KAMHÔKA 11
11
1Ngaich ang Yefta ök aṅ Kilīöt nö tökalēḵ nö tarik töt pa-ekūö, kikōnyö ök kūön mi-inyihköre: hakūönten Yefta ang Kilīöt. 2Ngaich ök pīhö Yefta nö kayôngö kūön ò tö yik kikōnyö; ngaich hē yik kikōnyö kūön ök pīhö ò nö kiröng, ahôngen Yefta ngaich cha-a, nö ngö ṙô tö ò, Uh man amīnu i patī öp kikōnyö yöng ih, tön kūön tahëng tak man kikānö. 3Meutngö ngaich Yefta nö ṙā-ang in yik hanöng kisānöre, ngaich iyöng i panam Tòp; hamūltöre ngaich nö in Yefta yik tarik tötkô-en, hol ò cha-a ngaich nö kiröönköre.
4Ngaich unôich rĕh rô-angen yik kūön Amön nö kiyung nö lā-al Israĕl. 5Ngaich angū-ö nö ngö, hē yik kūön Amön nö kiyung nö lā-al Israĕl, ngaich yik mā-aṅ Kilīöt nö kiröönngöre nö kē-ĕren Yefta nö ṙā-ang i panam Tòp: 6Ngö ṙô cha-a ngaich tö Yefta, Tā-a yöngkūö ih man, hòṅ hī kiyung lā-al yip kūön Amön. 7Ngaich ngö ṙô Yefta tö yik mā aṅ Kilīöt, Röh öi misī surīkhen chu, ahōngen chu inrē ṙā-ang patī ök yöng chu kikōnyö? Kūöyòh öi pökeh yih in chu töngamuh hē yīö el kanihngen? 8Ngaich yip mā aṅ Kilīöt nö ngö ṙô tö Yefta, Lökten in töngamuh hēk havöölö kūöre in meh, hòṅ meh kiröönngöre in ih, öm kiyung lā-al yip kūön Amön, ngaich më-eṅ inrē yöngkūö ih öi ṙòkhöre aṅ Kilīöt. 9Ngaich Yefta nö ngö ṙô tö yik mā aṅ Kilīöt, Yē yīö kēten chu hēk i patī öich kiyung lā-al yip kūön Amön ngaich kēten cha min ngam Mā Tēv nö i kūö chu, yöngkūö yīö hòng chū-ö min? 10Ngaich ngö ṙô yik mā aṅ Kilīöt tö Yefta, ngam Mā Tēv An min mameuk ihôi hī; öthō nö öt sā ṙô meh ngaich ngatī tī min īhö. 11Kiröönngöre ngaich Yefta nö in yik mā aṅ Kilīöt, ngaich yik tarik nö vīlen ò nö yöngkūö mā inrē nö in cha: ṙô-òny nup ṙôre inrē Yefta nö i kūö ngam Mā Tēv nö i Mispah.
12Tīnngö ma-ahānga ngaich Yefta nö ik rācha yik kūön Amön, nö ngö ṙô, Suh ap la-en meh in chu, tö meh yih in chu kiyung lā-al ngih panam chu? 13Ngaich ök rācha yik kūön Amön nö sap ṙô yik ma-ahānga aṅ in Yefta, Pò Israĕl nö kē ap panam chu, hē ò nö yih nö ṙā-ang Aikup, löktökūö Arnòn söl Yapòk, Yôtön inrē: yĕh pöchö lökten havanten u hēk nö lām. 14Ngaich hēk Yefta nö tīnngö ma-ahānga nö ik rācha yik kūön Amön: 15Ngö ṙô anga-aṅ tö ò, Ngö ṙô öp Yefta; öt kē panam Mô-āp ap Israĕl, öt rēhĕn tö panam yip kūön Amön; 16Hē cha pöri nö yih nö ṙā-ang Aikup, ngaich Israĕl nö lök eltönyalnyi ip mai Ētöm, ngaich yih nö i Katēs; 17Tīnngö ma-ahānga ngaich Israĕl nö ik rācha Ētöm nö ngö ṙô, Vë-ekūö meh chin, hökngen chu lök im panam meh: öt hang pöri öp rācha Ētöm. Ngatī inrē anga-aṅ nö in öp rācha Mô-āp nö söömtö ṙô: Sōḵ pöri anga-aṅ: ngaich höngngöh Israĕl nö i Katēs. 18Ngaich anga-aṅ nö lök el tönyalnyi, havī ngam panam Ētöm inrē tö ngam panam Mô-āp, ngaich yih nö löktö lā chuhöt ngam panam Mō-āp, ngaich acha-a nö vītö chūökre nö ip tahëng lā kaha Arnòn; rö-ö pöri cha-a nö yih nö lā el öp kūöngö Mô-āp, pò Arnòn nö kūöngö Mô-āp. 19Ngaich tīnngö ma-ahānga Israĕl nö in Sīhòn öp rācha yik Amôr, ök rācha i Hespòn; ngö ṙô Israĕl tö ò, Vë-ekūö meh in, hökngen ih lök im panam meh öi chuh im chūökre. 20Hö-ö pöri Sīhòn nö ṙātö ellōnre nö in Israĕl, nö lök im kūöngö ò: hamūl yik tarikre pöri Sihòn nö ṙòkhöre, ngaich iyöngtöre nö i Yāhas, ngaich kiyung nö lā-al Israĕl. 21Ngaich ngam Tēv Israĕl, ngam Mā Tēv, nö kēten Sihòn tö yik tarik ò inrē nö ṙòkhöre nö eltī Israĕl, fëlngen cha ngaich acha-a; lökten Israĕl nö amīnu töm panam yip Amôr, tö yip aṅ ngam panam angū-ö. 22Keuheūtlöre amin cha-a ngaich tö ngam kūöngö yik aṅ Amôr, löktökūö Arnòn söl Yapòk, löktökūö ngam tönyalnyi söl Yôtön. 