KAMHÔKA 12
12
Yëftā Tö Yik Mikūönö Ifrēm
1Ngaich yik tarik Ifrēm nö hamūlöre ngaich kū-ötö kapā nö kiröönngöre; ngaich ngö ṙô cha-a tö Yefta, Kūöyòh ömeh havāngngöre kiyung lā-al yip kūön Amön, ngaich öt havëken ih öi kiröönngöre in meh? Hòṅ föngtö kūö meh in el ap patī meh tö tameūyö. 2Ngaich ngö ṙô ang Yefta tö cha, Kasal kumlēḵre chin tö vē tarik chu inrē i vē kūön Amön; ngaich hē chu havëken yīö, öt hayööken chu yī-ö ṙā-ang eltī cha. 3Ngaich hē chu meūkö yīö öt hayööken chu, kē ngih nômöre chū-ö ngaich eltīre, ngaich havāngngöre lā-al yip kūön Amön, kēten cha ngaich ngam Mā Tēv nö eltī chu: lökten kūöyòh öi yih in chu töngamuh, öi kiyung lā-al chu? 4Hamūl yik tarikre ngaich Yefta nö ṙòkhöre yik aṅ Kilīöt, ngaich kiyūngö Ifrēm, pô cha nö ngö ṙô, Aṅ Ifrēm yin yī-ö tökatūöyaṙen, yī-ö aṅ Kilīöt, nö el ṙôngö Ifrēm, el ṙôngö Manasē inrē. 5Ngaich yik aṅ Kilīöt nö kē nup talöökö invāngngö ël Yôtön nö lā-al yik aṅ Ifrēm: ngaich, hē yik Ifrēm nö falngöre nö ngö ṙô, Hökngen chu havāngngöre, ngaich yik tarik aṅ Kilīöt nö ngö ṙô tö ò, Aṅ Ifrēm ömeh? Ngaich yē ò nö ngö ṙô, Hö-ö; 6Ngaich ngö ṙô cha-a tö ò, Sīppolet ngö man yĕh; ngaich ngö ṙô anga-aṅ Sippolet: pòn ötkô anga-aṅ nö löökö ṙô ngaich cha-a nö kē an, fëlngen ò ngaich nö ël nup talöökö invāngngö ël Yôtön: ngaich in e hē e nö fën anāi nët köny aṅ Ifrēm töfukngö.
7Tafūöl samyeūheu ang Yefta nö hayöngö Israĕl. Kapah ngaich Yefta ök aṅ Kilīöt, ngaich lāpi nö ik töhĕng aṅ i nuk elpanam i Kilīöt.
Ipsān, Elòn, Tö Aptòn Inrē
8Unôichrit ò Ipsān öp aṅ Petlihem nö hayöngö Israĕl. 9Lūöi anāi kūön anga-aṅ tö kikōnyö, lūöi anāi kūön inrē tö kikānö tīnngen cha anga-aṅ nö marôvat, ngaich lūöi anāi yik nyīö kikānö kahëtö ò nö ṙā-ang tömarôvat nö pīhö yik kūön ò kikōnyö. Sat samyeūheu anga-aṅ nö hayöngö Israĕl. 10Kapah ngaich Ipsān, lāpi ngaich nö i Petlihem.
11Unôichrit ò nö hayöngö Israĕl ang Elòn aṅ Sepulòn; söm samyeūheu anga-aṅ nö hayöngö Israĕl. 12Kapah ngaich Elòn ök aṅ Sepulòn, lāpi ngaich nö i Ayalòn i panam Sepulòn.
13Unôichrit ò Aptòn nö hayöngö Israĕl ök kikōnyö kūön Hīlel ök aṅ Piratön. 14Fën anāi kūön anga-aṅ tö kikōnyö lūöi anāi inrē yik kūön yik kūön, yik mi-uk tösat anāi kūön kötta, hëvhör samyeūheu anga-aṅ nö hayöngö Israĕl. 15Kapah ngaich Aptòn ök kikōnyö kūön Hīlel ök aṅ Piratön, ngaich lāpi nö i Piratön i panam Ifrēm, ip rung panam Amalek.
Currently Selected:
KAMHÔKA 12: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
