Isayā 63
63
Minhòiyö Ngam Tēv I Kui Pumnāmö Tarik
1Achīö ang ngòh yamih nö ṙā-ang Ētöm, töngāṅvö mat inyut ṙamā-ang Pòsrah, ngam tövai nö im inyutre, kiröönngöre an nö i ṙôkö kumlēḵ re? Chū-ö chin tö ṙôtö lanöökö, tökalēḵ hayööken.
2Kūöyòh öng ngam inyut meh nö ngāṅvö mat, ngam hilā meh inrē nö sā mat hilā ramöön kinrān vāin?
3Höng hēngö röön chin röön ngam kinrān vāin öt hĕng tak hol chin inrē tö aṅ in yip tarik; i tanānyöre chin rööntö kui cha i lanīnö re inrē öich kirāichtö kui cha; mahām nômö cha an ngam tökachenyköti nö i mat hilā chu, keuheūtngöre mat an nö ngaich ngam hilā chu nö paṙòk.
4Pòn ellōn chu ngam sakāmö invahalvah, ngaich nö yih inrē ngam samyeūheu ṙinānyi tö chu.
5Ngëicha chū-ö ngaich öt hĕng tak töhòṅ holṙen; pingangkūö chū-ö ngaich, pòn öt hĕng tak ṙamāpa: lökten ngam kël chu nö kētö minhôiṅyö chu, ṙapken chu inrē ngam lanīnö chu.
6I tanānyöre chin rööntö kui yip tarik, mihiyōingen cha chin tö ngam lanīnöre, ngaich vōknyö mahām nômö cha nö el tumlat.
Lanöökö Ngam Tēv Nö I Kui Israel
7Hòṅ kakkö hanāngen neūkölōn ngam Mā Tēv chin, ineū-euṅ ngam Mā Tēv inrē sā ṙôken tī ngam Mā Tēv nö kē-ĕti nö in hī, ngam tökiröng lanöökö inrē i patī Israĕl ngam kahëtö ò nö in cha sā ṙôkö miṙēlōn ò, sā ṙôkö öp tököp hanāngenlōn ò.
8Pòn ngö ṙô anga-aṅ, Tārik chu tal yin vē tarik, kikōnyö kūön töthō nö michūṙen; lökten ò nö Mahayööken cha.
9Kihngen anga-aṅ i nup kanihngen cha nö ṙòkhöre, hayööken cha inrē öp ma-ahānga in ò; i hanāngenlōn ò i miṙēlōn ò inrē anga-aṅ nö ṙānyen cha; chātlen cha anga-aṅ ngaich tayuklen cha löktö kūö nuk sakāmö hötṙeh.
10Ahôngen ò pöri cha-a miṙivngölōn ngam Töhet Fanöinylö ò inrē; lökten ò nö vītöre nö lā-al cha, kôten inrē anga-aṅ nö lā-al cha.
11Fē-ĕlre ngaich anga-aṅ tö nuk sakāmö misī, tö Môsös ök tarik ò. Isuh öku ök kamënyen ih ṙā-ang ël ap mai yip yōm nup pököre ò? Isuh ap anga-aṅ ap chamaphöt ngam Töhet Fanöinylöre nö elṙôngö cha,
12Öt tötī-iv tö ngam tökôlò kël ò nö lök lāhāmö Môsös, ök maharēv minë mak nö i kūö cha nö vītö minë-enyre tö tötchanūhuvṙen,
13Ök mahachōkūö cha nö lök ël tö-aṙū? Sā kōra nö el kuyāyö tönyaṅlnyi nö öt kavē-ĕre.
14Sā nuā pameūtöre nö el achāṙö, ngam töhet Fanöinylö ngam Mā Tēv nö kētö haneūheu cha. Ngatī tī me-eṅ hachōkūö vē tarik, öm vīlö minë-enyre tö tökôlò.
Invëkö Miṙēlōn Töm Hinòlṙen
15Löktö el halīöngö mat man ngëicha, ṙā-ang im töhet tölöök elyöngö meh. I chūök kumlēḵlōn meh kumlēḵ meh inrē? Öp kū-ö öp lōn meh ngam miṙēlōn meh inrē nö haköpi nö öt in chu.
16Pò meh me-eṅ yöng ih, pòrô Aprahām nö öt akahakūö tö ih rö-ö inrē Israĕl nö akahngen ih: Ō Mā Tēv me-eṅ man Yöng ih, Ṙāmānyen ih lamöktökūö misī ngam minë-eny meh.
17Ō Mā Tēv, kūöyòh ömeh vī-i ih vāichö kū-ötö ngam talöökö meh öm öt hangëṅngö ellōn ih inrē, tö lökten ih öt pa-ekūö tö meh? Chö-öinytö tarik re man yēḵ havantöre, vē miyöngö yip amin meh.
18Höng rahëchtaṙen yin vē töhet tarik meh nö amīnu tö ngam töhet chūök meh, ngaich yip tökunyaha-elmat tö ih nö rööntö kui e.
19Ngaich īhö sā cha yip töt hayöngö tö meh, sā cha yip töt havëka tö ngam minë-eny meh.
Currently Selected:
Isayā 63: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
