Isayā 55
55
Kētö Ngam Neūkölōn Re Ngam Tēv
1Mah, yihtöre i minë mak yip töhaṙëhe nômö; anga-aṅ inrē öp töt āṅhav-in tö rupīö, tā-ih, havah hòṅ re nyā-aṅvkūö; ta-ih, havah vāin aṅteh inrē öt ṙāi tö rupīö höng öt ṙāyu inrē.
2Kūöyòh öi mëichngö rupīö i ngam töt nyā-aṅkūö, kūöyòh inrē mëichngö la-enre i ngam töt töö-önglōntī? Haṙēmngenre hang ṙô chu, ngaich nyā-aṅvkūö tö tölöök, ngaich kumchikngenre i kanôlò.
3Asītö elnang re yin, yihtöre inrē in chu; hangihtöre hòṅ ngam nômö yīö nö aṅ; hòṅ vīten ngam töt chanuhuvṙen kinlēḵngô chin in yīö, ngam kanöpö chu, ngam tökô-en hanāngenlōn chu inrē tö Tāvit.
4Yĕh meuk, vīten ò chin nö mahameukhöti nö in më tarik, mahachōkūö töchöngu inrē nö in vē tarik.
5Yĕh meuk, havëtö öp töt mikahkūöre man min pumnāmö tarik, yip pumnāmö tarik inrē töt akahakūö tö meh min nö faltöre nö in meh, kūö ngam Mā Tēv ngam Tēv meh, kūö ngam Töhĕng Töhet inrē in Israĕl, pò ò nö hapōilen meh.
6Chöh ngam Mā Tēv isaha ò nö ṙòngmö kôti, havëken ò isaha ò nö ṙòngmö röhta:
7Hökngen ngam tötlöök nö ṙāngö ngam talöököre, ngam tarik inrē tötchiplö ellōn nö ṙāngö ellōnre: hökngen ò nö havantöre nö i ngam Mā Tēv, hòṅ ò nö aṙē-ĕlōn tö ò; havantöre inrē nö pōyen tī nö aṙē-ĕlōn tö ò; havantöre inrē nö im Tēv hī, hòṅ ò nö pōyen tī nö aṙē-ĕl.
8Pò nup lōn chu nö öt lōn meh, öt rēhĕn nup talöökö chu nö talöökö meh, ṙô ngam Mā Tēv.
9Pòn sā minë halīöngö nö marô-òl chūök töm tumlat, ngatī në talöökö chu nö marô-òl chūök tö minë talöökö meh në lōn chu inrē nö marô-òl chūök tö minë lōn meh.
10Pòn sā ngam kumṙah tö ngam tökënngöre tacham inrē nö yih nö ṙā-ang el halīöngö ngaich öt havanritre nö in e nö hēk, hamak ngih tumlat pöri ngaich vīten e nö asīöplö manôlnyö ṙòng chōn, kētö kulöl tī ngam tameūich nup tönyā-aṅ inrē nya-aṅkūö:
11Ngatī min ngam ṙô chu ṙameū-eung elvāng chu: öt havantöre nö in chu nöng ötkūmuṙen, hateungngö öp lōn chu pöri min angū-ö, ngaich kôlòṙen nö in öp tinīnngöre tö chu.
12Pò yīö min ṙāmölōn kiröönngöre hachōḵo inrē im kumchikṙen: tikökṙôre nun min minë rôngö tö minë rung nö urēhĕkūö meh, ngaich ṙòkhöre min minë chōn ngam el kahôyö nö fatāk eltī re.
13Ṙënngen töchökhu kaha nup för chōn min nö yih, ngaich ṙënngen nup pīkōḵ nö yih nup tötahūsa rōi chōn min; ngaich min nö inköpkölōn tö ngam Mā Tēv, minkahngö nö töt ranökngenṙen.
Currently Selected:
Isayā 55: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
