Isayā 61
61
Tölöök Inhangkö Ṙinānyi
1I kui chu an ngam Töhet Fanöinylö ngam Mā Tēv, pò ngam Mā Tēv nö hacham kui chu öich kētö tölöök inhānga in yip töhakihtuṙen; tinngen chu an chömlö tölakūki ellōn, ahangkö ṙinānyö tökē-ĕ, linöpnyö kūö chūök insongngö tarik tö yip tönyëki ël e;
2Ahangkö ngam töhō-ov samyeūheu ngam Mā Tēv, ngam sakāmö invahalvah inrē aṅ im Mā Tēv; inṙamlōn yip töhaṙivlōn inrē;
3Kē-ĕkūö yip töhaṙivlōn inrē i Sīyôn tö neūmö ṙënngen tisum, tavī-i ṙanāmölōn inrē nö ṙënngen miṙivlōn, nöinyö inrē kinṙum nö ṙënngen tötkalē-en ellōn; hòṅ cha nö kaheūkö nö ōk chōn lanöökö, nö taheūichtö ngam Mā Tēv, hòṅ ò nö hapōilöngö.
4Mānlö ngam hötṙeh yip min töpiyāyi, katöplö ngam mu-urēhĕ pinyāingö yip min; vītit nup elpanam yip min töpiyāyi nup piyāingö töṙōlkölchap tarik.
5Sökhak yip aṅ tahëng min nö ha-aṅlö kiteūmö töhĕng mihëṅrö chehen meh aṅ tahëng min inrē yip kumköh el panô-òṅ meh kamrān vāin inrē.
6Kaheūkö pöri min yī-ö öi kūönṙô ngam Mā Tēv mameukṙen ngam Tēv hī yin min tö ṙô yip tarik; nyā-aṅvkūö yin min tö kanôlò pumnāmö tarik, eū-eu yin min i nup kanôlò cha.
7Nëtö minchööḵö yin min nö ṙënngen sumrōngkūö yīö, ṙāmölōn yin min inrē nö ṙënngen minṙēngö yīö; lökten yin min im panam re öi nëtö amin: öt chanūhuvṙen ṙanāmölōn min yī-ö.
8Pò ngam Mā Tēv nö hāngenlōn tö tötmichūṙen kinṙôka surīkhö unlāya chin tövaich inrē; kô-en chin min kē-ĕkūö cha tö invāhal in cha, vītö ngam tötchanūhuvṙen kinlēḵngô min chū-ö in cha.
9Akaha yip min mumātö cha nö i vē pumnāmö tarik, yip kūön cha inrē nö el ṙôngö vē tarik; akaha cha min nö ṙòkhöre yip mameūkö cha, tö cha nö tarik töhakôlöng ṙô tö ngam Mā Tēv.
10Pōyen ṙanāmölōn im Mā Tēv ṙamö ellōn chin min im Tēv chu; pò ò nö kafānö chu tö hilā inyööken, kahūmö chu an tö tökiröng inyut lanöökö sā ngam kikōnyö töhapīhö nö eūmlöre ngam kikānö inrē töhapīhö nö hanyöṅtlöre tö töpōiṙāi yanöṅtö.
11Pòn sā ngam tumlat nö meunylö aṅkūö ngam panô-òṅ inrē nö sīöplö aṅkūö tö nup töteūichtu nö ël e, ngatī ngam Mā Tēv min nö vītö ngam lanöökö nöinyö inrē nö sīöplö nö i kūö pumnāmö tarik.
Currently Selected:
Isayā 61: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