23Lökten ngam Tēv Israĕl, ngam Mā Tēv nö öt amīnu tī tö yip aṅ Amôr nö i kūö yip tarik ò Israĕl, ngaich hòṅ amīnu hòng më-eṅ tö u? 24Röh öm öre më-eṅ amīnu töp kahëtö ngam Tēv meh Kimòs nö in meh nö amin meh? Lökten yip töṙā-aiṙen tö aminre tö ngam Tēv ih ngam Mā Tēv nö i kūö ih, ngaich amin ih anū-ö. 25Tö ĕhten öm më-eṅ tö Pēlak ök kikōnyö kūön Sīpòr, rācha aṅ Mô-āp? Hĕng heuh ök anga-aṅ nö lā-al Israĕl, hēk inrē hĕng heuh ök nö kiyung nö lālö cha? 26Irô-òten Israĕl nö iyöng Hespòn ël nup elpanam e inrē, i Arō-er tö nup elpanam e inrē, i nup tökiröng elpanam tötöökhakṙen nö lā kaha Arnòn, nö lūöyòng samyeūheu: kūöyòh öi misī öt havāngngö u i ël e angū-ö ṙētak. 27Lökten chin chū-ö öt köölö fālen in meh, më-eṅ pöri tövaich in chu öm kiyung lā-al chu: ngam Mā Tēv An, ngam ma-akah fālen, anga-aṅ An yēḵ ma-akah fālen töngamuh ihôi vē kūön Israĕl tö vē kūön Amön. 28Hö-ö pöri ök rācha yip kūön Amön nö hang minë ṙô Yefta minë sahöömtö ò nö in ò.
29Teungtöre ngaich ngam ma-alaha aṅ im Mā Tēv nö i kui Yefta, havāngngöre ngaich anga-aṅ tö Kilīöt tö Manasē inrē havāngngö kui Mispah inrē öp i Kilīöt, ngaich ṙeū-eung Mispah öp i Kilīöt anga-aṅ nö havāngtöre nö in yik kūön Amön. 30Ngaich Yefta nö kilēḵngôre nö chūöku ṙô nö im Mā Tēv, nö ngö ṙô, Yē meh min kô-en kēten yip kūön Amön nö eltī chu, 31Ngaich mīnö, öp töng kumnyī-inyre nö löknyö nup inkūp öp patī chu nö höngkūö chu, yē chu havan ip lanāmö ṙā-ang in yip kūön Amön, ngaich anga-aṅ min nö minë-eny ngam Mā Tēv, kēten ò chū-ö min nö töföngö tökētu. 32Havāngngöre ngaich Yefta nö in yip kūön Amön nö kiyung nö lā-al cha; ngaich ngam Mā Tēv nö kēten cha nö eltī ò. 33Fëlö cha ngaich anga-aṅ löktökūö Arō-er söl i Minit, nët anāi nup tökiröng elpanam, söl i Apĕlkëramin nö pōihangvah. Ötkô ngaich yik kūön Amön nö i kūö yik kūön Israĕl.
Kikānö Kūön Yëfta
34Yih ngaich Yefta nö i Mispah ip patī ò, ngaich meuk ök kikānö kūönre nö kunyī-inyre nö höngkūö ò nö holtö timpöröl nö kiṙīöm; töng hĕng maneuk ök nö kūön ò; öt hōlu anga-aṅ tö kūön ò tö kikōnyö öt rēhĕn kikānö. 35Ngaich hē ò nö meūkan, tikaichngö inyut re ngaich anga-aṅ, nö ngö ṙô, Aōla, kūön chu kikānö! tumṙeūtu chin ngaich tö meh lā taṙeū. Ngaich man inrē sā cha yip mahakihten chu: pò chu ngaich vā-anykūöre im Mā Tēv, ngaich ötkô öich heūlritre. 36Ngaich ngö ṙô anga-aṅ tö ò, Kayöngö, ngaich man vā-anykūöre im Mā Tēv; tinī-iv man yēḵ ngaich tö chu sā öp lamöknyö elvāng meh; sā ngam Mā Tēv nö havahalvah meh nö in yip lā-al meh, yip kūön Amön. 37Ngaich ngö ṙô anga-aṅ tök yöngre kikōnyö. Hökngen ngih yēḵ nö hateūngi nö in chu; hökngen chu nët chumngëṅtö höng hĕngtöṙah, hòṅ chu kiröönngöre chuh kui minë rôngö, öich haram ngih rinëlöre, tö yip nôlö chu inrē. 38Kuṙòh, ngö anga-aṅ ngaich. Tīnngörit ò ngaich anga-aṅ nö nët hang chumngëṅtö, kiröönngöre ngaich anga-aṅ, tö yik nôlö ò inrē, ngaich haramngörit ngam rinëlöre nö i kui rôngö. 39Ngaich hē minë tönët nòng chingëṅt nö keuheūten, havantöre ngaich anga-aṅ nö ik yöngre kikōnyö, ök tö tinī-iv tö ò sā ök töchūöku kinlēḵngô ò: öt akahakūö anga-aṅ tö kikōnyö. Kētöre ngaich angū-ö nö kui panam nö in Israĕl. 40Tö yip kikānö kūön Israĕl nö kaheuk samyeūheu nö afēken öp kikānö kūön Yefta aṅ Kilīöt fën sumkam i töhĕng samyeūheu.
Currently Selected:
KAMHÔKA 11: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
