô Maika tö ò, Iyöng in chu man, öm yöng chu kūönṙô chu in chu inrē, ngaich söm milôhò tī chu-ö min tö rupīö meh i töhĕng samyeūheu, hĕng tamrīkö inyut, tö nyā-aṅkūö meh inrē. Kuhēthötre ngaich ngam Lēvi. 11Hōḵ ngaich ngam Lēvī nö iyöng nö im tarik; ngaich ngam ṙāl tarik nö sā töhĕng tak aṅ i yip kūön ò kikōnyö. 12Ahetlö ngam Lēvī ngaich ang Maika, ngaich ngam ṙāl tarik nö kūönṙô ò, ngaich el patī Maika. 13Ngö ṙô ngaich ang Maika, Ngaich chin akahalōn töngamuh tö ngam Mā Tēv nö kôlòtī min tö chu; pò chu aṅhaṅv in tö Lēvī nö kūönṙô chu.
Currently Selected:
KAMHÔKA 17: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
