Isayā 9
9
1Hö-ö pöri min nö tin ūnnguṙen nö umuh nö in ò öp mī-im miṙivlōn. Ik lā-urĕh misī anga-aṅ nö minūöṙô tö ngam panam.
Öp Rācha Min Yamih
Sepulön panam Naftalī inrē; lā unôich pöri anga-aṅ nö vīlen e nö tövai, ip talöökö i kūö mai, lāmuh tö Yôtön, i Kelelī yip tahëng mihëṙö tarik.
2Meuk yöng hanātö yip tarik lamök el singūlö: yang ngam hanātö nö i kui cha yip mi-iyöng elnyat kinpaha.
3Ngaich man ṙūölö ṙôken pumnāmö tarik, ngaich man ṙūölö ṙôken ṙanāmölōn cha: ṙāmölōn yin nö i kūö meh sā ṙanāmölōn mahamūl ṙòng taneūch re, sā ṙanāmölōn tarik yē cha nö michö-ö tö pôḵ re.
4Pò ngam kaneun lumngan ò, ngam el ranôṙö ò inrē kaneun, ngam kaneun inkihten ò, nö ngaich nö liköli tö meh nö sā ök sakāmö hē yik aṅ Mitia.
5Pò nup lanaklö yip tarik kumyung el tinṙōlen tömaṙôngö, nup inyut inrē nö māchngö tö mahām, ngaich min nö töng föngiyö, nö ngòh kūö tameūyö.
6Pòn in hī öp hĕng tak nyīö nö fötnyu, in hī öp kikōnyö nyīö hĕng tak nö kētu; ngaich elranôṙö ò min öp inyöngö: kaheūkö inrē min öp mine-eny ò nö Pinngangkūö, Mahalēn, Tēv Tökeuheūttöre Chöngö, Yöng Tö-örheūheu-aṅ, Rācha kūö Lanāmö.
7Aṅ im töṙūölöng ṙôken inyöngö aṅ im lanāmö inrē nöng öt chanūhuvṙen, nö el kantēra Tāvit, i kui ngam pūlngö ò inrē, nö haköpngö e, ṙapkö e inrē nö aṅtī tö inkaha fālen aṅtī tö lanöökö inrē löktökūö ing töngamuh höng örheūheu. Ngam kumlēḵlōn aṅ im Mā Tēv yip tömaṙôngö min mahateungten e.
Chökṙen Israel An Min Ngam Mā Tēv
8Söömtö ṙô an ngam Mā nö in Yāköp, ngaich teungtöre angū-ö nö i kui Israĕl.
9Ngaich ṙòkhöre min tarik nö akahalōn, Ifrēm tö yip aṅ Samarīa inrē, yip mahakeūlô re i ngane-eṅ ellōn re inrē, nö ngö ṙô,
10Taṙöli nuk īt, vīlö e pöri min ayī-ö nö ihong tö töfāsö: kūöltu nup nö ngaich sikamôr chōn, haṙī-ing u pöri min ayī-ö tö sitör chōn,
11Lökten an ngam Mā Tēv min nö ha-ūichtö öp lā-al ò nö lātulöng öp lāḵlö Rēsin, ngaich haruhlö alaha yip tökunyaha elmat tö ò;
12Lā kūö yip aṅ Siria, lā unôich yip aṅ Filistain; ngaich cha-a min nö ngeūkten Israĕl nö vā-akakūö. Pòrô angū-ö ngih ngaich ngam lanīnö ò nö öt havööṙikūö, ṙòngmöng teuthak pöri ngam kël ò.
13Sönngenre yip tarik nö öt havöötökūöre nö in ò ngam famôhò cha, öt rēhĕn cha-a nö chöh ngam Mā Tēv yip tömaṙôngö.
14Lökten an min ngam Mā Tēv nö rökngö kui Israĕl rökngö lamrit ò inrē, ṙal tö talëḵ kachūr fangngö chōn el silāng inrē, nöng hĕng sumkam tī.
15Anga-aṅ an kui yip mā misī mā tarik inrē; tö yip pròfĕt inrē mahaköp tö minyôiny-aṅ, anga-aṅ an lamrit.
16Pò cha yip mahachōḵ kūö vē tarik nö vīngen cha nö vāchö kū-ö; ngaich cha-a yip töhachō-o kūö tö cha nö lëlngö
17Lökten an ngam Mā min nö öt ṙāmölōn nö in yip ṙāl tarik cha, öt rēhĕn min anga-aṅ nö aṙē-ĕlōn nö in cha yip kūönyōich cha tafīösi inrē: pòn ṙòkhöre nö chōich töla-evṙen inrē tö tötlöök, ṙòkhöre elvāng inrē nö ṙô tö kumlō-ov, kūö në nö ṙòkhöre ngam lanīnö ò nö öt havööṙikūö, ṙòngmöng teuthak pöri ngam kël ò.
18Pò ngam öt lanöökö nö öktikūö nö sā tameūyö; ngaich an nö ṙāpngökūö tö nup töchökhu kaha chōn; hòṅ öktikūö an tö nup töyul elinchōn, ngaich anū-ö nö tafūönlöng lul nö kū-ötö lātulöng nö el tökufëi taṙul.
19Ökngö an ngam panam kūö lanīnö ngam Mā Tēv yip tömaṙôngö: ngaich yip tarik inrē nö sā ngòh kūö tameūyö; öt tarīkuvö ṙamā-al hanöng kisānö re.
20Hĕng tak min kumchötngö lā hāmö eltī, ngaich nöng aheuk; ngaich nyā anga-aṅ nö lātavē eltī re, ngaich hö-ö cha-a min nö tööḵngen: höng kö kā alaha takeun kël re yip min tarik:
21Manasē Ifrēm; Ifrēm inrē Manasē: hol re cha-a min nö lā-al Yūtā, kūö në nö ṙòkhöre ngam lanīnö ò nö öt havööṙi kūö, ṙòngmö teuthak pöri ngam kël ò.
Currently Selected:
Isayā 9: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
