Isayā 62
62
1Kūö Sīyôn chin öt hòṅ ṙāngôre, kūö Yērusalem chin inrē öt hòṅ heuhtöre, hanöng saha ngam lanöökö ò nö kiröönngöre nö sā töyang, ngam inyööken ò inrē nö sā töhūkūö ëāṅvö.
2Meuk lanöökö meh yip min pumnāmö tarik, meuk kanôlò meh inrē yip rācha: ngaich me-eṅ min kaheūkö minë-eny tö tufömngöre, öp kahëtö ngam elvāng ngam Mā Tēv min.
3Tövai man min sapīöv rācha eltī ngam Mā Tēv, sapīöv rācha eltī ngam Mā Tēv meh.
4Hö-ö man min Töṙā-aiṙen invëka; öt rēhĕn ngam panam meh min nö Tötaṅhaṅvkūö invëka: Kaheūkö pöri min me-eṅ öm In ò, ap ṙanāmölōn chu, Pīhövö inrē ngam panam meh: pò ngam Mā Tēv nö ṙāmölōn nö in meh, ngaich ngam panam meh min nö pīhövö.
5Sā ṙāl tarik nö pīhö tö rēlö, ngatī yip kikōnyö kūön meh min nö pīhö meh, sā ngam kikōnyö töhapīhö nö ṙāmölōn nö im kikānö töhapīhö, ngatī min ngam Tēv meh nö ṙāmölōn nö in meh.
6Ō Yērusalem, ṙātö amahaṅti chin i kui minë kinlonglö meh; öt ṙāngö ṙôre yip min irô-òtö sakāmö hatööm inrē, yī-ö famëḵlö ngam Mā Tēv, uh yin heūheure.
7Ui kētö haneūheu ò inrē hanöng saha Ò nö köpö tī tö Yerusalem nö vīten e nö ineū-eu nö ing tumlat.
8Chūökuṙô an ngam Mā Tēv nö im lāhāmö kël re im tökalēḵ inrē kël ò, hö-ö chin min kēngö ngam sāiny meh nö nyā-aṅkūö yip tökunyaha elmat tö meh; öt ôkö nup min inrē vāin meh nup halinten meh tö aṅ tahëng;
9Acha-a pöri min nyamā-aṅvkūö tö u yip mahachūökngö u acha-a inrē yip mahamūlö u min nö ôkö u el milūkö ngam töhet chūök.
10Kuṙòh, kuṙòh kiröönngöre lök i minë inkūp; halēn talöökö yip tarik, afônglö, afônglö ngam tökiröng talöökö; kēngö nup ihong; hatamlö ngam minkahngö in yip tarik.
11Yĕh meuk, söl manā-angkūö ngih tumlat an ngam Mā Tēv nö ahangka, ngö ṙô yin tap kikānö kūön Sīyôn, Yĕh meuk, yih an ngam inyööken meh; yĕh meuk, kum ò ap raneushö, urēhĕkūö ò an inrē ngam invahalvah.
12Ngaich cha-a min nö kaheūkö nö Töhet tarik, Töṙānyu tö ngam Mā Tēv; ngaich me-eṅ min kaheūkö Töchöhöh, elpanam tötṙā-aiṙen.
Currently Selected:
Isayā 62: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
