Isayā 53
53
1Achīö ap ṙamātö ellōnre nö i në ṙô tö ngaich nö hāngö tö ih? In chīö öng inrē nö ngaich ngam kël ngam Mā Tēv nö hameuktu?
2Pò ò nö sīöplö nö i kūö ò nö sā tö-ayal chōn, sā ṙĕh inrē nö sīöplö nö löklö el tönyô tumlat; öt sāta ana hēk ötvāyö mineūkö inrē, töp lökten hī hòṅ ngëichken ò, ane inrē öt löökö sanöökö töp lökten hī hāngenlōn tö ò.
3Töt hakūökaṙen an tösō-ovö inrē tö tarik; tarik miṙivlōn an, tö-īnu inrē tö miṙivlōn; sā öp töhĕng tak an inrē chūök tarik nö hanyatngö kūö re öt hakūökaṙen anga-aṅ rö-ö ayīö inrē hāngen tö ò.
4Kô-en an nö ngaich nö keun miṙivlōn hī, tayuk miṙivlōn hī inrē, ngaich ayī-ö höng hökngen ò nö fōhoh? Hachökö tö ngam Tēv, hakihtuṙen inrē.
5Ngaich pöri anga-aṅ nö nyāhavö kūö tökööl hī paṙôkö alaha anga-aṅ kūö öt lanöökö hī; i alaha ò ap chinökṙen tölööken tī tö hī, ngaich ayī-ö lökten i nup tinfônö ò öi lööken.
6Ṙòkhöre in ayī-ö sā sīṅp tölō-ongkūö; kö havööngökūö re in i talöökö lōn re; ngaich ngam Mā Tēv nö hakeunlen ò tö nup tökööl hī ṙòkhöre.
7Taṙāmö ana, hakihtuṙen inrē hö-ö pöri anga-aṅ nö vā-anykūöre; sā öp kūön sīṅp tö tūöktu nö ip ṙamatnyö likeun, sā öp sīṅp inrē i kūö yip kammöp nöng öt ṙô-òvö.
8Kē-ĕyö anga-aṅ lökten i inkihten inkaha fālen inrē; in yip tumköl chap ò, achiāp ngamëchngöre tö ò nö rökiṙen nö ṙā-ang i panam tö-aṅ, fōhoh kūö tökööl vē tarik chu?
9Holtöṙah tötlöök anga-aṅ tö tī cha nö el anūlö holtö tarik pöri tökôlò im kinpaha ò, pòrô anga-aṅ nö öt chökhuṙen öt rēhĕn nö aṅhav elvāng tö inchīlö.
10Ngaich pöri nö lōn ngam Mā Tēv nö piṙòknyö alaha ò; kēten ò anga-aṅ nö i miṙivlōn: hē meh vīten öp nômö ò nö tökētu kūö tökööl, meuk öp kūön re an min, ngaich ṙūötö sakāmö ò min anga-aṅ; kôlò ap min lōn ngam Mā Tēv nö eltī ò.
11Meuk ṙòng kanihngen an min nö ellōnre ngaich tööḵönglōn; lökten ngam in ò inkaha ngam tölöök min, ngam tarik chu, nö pōyen vahīten tö tölöök; ngaich anga-aṅ inrē min nö keun nup tökööl cha.
12Lökten chin min michööḵ an tö minchööḵö tökiröng, ngaich anga-aṅ min inrē nö michööḵ pôḵ nö in öp tökalēḵ; pò ò nö vōknyö aṅ i nômö re nö im kinpaha, kaheuktuvö inrē anga-aṅ nö i tötlöök; sön anga-aṅ nö keun tökööl tömaṙôngö, ane inrē ve-elkui tököölö fālen.
Currently Selected:
Isayā 53: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
