Isayā 44
44
Höng Ngam Tēv An Mā
1Hangihtöre pöri yēḵ, Ō Yāköp tarik chu; Israĕl inrē ngam katöllö chu:
2Ngö ṙô An ngam Mā Tēv ngam vamī-i meh, nö löktökūö el chūök kanūönö, hamòlṙen meh inrē min: Um pa-ekūö, Ō Yāköp tarik chu; me-eṅ inrē Yēsurun katöllö chu.
3Pò chu min ṙöstö mak i kui ngam panam töyal, töhëm mak inrē im tönyô tumlat: ṙöstö ngam Töhet Fanöinylöre chin min i kui yip kūön meh, inkôlò inrē i kui yip samīöplö nö löklö in meh.
4Ngaich acha-a min nö sīöp sā kiyôp nö ellōn mak.
5Ngaich hĕng tak min öp tö ngö ṙô, Aṅ im Mā Tēv chin chū-ö, ngaich öp tahëng min nö kaheūktöre tö minë-eny Yāköp, ngaich öp tahëng min nö kūich kël re, nö ngö tī, aṅ im Mā Tēv, kaheūköre min inrē anga-aṅ tö minë-eny Israĕl.
6Ngö ṙô An ngam Mā Tēv, ngam Rācha Israĕl ngam Mā Tēv yip tömaṙôngö Ṙamānyen ò, Chū-ö chin raneh, chū-ö inrē manā-aṅ; öt hōlu chin tö tahëng tēv.
7Achīö ap tösā chu? Hökngen ò yĕh nö ahangnyö e, hökngen ò nö vë-eny e ṙātö e inrē nö i kūö chu, Achīö ap ma-ahangnyö nup yamih nö löktökūö misī? Höknyö ṙô cha nö ve-enynang hī tö nup tö-öltöre.
8Un pa-ekūö, un rēhĕn nö vöö; röh öich ngaich ve-enynang yīö löktökūö misī öich ṙô tö e? Yī-ö yin hamang ṙô chu! Tēvu hòng nö hol chu? Hôṅ, öt Ihōnguvö; hö-ö chin akahakūö tö inrē.
Hanāchiṙen Ngam Vinë-ekūö Insātēv
9Ṙòkhöre yip vamī isātēv nöng törö-öv, ngaich nup lōn cha vāhī cha nöng öt tökanôluṙô: öt rēhĕn yip mameuk nö meuk, öt rēhĕn nö akahalōn, tö cha min nö sumrōngikūö. 10Achīö ap vamī tēv, hēk mahaṙöich insātēv, öp töng rö-ö nö kanôluṙô? 11Yĕh meuk, ṙòkhöre yip hol ò min nö sumrōngikūö; höng tarik yip tö vahī-ivṙen: hökngen cha yĕh nö hamūlö nö ṙòkhöre, hökngen cha nö sökhaka, pa-ekūö yip min, holre yip min nö sumrōngikūö.
12Vī hanīöng ngam ramöm vët, ngaich i kūö ta-ök tameūyö nö halöökan nö aṅtī tö mūngöre, ngaich aṅtī tö töngëḵ këlre nö röman: hôṅ, kapahare ngaich anga-aṅ, öt ōtren kumlēḵ inrē; öt ôku anga-aṅ tö mak ngaich tayē alaha. 13Hateutnyö tökuvaha ngam töhuveū nö vī chōn; mikahngö e ngaich anga-aṅ nö aṅtī tö tökupōpökūö kanūich; halöökö e anga-aṅ nö aṅtī tö supīli, ngaich mikahngö e nö aṅtī tö töchuvī, vī-i e ngaich nö sā tarik, sā tarik tövai, nö iyönglöng nö el patī. 14Kūöltö sītör anga-aṅ chōn; hēk inrē anga-aṅ nö atöllö hōm chōn, hēk ōk, ngaich hökiṙen nö sīöp nö ngëḵ nö i nup chōn anga-aṅ, ngaich ngam kumṙah nö haruklen ò. 15Ngaich anga-aṅ min nö inmeui tameūyö ngam tarik; kē alaha ò anga-aṅ, ngaich hameūyöre; hôṅ, tōttökūö e anga-aṅ, ngaich vī rôtī: hôṅ, vī tēv anga-aṅ, ngaich vë-ekūö ò; vī insātēv anga-aṅ ngaich afukngöre nö i kūö ò. 16Föng höt alaha ò anga-aṅ nö kā alaha; kural tökurālö anga-aṅ, ngaich hatööḵngenre: hôṅ, hameūyöre anga-aṅ, ngaich ngö ṙô, Ā, ṙāich chin, meuk tameūyö chin ngaich: 17Ngaich ök hol u nö vī-i tö ò nö tēv, nö insātēv ò: afukngöre anga-aṅ nö in ò nö salāman, vë-ekūö ò, nö ngö ṙô, Ṙānyen chu; töm tēv chu man.
