Isayā 56
56
Hanôlhöt Taṙòkhöre Pumnāmö Tarik Min Yip Kūön Ngam Tēv
1Ngö ṙô An ngam Mā Tēv, Haköp kinṙôka yin tötmichūṙen ngaich la-evṙen tö lanöökö: tön ka-euitö yīhih öp min nö yih inyööken aṅ in chu, ngaich hameuktu ngam ṙinānyö aṅ in chu.
2Tökôlò öp tarik öp töla-evṙen tö e, öp tököptī inrē tö e kūön tarik; mahaköp ngam töhet sakāmö, nö öthachōichngö e, mahaköp këlre inrē nö öt la-evṙen tö ngam tötlöök.
3Ör rēhĕn öp aṅ tahëng, öp mahamūltöre nö im Mā Tēv nö ngö ṙô, Kô-en an min ngam Mā Tēv nö haköhngen hī tö yip tarik ò; un rēhĕn öp kumkantöre nö höknyuṙô nö ngö ṙô, Yĕh meuk, tönyangngö chin chū-ö chōn.
4Tön ngö ṙô An ngam Mā Tēv: yip kumkantöre mahaköpkö töhet sakāmö chu, nö atöllö nup kumchiklōn chu köptī inrē tö ngam kinlēḵngô chu:
5Kētö ap patī re chin min ngaich lā-ël nup kinlōngö öp in köpkölōn minënyi inrē tömötlö tö kikōnyö kūön, tö kikānö kūön inrē; kētö minë-eny cha chin min töp töt chanūhuvṙen öp töt rökiṙen min.
6Ngaich yip aṅ tahëng inrē mahamūltöre nö im Mā Tēv, nö meukṙen ò, nö hāngenlōn tö minë-eny ngam Mā Tēv, nö hòṅ tarik ò inrē, ṙòkhöre yip mahaköpkö ngam töhet sakāmö nö öt hachōichngö e, köptī inrē tö ngam kinlēḵngô chu;
7Cha-a yip min tökētu nö im töhet rôngö chu, vītu cha-a nö ṙāmölōn inrē nö el ngam patī chu chūök vinë-eṅkūötēv; hō-ovö nup min nö el ngam tahāklö chu nup kahëtö cha inrē; pò ngam patī chu min nö havëka nö patī chūök vinë-eṅkūötēv vē taṙòkhöre tarik.
8Ngö ṙô An ngam Mā Tēv, ngam mahamūl yip töha-uknyu aṅ in Israĕl, Hamūltö yip tahëng chin min in ò nö holtö yip tö ngaich nö hamūlö.
Kôti Fālen Yik Mahayöngö Israel
9Ṙòkhöre yī-ö töṙeūla el ngam kahôyö, yih, öi kāngö u, ṙòkhöre yī-ö töṙeūla el inchōn.
10Öt meuk yip tarik amahten ò, ṙòkhöre yip nö öt aṅhav-in tö mikah; ṙòkhöre yip nö am töt salōho ṙô, ötkô yip nö av; höng heūva, hulalhaka, hāngenlōn tö inṙôhò.
11Kalē-ĕ yanālö nup am tö nyā-aṅkūö; höng öt hētu nup nö tööḵngen; ngaich yip yōm pököre, inrē nö öt aṅhav-in tö mikah: ṙòkngöre yip nö havöötökūöre nö kö i talöököre, kö i taneūngenre ngòh töhĕng tak, nö ṙòkhöre cha-a.
12Ngö ṙô yip, Tā-ih, töi kē vāin, tā-a töi hatööḵngenre tö tökalēḵ ka-eūt hòṅ öp huṙöich min nö sā ngih sakāmö, nö töyahlö ṙôkö.
Currently Selected:
Isayā 56: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
