Isayā 52
52
Ṙānyu Min Yeruselem Töm Tēv
1Aṅhen, aṅhen, kē ngam kumlēḵ re man, Ō Sīyôn; hayutlöre tö nup tövai tökiröng inyūt, Ō Yērusalem, töhet elpanam; pòn öt hēk min nö yih nö in meh yip töt tunyīnyi töthet inrē.
2Piyònglöre man tö minë pitung choholre, ūichngöre, Ō tö hakövö Yērusalem; luhngö minë nyanëk re nö ṙā-ang I likeun meh, Ō me-eṅ tökē-ĕ kikānö kūön Sīyôn.
3Tön Töng öt ṙāyuvö man inyīhiyö, ṙāḵnyu man min öt ṙāyu tö rupīö. 4Pòn ngö ṙô ngam Mā Tēv; Urĕh yik tarik chu nö chuh Aikup nö töt urāngen nö iyöng nö umuh, hakihten cha inrē yik aṅ Asiriā nöng öt chööḵnyu. 5Lökten, ngö ṙô ngam Mā Tēv, Suh ap in chu ihih tö yik tarik chu nö kē-ĕyö nöng öt ṙāyu? Harāmöre yip mahayöngö cha, iṙūöhen inrē i rô-òtö sakāmö ngam minë-eny chu nö miṙē-ĕyö, ṙô ngam Mā Tēv. 6Lökten yip tarik chu min nö akaha kūö tö minë-eny chu; lökten cha min nö akahakūö ip sakāmö angū-ö tö chu öich chū-ö töṙô-òvö; yĕh meuk, chū-ö chini.
7Yöng vanāyö röön ò nö i kui minë rôngö ngam tökumtö tölöök inhānga, ngam pumrātngö lanāmö, ngam tökumtö tölöök inhāṅnga aṅ i tölöök, ngam pumrātngö chūök inyööken, ngam tö ngö ṙô tö Sīyôn, Hayöng an ngam Tēv meh.
8Hangihtöre, pōitô yip amahten meh, hol ṙô re yip nö ṙāmölōn nö tikökṙôre; pò cha nö kôtamat nö meuk invantö ngam Mā Tēv nö i Sīyôn.
9Hol ṙô re yin kaknyöre tikökṙôre, yī-ö töt aṅhavkūö chūökö i Yērusalem; tön haṙamlōn yip tarik re an ngam Mā Tēv, ngaich an nö ṙānyen Yērusalem.
10Hameuknyö ngam töhet kël re an ngam Mā Tēv nö i kūö yip pumnāmö tarik nö ṙòkhöre; söl manā-angkūö ngih tumlat yip min nö ṙòkhöre nö meuk, ngam inyööken aṅ im Tēv hī.
11Ngaich yin, ngaich yin, ṙā-ang hih kiröönngöre, un lūölkö töthet; ṙā-ang ellōn ò kunyī-inyre, ahetlöre yī-ö, yī-ö lamūölkö nup chūökṙen ngam Mā Tēv.
12Pò yīö rö-ö min kurātö kunnyīnyi, rö-ö yin min inrē höng pāngö fanalngö pòn urēhĕkūö yīö min ngam Mā Tēv lā-unôich yīö an min inrē ngam Tēv Israĕl nö aṅten yīö.
Tö Kihngen Nö Tarik Ngam Tēv
13Yĕh meuk, kôlòṙen ap min tarik chu, hapōilöng ap min hatāilöng inrē, ngaich marô-òl chūök min.
14I ṙôngö yip töpingangkūö nö in ò, höng yô-òv mineūkö anga-aṅ, öt rahëichyen nö sāta nö i tarik, lāngö höng yanô-òv inrē tö vē kūön tarik,
15Ngatī min anga-aṅ nö harötlö tömaṙôngö pumnāmö tarik; tilupngö elvāng re min yip rācha tö pòkūö ò; pò cha min nö meuk nup tö-öl nö vënyu nö in cha, ngaich akahalōn min cha-a inrē tö nuk töthāngö tö cha.
Currently Selected:
Isayā 52: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
