KAMHÔKA 14
14
Sëmsön Tök Kikānö Aṅ Timnā
1Ngaich kiröönngöre Semson nö chuh Timnāt, ngaich meuk ök kikānö hĕng tak i Timnā aṅ i yik kūön aṅ Filistain. 2Yih ngaich anga-aṅ, ngaich vë-enynang ök kikōnyö yöngre tök kikānö yöng ò inrē, nö ngö ṙô, Meuk öp kikānö chin hĕng tak i Timnā aṅ i yip kūön yip Filistain yēh kē an lökten nö pīhö chu. 3Ngö ṙô pöri tö ò ök kikōnyö yöng ò, ök kikānö inrē yöng ò, öt hĕng tak hòng kikānö in yip kūön hanöng kisānö meh, hēk in yip; tarik chu nö ṙòkhöre, töp lökten meh hòṅ kē pīhöre tö aṅ in yip töttunyīnyi Filistain? Ngaich ngö ṙô Semsön tök yöngre kikōnyö, Kē an nö pīhö chu, tön hāngenlōn chin tö ò.
4Hö-ö pöri ök kikōnyö yöng ò tök kikānö yöng ò inrē nö akahalōn tö e nö aṅ im Mā Tēv; pò ò nö lukkö chöö-önyre nö lā-al yip Filistain: hē e yik aṅ Filistain nö hayöngö Israel.
5Ngaich kiröönngöre Semsön, nö i Timnā, tök kikōnyö yöng ò tök kikānö yöng ò inrē, ngaich yihtöre nö ik panô-òṅ vain i Timnā; yĕh meuk, hĕng nòng ök tö-ayal lāyön tö pōitô nö siṙöpan. 6Ngaich ök ma-alaha aṅ im Mā Tēv nö kalēḵ nö teungtöre nö i kui ò, chiṙësan ngaich anga-aṅ nöng sā tīre tö kun pököre, öt aṅhaṅv eltī anga-aṅ inrē: öt vë-eny nang ök kikōnyö yöngre pöri anga-aṅ hēk ök kikānö yöng ò tö tīre. 7Ngaich kiröönngöre anga-aṅ, ngaich vë-ekūö ök kikānö, ngaich Semsön nö hāngenlōn takô tö ò. 8Rĕhrô-angen anga-aṅ ngaich havantöre nö kē an, kānngöre ngaich anga-aṅ nö ngëich kö ök tökapah alaha ök lāyön: yēh meuk, kitēumhak nuk pī nö i alaha ök lāyön hönī inrē. 9Kē-ē e ngaich anga-aṅ nö eltīre, kiröönökūöre, ngaich, höng nyanāngöre nö kiröönngöre, chalô anga-aṅ ngaich nö ik yöngre kikōnyö ik yöngre kikānö inrē, ngaich kē-ĕkūö cha, nyā-aṅvkūö cha-a ngaich: öt vë-enynang cha pöri anga-aṅ tö ök hönī nö kahë ò nö i alaha ök lāyön.
10Kiröönngöre ngaich ök kikōnyö yöng ò nö ik kikānö: vī tökirög nyā-aṅ ngaich Semsön: pòn ngatī vē ṙāl tarik, 11Ngaich, hē cha nö meūkan, ngaich lūöi anāi yik tökētu nö hol ò tö cha. 12Ngaich ngö ṙô Semsön tö cha, Yĕh töich hatūtö yīö tö chīl: yē yīö min kônyô tö e in chu i el tösat sumkam ngih tökiröng nyinā-aṅ, ngaich kôtökūö tö e, ngaich lūöi anāi tī chū-ö min tö linen hilā kinṙum lūöi anāi inrē tövai hilā: 13Yē yīö pöri öktô ve-eny e in chu ngaich lūöi anāi tī yī-ö min tö linen hilā kinṙum lūöi anāi inrē tövai hilā. Ngaich ngö ṙô cha-a tö ò. Yēh ṙā-nyö öp chīlre man, hòṅ ih hāngö e. 14Ngaich ngö ṙô anga-aṅ tö cha, Löknyö im kamā nö yih ngam nyā-aṅkūö, löknyö im tökalēḵ nö yih ngam pinchākö. Ngaich cha-a nö ötkônyô tö ngam chīl i ël tölūöi sumkam.
15Ngaich im sinātö sakāmö, nö ngö ṙô cha-a tök pīhö Semsön, haṙöinyô öp pīhöre man, hòṅ ò nö ve-eny nang ih tö ngih chīl, hòṅ ih öt föngtökūö meh, föngtökūö patī öp kikōnyö yöng meh inrē: töng havëka ṙöng öi tö yīö icheū-a? Röhṙöng öng nö tö ngatī? 16Ngaich ök pīhö Semsön nö peuny nö i kūö ò, nö ngö ṙô höng kunyaha-elmat man tö chu, öt hāngenlōn inrē tö chu, kēnyö chīl man in vē kūön vē tarik chu, ngaich rö-ö me-eṅ ve-enynang chu tö e. Ngaich ngö ṙô anga-aṅ tö ò, Yĕh meuk, öt ve-eny e chin ip yöng re kikōnyö öt rēhĕn ip yöngre kikānö, ngaich ve-eny e hòng min chū-ö in meh? 17Ngaich anga-aṅ nöng pameuiny nö i kūö ò nö sat sumkam, i rô-òten ngam tökiröng nyinā-aṅ nöng peuny nö i kūö ò nö sat sumkam, i rô-òten ngam tökiröng nyinā-aṅ: ngaich im sinātö sakāmö, anga-aṅ nö ve-eny nang ò, pòn kalē-ĕ ṙô nö līpnyô ò: ngaich anga-aṅ nö vënyö ngam chīl nö in yik kūön yik tarik ò. 18Ngaich yik tarik aṅ elpanam nö ngö ṙô tö ò im sinātö sakāmö urēhĕkūö maneuttö ngam tavūöi, Suh ap töyahlö pinchākö tö hönī? Suh inrē öp tömötlö kumlēḵ tö lāyön? Ngaich ngö ṙô anga-aṅ tö cha, Yē yīö öt hakeunlö ngam kun nuā chu tö ngam kunköh tumlat,öthō öre yī-ö kôtökūö tö ngam chīl chu. 19Ngaich ngam ma alaha aṅ im Mā Tēv nö kalēḵ nö teungtöre nö i kui ò, kiröönngöre ngaich anga-aṅ nö chuh Askēlòn ngaich lūöi anāi yik tarik aṅ in e töfëlö tö ò kē-ĕ ngaich nuk hilā cha kētu inrē nuk tövai hilā nö in cha yik tökônyô tök chīl. Ngaich ök tanāinyö ò nö hūlökūö, chuh patī ök yöngre ngaich anga-aṅ kikōnyö. 20Kētu pöri ök pīhö Semsön nö ik nôlö ò, ök hol ò sin.
Currently Selected:
KAMHÔKA 14: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
