Isayā 57
57
Öthakòlöngṙô Yik Vamë-ekūö Insātēv I Israel
1Öt kôlòṙen yip tölöök, ngaich öt hĕng tak mahaköpngö e nö ellōnre; kē-ĕyö yip tö kalē-ĕlōn nö im Tēv, öt hĕng tak tö-akahalōn tö ngam tölöök tarik nö kē-ĕyö nö ṙā-ang im tötlöök yamih.
2Kuhēthötre anga-aṅ ngaich nö im kumchikṙen; el chamam re cha-a ngaich nö heūheure, yip lamök i chanīpöre.
3Haröhtöre pöri yī-ö ihih yī-ö kūön vamīngen, kūön ma-asĕha mī-inyihköre kikānö inrē.
4Achiāpa minônngen yīö? Lā-al chīö öi pōiti elvāng vā-anykūöre öi kichalnyö litāk re. Röh öi yī-ö kūön tököölö fālen, öi kūön inchīlö.
5Yī-ö tö holtö yanālöre öi föng i nup ōk chōn, el katòh tö-ayālö rōi chōn, öi fëlngö kūön re el achāṙö el katòh linrākö nup ihong inrē?
6I nup töfaṙëcha alaha ihong el achāṙö nup minchööḵö yīö; anū-ö nup minchööḵö yīö; in u tī yī-ö ngaich röstö tö-ôkö tökētu, kumtö sāiny yī-ö inrē nö tökētu. Lām öich min ngaich tökūö në?
7Vītö chamanre me-eṅ latulöng i kui tömaṙô-òl kui rôngö, ngaich chuh in e me-eṅ kētö tökētu.
8Lā uk nup inkūp ngaich tö öp machööḵlö öp inkūp tī më-eṅ vītö minkahngö: pò meh chumlal el chamam re, öm ṙāngen chu, ngaich man yôklö ël e, ngaich man pōiti tī vī-i e; ngaich me-eṅ inrē kē taneūngenre öm in cha, hāngenlōn man töp chamam cha, ngaich man meuk töchumlal.
9Chuh in Mōlek man ngaich öm kumtö tavī-i ngaich ṙūölö ṙôken tötahūsa tavī-i me-eṅ; marô-òlkūö tī me-eṅ tīnngö ma-ahānga, uroh öm tīntö chamuh el chūök tökapah.
10Chei man ngaich törô-òlkūö talöökö, hö-ö pöri më-eṅ ngö ṙô, chanök alaha an; kôtökūö me-eṅ tö tufömngöre inlaha nö kumlēḵ meh ngaich hö-ö me-eṅ cheingö.
11Achiāpa vanööṙö meh pinhë-eṅkūö meh inrē, töp löknyô meh minyôiny-aṅ ngaich rö-ö köpölōn tö chu öt fēken chu inrē ellōn re? Röh öich höng öt ṙô-òvö, öich marô-òten ngaich lökten meh öt pa-ekūö tö chu?
12Hôṅ, vënyö öp lanöökö meh chin la-en meh inrē, hö-ö pöri min anū-ö nö yöölen tī tö meh.
13Yē meh havë-a, hökngen nup insātēv hamūl meh nö ṙānyen meh! Heuingö nup min tökūö kuföt, kum umhômö nup min. Anga-aṅ pöri ngòh mahanyatlöre nö in chu amīnu min töng panam, ngaich hayōm ngam töhet rôngö chu min.
Ṙô Hinòlṙen Töm Inlinken Tö Ngam Tēv
14Ngö min öp ṙô, Afônglö e, afônglö e, halēn ngam talöökö, kēngö nup inrahkūö nö ṙā-ang el talöökö më tarik chu.
15Tön ngö ṙô An ngam lātulöng ngam tömarô-òl chūök, ngam mī-iyöng im tötchnūhuvṙen, ngam tö minënyu tö ngam Töhet: Iyöng lātulöng chin Töhet chūökö inrē hol ò inrē öp tö haṙivlōn tö tökööl re, töyāichö ellōn inrē, mahā-aṅ ma-alaha öp yāich, ane inrē mahā-aṅ nômö öp töhaṙivlōn tö tökööl re.
16Pò chu sō örheūheu lā-alkūö, öt rēhĕn öich öt örheūheu min līn; pòn löknyö in chu ngam ma-alaha, chū-ö inrē vamī unhômö ngam nômö.
17Kūö ngam tökööl yinikhanga chin öich tainy, fōhan chin, hanyatngö kūöre ngaich tainy inrē; höng iṙūöhen pöri anga-aṅ nö heūlritre nö i talöökö ellōn re.
18Ngaich chin meuk nup talöökö ò, ngaich pöri min öich halīnken ò; hachōḵ an chin min ngaich reushen ò holtö inṙamlōn, vīlö ṙòng minë minuh nö in yip mahaṙivhen ò.
19Lanāmö, lanāmö, i tömarôvat i töröhta, ṙô ngam Mā Tēv; ngaich chū-ö min halinken ò.
20Ngaich pöri ngam tötlöök nöng sā panāvö el mai; pò e nö ötkô nö heuhtöre, ngaich öp mak e nö payavlöng tī tö tilin mum inrē,
21Öt lanāmu in ngòh tötlöök, ṙô ngam Tēv chu.
Currently Selected:
Isayā 57: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
