Isayā 8
8
Ök Kūön Īsayā Nö Minkahngö Nö I Më Tarik
1Ngaich ngö ṙô ngam Mā Tēv tö chu, Hēngö kahë man tö tökiröng tömitāk ihong, ngaich kūich mat e aṅtī tö kanūich tarik, löö in Mahersalālhaspās; 2Ngaich chū-ö min kēḵ tökô-en vamë-eny maheukre nö kūichngen e, Uriyā ök kūönṙô, Sakarīa inrē öp kikōnyö kūön Yeparikiā. 3Ngaich chū-ö chuh ip kikānö pròfĕt; pirūkö nyīö ngaich anga-aṅ kayôḵnyö kikōnyö nyīö ngaich. Ngaich ngö ṙô ngam Mā Tēv tö chu, Kaheuk mine-eny ò nö Mahersalalhaspās. 4Pòn urēhĕkūö ngam nyīö min nö huveū-euṙô nö ngö ṙô, Yöng chu kikōnyö, ane inrē, yöng chu kikānö, ngaich nup kanôlò aṅ Tamāskös, nup tökīlö inrē Samarīa min nö kē-ĕyö urēhĕkūö ngam rācha aṅ Asiria.
Yanīhi Ngam Rācha Aṅ Asirīā
5Hēk ngam Mā Tēv nö vë-ekūö chu; nö ngö ṙô, 6Pò vē tarik nö sō-o minë mak Sailoh töṙēmö röön ngaich ṙāmölōn nö in Rēsin ök kikānö kūön Remalaya; 7Lökten, yĕh meuk, kēten minë mak an ngam Mā nö i kui cha aṅ ngam Tahël, tökalēḵ töpōyen inrē, anga-aṅ öp rācha Asiria nö im minā-aṅ ò: Ngaich anga-aṅ min yamih nö lök el nup pak e, ngaich havāngngöre min nö i kui e: 8Ngaich anga-aṅ min nö lāp röön re nö chuh Yūtā; taṙēchlöngö min anga-aṅ nö lökngö umuh; söllö min anga-aṅ nö i likeun, ngaich ngam innyāṅknyö saneòk ò min nö töö-öl tī tö ṙôktö ngam panam meh, Ō Immanuĕl.
9Ayôṙa yin, Ō yī-ö tarik, ngaich yī-ö min panyeny öi liköli; kētö elnangre inrē, ṙòkhöre yī-ö aṅ nup tö marôvat panam: nyëk ṙat re yin, ngaich yī-ö min panyeny öi liköli.
10Halēnöre holṙen re, ngaich angū-ö min nöng öt teunglen; ṙô-òv tö ngam ṙô, ngaich öt köp min angū-ö: pò ngam Tēv nö in hī.
Ṙô Ngam Mā Tēv Nö In Ök Prôfět
11Pòn ngö ṙô ngam Mā Tēv tö chu nö holtö kumlēḵ këlre, ngaich haköpten chu inrē öich sōḵtu lök talöökö vē tarik, nö ngö ṙô, 12Uh yin ngö ṙô, Inmūlngö töchōch lōn, nup ṙô vē tarik min, uh yī-ö rēhĕn vöö tö e. 13Ngam Mā Tēv yip tömaṙôngö, anga-aṅ ahetlö yīö hökngen Ò nö anga-aṅ pinhe-eṅkūö yīö, hökngen Ò inrē nö anga-aṅ vanööṙö yīö. 14Ngaich anga-aṅ min nö töhet chūök; Ihong pöri nö kinvē-ĕre, tökiröng ihong inrē nö löknyö fālen nup patī Israĕl nö nët re, nö insuk tinngöp yip aṅ Yērusalem inrē. 15Ngaich maṙôngö min tökavēköti nö umuh, fukngö, ngaich oh, tingöpö inrē, ngaich kē-ĕ.
Ṙô, Un Chöh I Tökapah
16Nyëklö ngam chöngö man, hapanngö ngam inköphöti inrē in yip haköp tö meh. 17Hòṅ hökkö ngam Mā Tēv chin, ngam mahanyatngö kūö re tö ngam patī Yāköp, chôngken ò chin min. 18Yĕh meuk, tö chu tö vē nyīö inrē kahëtö ngam Mā Tēv nö in chu nö minkahngö pinngangkūö inrē nö in Israĕl aṅ im Mā Tēv yip tömaṙôngö öp mī-iyöng i kui rung Siyôn. 19Ngaich yē cha nö ngö ṙô tö yīö, Chöhtö mameuk ma-alaha in cha i yip tömilūönö inrē, yip töchëṅcha ṙô, tökūönti ṙô inrē: hö-ö hòng tarik nö hòṅ chöh ngam Tēv re? Chöh i tökapah ṙöng cha-a nö tö-aṅ? 20Im inköphöti yĕh im chöngö inrē! Yē cha nö öt asā ngih ṙô ṙô nö ṙô-òv, kô-òngrit yip min cha-a nö töt peuheū-euvö:
Hē El Kanihngen
21Ngaich lökngö in e min cha-a, ötkô nö halöinyköre kapahare inrē: ngaich ngö inlahen angū-ö min, hē cha nö kapahare, ngaich cha-a min nö kapahare, ngaich cha-a min nö hakihtenre, ötlēkôre inrē tö ngam rācha re tö ngam Tēv re inrē, ngaich tuvööklö kūöre cha-a nö lātulöng: 22Ngëchkö el tumlat min cha-a inrē, ngaich meuk, kanihngen singūlö inrē, sinngultö miṙivlōn inrē; ngaich ahōṙi min cha-a nö el tökufëi sinngūlö.
Currently Selected:
Isayā 8: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
