Isayā 10
10
1Tötkôlò yip cha-a mahachöngten tötlöök chöngö, yip kamūich inrē kamūich tö ötlöök;
2Nö halō-ongkūö yāich tö ngam inkaha fālen, kēngö mikahlōn yip yāich tarik chu inrē, pòn hōtu yip tafiösi nö pôḵ cha, hòṅ cha inrē nö vīten yip kūönyōich nö kā-ai tö cha!
3Suh öp min la-en yīö ip sakāmö chinöhkö, im inlëlngö inrē yamih min nö ṙā-ang tömarôvat? In chīö öi min falkö hinòlṙen re? Isuh tī öi min ṙāngö ngam ineū-eu yīö?
4Höng sōnngöre yin min elkatòh yip tökē-ĕ, fukhu kui min inrē tö yip töfëli. Kūö në anū-ö öp lanīnö ò nö öt havööṙi kūö; ṙòngmöng teuthak pöri ngam kël ò.
Chëhëtī Ngam Tēv Öp Mahayöngö Asirīa
5Mah yī-ö aṅ Asiriā, chanökṙen aṅ im lanīnö chu, tö-aṅhav eltī tö ngam tinkung lanīnö chu!
6Tīnten ò chin min nö lā-al öp töchōich pumnāmö tarik, lā-al yip tarik chūök lanīnö chu öich kētö chöngö ò min, nö kēḵ pôḵ re, kēḵ kāḵ re inrē, rööntö kui cha inrē sā tilin el nup talöökö.
7Hö-ö pöri anga-aṅ nö hòṅ ngatī tī, öt rēhĕn öp ellōn ò nö ngatī, ellōn ò pöri angū-ö ngam tinṙōlhanga, rinökngen pumnāmö tarik inrē öt kūöṅ nen.
8Pòn ngö ṙô anga-aṅ, Hö-ö yip kūön rācha in chu nö ṙòkhöre nö rācha cha?
9Röh öp Kalnō nö sā Karkimes? Röh öp Hamat nö sā Arpat, röh öp Samaria nö sā Tamāskös?
10Sā ngih kël chu nö vīten nup pūlngö insātēv nup tövai töka-īpö insā i Yērusalem i Samaria inrē;
11Hö-ö öich min sā tīre tö Samaria tö nup insātēv ò inrē, öich ngatī tī tö Yērusalem tö nup insātēv ò inrē?
12Lökten an min nö ngö inlahen, hē ngam mā nö hateungngö la-en re nö i kui rung Siyôn i kui Yērusalem inrē, chöhken öp kūön öp rācha aṅ Asiriā chin min öp tö ngë-eṅ ellōn, öp ineū-eu öp chin-eūṙökūö ò inrē.
13Pò ò nö ngaich nö ngö ṙô, I kumlēḵ kël re chin keuheūten ngaich tö e, i mikah chu inrē; pò chu tö-akaha: ngaich chin inrē kēngö kūö panam yip tarik, ngaich inrē öich ulāingen cha tö nup chehen cha, ngaich kumten cha chū-ö inrē öich sā tökalēḵ tarik yip amūchhak nö el kantēra rācha:
14Ngaich ngam eltī chu inrē nö kôtökūö tö ngam fôngö kanôlò yip tarik: sā öp töhĕng tak inrē mahamūl nup uhöö töng ṙā-ayö, ngatī tī öich hamūl në tumlat; ngaich öt hĕng tak umuh mahanyāṅknyö sanëôk re, hēk vamā-any kūö re, hēk öp tö sā ṙô chehechōn.
15Eū-eure ang ṙung ngam hanīöng nö in ò ngam tö aṅhavtī tö ò nö fung? Hapōilöre hòng ngam ṙanat nö in ò ngam ṙamat tö kūö ò? nö sā öp chōn nö kiyanngö re nö ip chamātlöre, hēk inrē sā öp tinkung chamātlen ò öp töt chōn.
16Lökten an min ngam Mā, ngam Mā yip tömaṙôngö, nö söömtö lanëvö in yip tökiröng alaha; ngaich ṙënngen ngam ineū-eu ò min nö tōttukūö nö hū nö sā hanūkūö tameūyö.
17Ngaich ngam hanātö Israĕl min nö tameūyö hanūkūö inrē ngam Töhĕng Töhet in ò: ngaich angū-ö min nö ökti tī ngaich haṙāpngö nup töchökhu kaha chōn nöng hĕng sumkam.