18Öt akahalōn cha-a, öt rēhĕn nö ngëicha: pò ò nö tilupngö mat cha, lökten cha nö öt meuk; tilupngö ellōn cha inrē, lökten cha nö öt akaha ellōn. 19Öt hĕng tak inrē famë-elre, ötrēhĕn öp inkaha öt rēhĕn mikah elmat, öp tö ngö ṙô, Föngngö ök alaha ò chin nö i kūö tameūyö; hôṅ, ahòk rôti chin i kūö nuk ta-ök ò: kural alaha chin inrē ngaich kā-a e: ngaich hòng chū-ö min vī ap hol e nö sin-òkkūö? Ngaich hòng chū-ö min afukngöre im töhĕng mirökö chōn? 20Nyā tisum anga-aṅ; halō-ongkūö ò ngaich ngam inchīlö ò, ngaich rö-ö anga-aṅ nö kô nö ṙā-any re hēk ngö ṙô, Röh ap minyôiny-aṅ nö lahāmö chu?
Mā Tēv, Vamī-il, Mahayööken Inrē
21Ō Yāköp, köpölōn tö në; chū-ö chin vamī-i meh: tarik chu mana: Ō Israĕl öthō man vāchiyö tö chu.
22Ngaich chin sichngö nuk tanôichngen meh, nuk tökööl meh inrē, nö sā taṙul: havantöre man in chu; tön ngaich chin havaha meh.
23Ō yī-ö halīöngö, tikökṙôre, tön tī ngam Tēv an angū-ö; pōitô hū-a, yī-ö lataṙeū alaha ngam tumlat; tiṙōlnyôre tikökṙôre, yī-ö rôngö, Ō elchūölchōn, ṙòkhöre inrē nup chōn in e: pò ngam Mā Tēv nö havaha Yāköp, ngaich hapōilöre min nö in Israĕl.
24Ngö ṙô an ngam Mā Tēv ngam mahavaha meh, ngam mahalēnngö chūök meh inrē el chūök kanūönö: Chū-ö chin Mā Tēv, öich vamīlö taṙòkhöre; tönghĕng tak öich chumṙeūichnyö minë halīöngö; mahanyāknyö ngam tumlat; achīö ap tösā chu?
25Öp maharahngö minkahngö töminyôiny-aṅ, ngaich vī yip chamòng alaha nö kulō-ov yip mahavöökūö tö-akaha tarik, ngaich vīngen nup huneū-en cha nö kumlō-ov:
26Öp mahaköpngö öp ṙô öp tarik chu, ngaich hateungngö inlēnö aṅ in yip Tanīnöṙô ò; öp tö ngö ṙô tö Yērusalem, Aṅhavkūö an min; tö nup elpanam Yūtā inrē, Mānlöng nup min, ngaich chū-ö min inrē asöklö nup tö taṙöli chūök umuh:
27Öp tö ngö ṙô tö ngam mai, Nyôngö man, ngaich chū-ö min inrē hanyôngö nup tahël meh:
28Öp tö ngö ṙô tö Sairös, Yōm pököre chu ana, ngaich min anga-aṅ nö hateungngö nup lōn chu: öp tö ngö ṙô tö Yērusalem, Mānlöng ap min; Yērusalem, Mānlöng ap min; töp töhet chūök inrē, Ṙātu ap min rööntö machööḵlö meh.
Currently Selected:
Isayā 44: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
