Popular Bible Verses from Isayā 53

Share

Ngaich pöri anga-aṅ nö nyāhavö kūö tökööl hī paṙôkö alaha anga-aṅ kūö öt lanöökö hī; i alaha ò ap chinökṙen tölööken tī tö hī, ngaich ayī-ö lökten i nup tinfônö ò öi lööken.

Ṙòkhöre in ayī-ö sā sīṅp tölō-ongkūö; kö havööngökūö re in i talöökö lōn re; ngaich ngam Mā Tēv nö hakeunlen ò tö nup tökööl hī ṙòkhöre.

Kô-en an nö ngaich nö keun miṙivlōn hī, tayuk miṙivlōn hī inrē, ngaich ayī-ö höng hökngen ò nö fōhoh? Hachökö tö ngam Tēv, hakihtuṙen inrē.

Töt hakūökaṙen an tösō-ovö inrē tö tarik; tarik miṙivlōn an, tö-īnu inrē tö miṙivlōn; sā öp töhĕng tak an inrē chūök tarik nö hanyatngö kūö re öt hakūökaṙen anga-aṅ rö-ö ayīö inrē hāngen tö ò.

Taṙāmö ana, hakihtuṙen inrē hö-ö pöri anga-aṅ nö vā-anykūöre; sā öp kūön sīṅp tö tūöktu nö ip ṙamatnyö likeun, sā öp sīṅp inrē i kūö yip kammöp nöng öt ṙô-òvö.

Ngaich pöri nö lōn ngam Mā Tēv nö piṙòknyö alaha ò; kēten ò anga-aṅ nö i miṙivlōn: hē meh vīten öp nômö ò nö tökētu kūö tökööl, meuk öp kūön re an min, ngaich ṙūötö sakāmö ò min anga-aṅ; kôlò ap min lōn ngam Mā Tēv nö eltī ò.

Pò ò nö sīöplö nö i kūö ò nö sā tö-ayal chōn, sā ṙĕh inrē nö sīöplö nö löklö el tönyô tumlat; öt sāta ana hēk ötvāyö mineūkö inrē, töp lökten hī hòṅ ngëichken ò, ane inrē öt löökö sanöökö töp lökten hī hāngenlōn tö ò.

Lökten chin min michööḵ an tö minchööḵö tökiröng, ngaich anga-aṅ min inrē nö michööḵ pôḵ nö in öp tökalēḵ; pò ò nö vōknyö aṅ i nômö re nö im kinpaha, kaheuktuvö inrē anga-aṅ nö i tötlöök; sön anga-aṅ nö keun tökööl tömaṙôngö, ane inrē ve-elkui tököölö fālen.

Meuk ṙòng kanihngen an min nö ellōnre ngaich tööḵönglōn; lökten ngam in ò inkaha ngam tölöök min, ngam tarik chu, nö pōyen vahīten tö tölöök; ngaich anga-aṅ inrē min nö keun nup tökööl cha.

Kē-ĕyö anga-aṅ lökten i inkihten inkaha fālen inrē; in yip tumköl chap ò, achiāp ngamëchngöre tö ò nö rökiṙen nö ṙā-ang i panam tö-aṅ, fōhoh kūö tökööl vē tarik chu?

Holtöṙah tötlöök anga-aṅ tö tī cha nö el anūlö holtö tarik pöri tökôlò im kinpaha ò, pòrô anga-aṅ nö öt chökhuṙen öt rēhĕn nö aṅhav elvāng tö inchīlö.