18Ngaich anga-aṅ min nö ṙāpngö kūö tö ngam lanöökö öp el inchōn ò, tö ṙòng aṅ taṙeūḵ ò inrē, hĕnghöre nômö alaha inrē: ngaich angū-ö min nö sā öp kumṙapkö pantēra nö tayē alaha.
19Ngaich öp chööḵ nup chōn ò el inchōn nöng rahëchtitṙen min, nöng kô-òre tī min öp nyīö nö kūichö u.
Haroh Tumtit Taka Min Yip Mahavan
20Ngaich ngö inlahen angū-ö min ip sakāmö angū-ö, tö yip chööḵ Israĕl, cha-a inrē yip töt kô-òng vah aṅ patī Yāköp, nö öt köpen min nö lātulöng töp famëlö cha; im Mā Tēv pöri min nö köp, ngam töhet aṅ Israĕl, nö im kanô-en. 21Havan yip min chööḵ, yip chööḵṙen Yāköp, nö im tökalēḵ Tēv. 22Pôn pòrô më tarik Israĕl nö sā kuyāyö mai, höng yip chööḵṙen cha min mahavan: kalēḵ öp kinheūtngö vah, taṙēchlöngö nö holtö lanöökö. 23Pò ngam kinheūtngövah, ngam tökalēḵ lōn inrē, ngam Mā min, ngam Mā Tēv yip tömaṙôngö, nö vīlö e nö ellōn ngam tumlat.
Chökṙen Asirīa Min Ngam Mā Tēv
24Lökten an ngam Mā nö ngö ṙô, ngam Mā Tēv yip tömaṙôngö, Ō yī-ö tarik chu mī-iyöng Siyôn, uh yin pa-ekūö tö yip aṅ Asiriā: pòrô anga-aṅ min nö hachökö meh nö aṅtī tö chōn, ngaich hanyāṅklöp aṅtī re nö in meh nö sā inlahen yip aṅ Aikup. 25Tön höng rahëchtöreṙen, ngaich ngam tökiröng lanīnö min nö hateungtukūö, ngam tanānyö min nö hateungtukūö, ngam tanānyö chu inrē, nö ip tinṙōlngö cha. 26Ngaich ngam Mā Tēv yip tömaṙôngö min nö haruhlö alaha lā-al ò tö aṅtī famòh, sā finëlngö yip aṅ Mītia nö ip ihong Ôrep: ngaich öp tinkung ò min nö i kui ngam mai, ngaich hachônglen ò min anga-aṅ nö sā inlahen tī yik aṅ Aikup. 27Ngaich ngö inlahen angū-ö min ip sakāmö angū-ö, tö ngam tayuk ò min nö kē-ĕngre nö ṙā-ang el ranôṙö meh, ngam kaneun ò inrē nö ṙā-ang i likeun meh ngaich ngam kaneun min nö laköli tökūö finòhtö tavī-i.
Kuhēt Më Lā-al
28Kiröönngöre ök, ngaich tölngö Rimmòn, yih anga-aṅ nö i Ayat, lökngö Mikrōn anga-aṅ; afônglö nup inṙung chehen re anga-aṅ nö i Mikmës.
29Ngaich yik nö havāngngöre nö el talöökö; iyöng töre yip nö ngaich nö i Kipā; kayīna öp Rāmā; falngöre ngaich ngam Kipiā Sôl.
30Pōitô man hū-a, Ō më-eṅ kikānö kūön Kāllim! Hangihtöre, Ō Laisah! Ō me-eṅ yāich Anatôt!
31Ma-afalngöre öp Matmenah: hamūlöre yip aṅ Këpim nö falngöre.
32Sökngöre öp min nö i Nòp ip sakāmö: aṅtī tö kël re anga-aṅ nö harutkö ngam rung ngam kikānö kūön Siyôn, ngam rung Yērusalem.
33Yĕh meuk, ngam Mā Tēv yip tömarôngö, nö ṙalngö nup pak min nö aṅtī tö pinhe-eṅkūö kūöltu nup min tömarôlòng, tumṙeūtu min nup tökūöltu kui.
34Ngaich anga-aṅ min nö kusehngö nup töyul elinchōn nö aṅtī tö vët, fukngö min ngaich Lepanön tö tī öp tökalēḵ.
Currently Selected:
Isayā 10: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
