KAMHÔKA 13
13
Kīnyôḵnyö Sëmsön
1Ngaich hēk yik kūön Israĕl nö ötlöökö la-en nö i kūö ngam Mā Tēv; Kēten cha ngaich ngam Mā Tēv nö eltī yik Filistain fën anāi samyeūheu.
2Ngaich hĕng tak ök umuh tarik aṅ Sōrah, aṅ i mupīhö Tën, ök tö minënyu tö Manô: tötkūönu ök pīhö ò, tötkamyô inrē. 3Meūkö ngaich ök ma-ahānga aṅ im Mā Tēv tök kikānö, ngaich ngö ṙô tö ò, Yĕh meuk, ötkūönu man, tötkamyôḵ inrē: pirūkö nyīö pöri min më-eṅ, kayôḵnyö nyīö kikōnyö inrē. 4Vë-ekūö meh chin lökten haṙēmngenre, un òk vāin un rēhĕn òk tökalēḵ, un nyā-aṅvkūö inrē tö töthet: 5Yĕh meuk, pirūkö nyīö man min, kayônyö kikōnyö nyīö inrē: öt kētu kūö min kunhāk nö i kui ò: pò ap nyīö min nö aṅ Nasaret nö im Tēv löktökūö el chūök kanūönö: ngaich anga-aṅ min nö rultenre nö hayööken Israĕl nö ṙā-ang eltī yip aṅ Filistain. 6Ngaich ök kikānö nö yihtöre nö vë-eny nang ök pīhöre, nö ngö ṙô, Hĕng tak ök tarik ngam Tēv yihtöre nö in chu ngaich ök arëkūö ò nö sā arëkūö ma-ahānga aṅ im Tēv, nö vanööṙö: öt hatönan chū-ö töp ṙeūngö ò, öt rēhĕn anga-aṅ nö vë-enynang chu tö minë-enyre: 7Ngö ṙô pöri anga-aṅ tö chu, Yĕh meuk, pirūkö nyīö man min kayônyö nyīö inrē kikōnyö; un òk vāin töngamuh inrē un rēhĕn òk tökalēḵ, un nyā-aṅvkūö inrē tö töng öthet: tön aṅ Nasaret öp min nyīö nö im Tēv töngamuh löktö kūö el chūök kanūönö söl kinpaha ò.
8Ngaich Manô-a nö vë-ekūö ngam Mā Tēv, nö ngö ṙô, Ō Mā vë-ekūö meh chin, hökngen ap tarik ngam Tēv öp tahīntö meh taheui nö yih nö hēk nö in ai, haköpten ai inrē tö tī ai min töp nyīö öp tökayônyu min. 9Ngaich hang ṙô Manôa ngam Tēv; yih ngaich ök ma-ahānga nö hēk aṅ im Tēv nö ik kikānö hē ò nö ūichhaka nö el panô-òṅ: hö-ö pöri ök pīhö ò Manôa nö in ò. 10Kurāten ngaich ök kikānö, fal inrē, ngaich vë-eny nang ök pīhöre, nö ngö ṙô tö ò, Yĕh meuk, meūkö öp tarik tö chu, öp yamih nö in chu fömngöre. 11Choholre ngaich Manô-a, ngaich kiröönngöre nö tömrit ök pīhöre, ngaich yihtöre nö ik tarik, ngaich ngö ṙô tö ò, Më-eṅ öm tarik vamë-eṅkūö öp kikānö? Chū-ö chin, ngö anga-aṅ. 12Ngaich ngö ṙô Manô-a, Hökngen nup ṙô meh yēḵ nö teungtökūö: tösitih inlaha ap min nyīö, sitih tī öi min tö ò inrē? 13Ngaich ök ma-ahanga aṅ im Mā Tēv nö ngö ṙô tö Manô-a, Nup ṙô chu nö ṙòkhöre im kikānö hökngen ò nö haṙēmngen re. 14Öt nyā-aṅvkūö an tö nup töng lamöknyö i ṙòng vāin, un rēhĕng nö òk vāin hēk tökalēḵ òk, un nyā-aṅv kūö nö rēhĕn tö töthet; hökngen ò nö haköpkö nup ṙô chu tölṙô ò nö ṙòkhöre. 15Ngaich Manô-a nö ngö ṙô tök ma-ahānga aṅ im Mā Tēv, Ve-ekūö meh chin, hökngen ai man hangöhten meh, hòṅ ai halēn öp kun pököre nyā-aṅkūö meh.
16Ngaich ngö ṙô ök ma-ahānga aṅ im Mā Tēv tö Manô-a, Pòrô man hangöhten chu, öt hōḵ chū-ö min nyā nyā-aṅkūö meh: ngaich yĕḵ meh halēnlö töföngö tökētu, hòṅ kēten e me-eṅ im Mā Tēv, Pò Manô-a nö öt akahakūö tö ò nö ma-ahānga aṅ im Mā Tēv, 17Ngaich ngö ṙô Manô-a tök ma-ahānga aṅ im Mā Tēv, Chīāp mine-eny meh, hòṅ ih ha-öinyö meh min yĕn teungtökūö nup ṙô meh? 18Ngaich ngö ṙô tö ò ök ma-ahānga aṅ im Mā Tēv, Kūöyòh öm hatön mine-eny chu, yē e nö töt ankahen? 19Ngaich Manô-a nö kē ök kun pököre nö holtö ök nyā-aṅ tökētu, kētö e ngaich nö im Mā Tēv nö i kui ök ihong: ngaich ök ma-ahānga nö tītö pinngangkūö, höng hatīöna Manô-a tök pīhö ò inrē. 20Pò e, hē ngam tameūyö nö hūlökūö nö kū-ötö el halīöngö nö ṙā-ang el öp; tahāklö, öp ma-ahānga aṅ im Mā Tēv nö yônlö nö i kūö ngam töhū el ngam tahāklö: hatīöna Manô-a tök pīhö ò inrē; afukngöre cha-a ngaich nö fāthak kūö nö el tumlat.
21Öt hēk pöri öp ma-ahānga aṅ im Mā Tēv nö mēukö tö Manô-a hēk tök pīhö ò. Akahalōn ngaich Manô-a tö ò nö ma-ahānga aṅ im Mā Tēv. 22Ngaich ngö ṙô Manô-a tök pīhöre, Kô-ông vah an min kapah pò hā meuk ngam Tēv. 23Ngö ṙô pöri ök pīhö ò tö ò. Yē ngam Tēv öreh nö lōnu tö finëlngö hā, ngaich sōḵ öre anga-aṅ tök töföngö tökētu nö ṙa-ang eltī hā tök nyā-aṅ inrē tö kētu, öt rēhĕn öre anga-aṅ nö hameuk tö në nö ṙòkhöre nö in hā, öt rēhĕn öre nö ve-eny nang hā tö në nö ṙòkhöre. 24Ngaich ngam kikānö nö kayônyö nyīö kikōnyö, ngaich kaheuk mine-eny ò nö Sëmsön; sīöplö ngaich ök nyīö, ngaich hakôlò ò ngam Mā Tēv. 25Ngaich ök ma-alaha aṅ im Mā Tēv nö kēngen ò nö i Mahanetan ihòi Sōrah tö Esta-òl.
Currently Selected:
KAMHÔKA 13: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
