Isayā 45
45
Katöllen Sairös Ngam Mā Tēv
1Ngö ṙô an ngam Mā Tēv tö ngam hacham el kui ò, tö Sairös, ngam töṙapka lahāmö kël tö chu nö tömihôiṅ tö vē pumnāmö tarik i kūö ò, tiyōlnyö ṙat yip rācha chin min inrē; öich löpnyökūö nup inkup i kūö ò ngaich min nup inkūp kūö talöökö nö öt öpikūö;
2Urēhĕkūö meh chin min kiröönngöre öich piṙāptö kui nup rôngö: liköl nup mās chin min inkūp nö panyëny, kö maröktī inrē öich ṙatngö nup vët kālkūö:
3Kē-ĕkūö meh chin min tö aṅ el sinngūlö chehen töpōiṙāi tö nup töhayūni chūök inmūlngö chehen inrē hòṅ meh akahalōn tö chu öich chū-ö, Mā Tēv öich töminënyu ṙô havëken meh tö ngam minë-eny meh, öich Tēv Israĕl.
4Kūö ök tarik chu Yāköp ök katöllö chu inrē Israĕl, öich havëken meh tö ngam minë-eny meh: minë-eny tö minë-eny yöngre man tö tī chu pòrô me-eṅ öt akahakūö tö chu.
5Chū-ö chin Mā Tēv öt tahënguvö; öt hōlu chin tö tēv: nyëklö ṙat meh chin min, pòrô me-eṅ öt akahakūö tö chu:
6Hòṅ cha nö akahalōn nö löktökūö maneutlö ngam tavūöi, löktö lā sūng inrē, tö chu öt hōlu tö inrē: Chū-ö chin Mā Tēv, öt tahënguvö inrē.
7Vī hanātö chin, vīlö sinngūlö inrē; vī lanāmö chin, vīlö öt kanôlò inrē; chū-ö chin Mā Tēv, öich vamī në nö ṙòkhöre.
8Kumṙah yēḵ löktö lātulöng yī-ö halīöngö, hökngen minë taṙul nö chahūköti kūö tö kumṙah lanöökö: hökngen ngam tumlat nö vā-anykūöre hòn sīöplö ap inyööken, hökngen e nö tī tö lanöökö nö sīöplö nö holre inrē; chū-ö chin Mā Tēv vamī-il e.
9Tötkôlò ap anga-aṅ öp töhòṅ lā-al ngam Vamī-ire! Tanīöyö ap nö ip Vamī tanīöyö! Kô öng ngih tilin nö ngö ṙô tö ò ngam Vamī-i e, Kūöyòh öm vī-i chu? hēk inrē öt haṙahahav öng ngam la-en meh?
10Tötkôlò ap anga-aṅ öp tö ngö ṙô tö yöng re kikōnyö, Asuh ap hakūöntö meh? hēḵ inrē tö yöng re kikānö, Asuh ap inlöinyö meh?
11Ngö ṙô an ngam Mā Tēv, ngam Töhĕng Töhet in Israĕl, ngam Vamī an inrē: Hòṅ hatönö chu ömeh tö nup tö-öltö yihih; i inlahen yip kūön chu kikōnyö, hēk inrē tölṙô chu hòng i në la-en në kël chu?
12Ngāichö tī chin vī ngam tumlat, ngaich inrē vīlö tarik i kūö e: kôtö tī chin chiṙeūchnyö minë tömaṙôngö u inrē.
13Hachohlen ò chin im lanöökö, ngaich chū-ö min inrē hachip nup talöökö ò nö ṙòkhöre: vīlö ap elpanam chu ap min, ngaich anga-aṅ min inrē nö ṙānyö yip tarik chu tö-ahötiyö öt kūöre nö töreushu, öt rēhĕn nö kūö ṙāi re, ṙô ngam Mā Tēv yip tömaṙôngö.
14Ngö ṙô An ngam Mā Tēv, Ap kanôlò Aikup, tö chehen, tö-inyihka tö aṅ Itī-ōpia aṅ Sīpīa inrē, tarik tömarôlòng, yih min nö havāngtöre nö in meh, ngaich cha-a min nö tarik meh; tömrit meh yip min; inlöktöhëch yip min nö havāngtöre nö yih inrē nö in meh. Vë-ekūö meh yip min, nö ngö ṙô, Kô-en an ngam Tēv nö in meh; öt tahënguvö inrē, öt tēvu hol ò.
15Kô-en man me-eṅ Tēv öm mahanyatngöre, Ō Tēv Israĕl, mahayööken.
16Sirōngkūö yip min, hôṅ, kalūöchöre elkui inrē, nö ṙòkhöre cha-a: holre yip min nö kiröönngöre yip vami insā tēv nöng kalūöchöre elkui.
17Hayöökaṙen pöri min Israĕl tö ngam Mā Tēv nö aṅtī tö ngam tötchanuhuvṙen inyööken: öt sirōngkūö yin min yī-ö öt rēhĕn kalūöchöre elkui söl môkö örheūheu.
18Pòn ngö ṙô ngam Mā Tēv ngam vamīlö minë halīöngö; anga-aṅ an Tēv; ngam mamul ngih tumlat vī-i e inrē; haköpngö e an, vī-i an tö ò nö öt payāyaṙen, mūlö e an nö chūök elyöngö: Chū-ö chin Mā Tēv öt tahënguvö.
19Rö-ö chin ulāiköṙôre, öich ip panam chūök sinngūlö; rö-ö chin ngö ṙô töp kūön Yāköp, Chöhö chu man el kupööiṙen: Tö ṙô tö lanöökö chin chū-ö Mā Tēv, vë-eny nup töchip chin inrē.
Mā Tēv Ngih Panam Ngaich Insātēv Yip Aṅ Pēpilòn
20Tā-a hamūlöre yin; ṙūhtöre öi holre yī-ö tö ōtren aṅ in yip pumnāmö tarik: öt akahalōn yip cha-a yip tamyuk öp chōn insātēv cha, ngaich vë-ekūö ap tēv ap tötkô nö hayööken.
21Vë-eny e yin, kēnyö e: hôṅ, hökngen cha nö halēnöre: achīö ap mahameukten ngih nö ṙeū-eungrit tö misī? Achiāp tö ngaich nö vënyen e ik misī? Röh öich chū-ö öich Mā Tēv? Öt Tēvu nö hol chu; tölöök Tēv mahayööken inrē; öt hōlu chin.
22Havantöre in chu, hòṅre hayöökaṙen, ṙòkhöre aṅ manā-angkūö ngih tumlat: tön chū-ö chin Tēv, öt tahënguvö.
23In re ṙô chin chūökuṙô, ngaich ök ṙô nö ṙā-ang elvāng chu im lanöökö, ngaich öt havan min, hòṅ ṙòkhöre në kui kinmônö nö simtöre nö in chu, ṙòkhöre inrē litāk nö chūökuṙô min.
24Ngö ineūka chin min, Höng im Mā Tēv nup lanöökö nganë-eṅ inrē: in ò min tarik nö yih, ngaich sirōngökūö, nö ṙòkhöre yip töharuhlöng alaha nö lā-al ò.
25Im Mā Tēv yip kūön Israĕl min nö ṙòkhöre nö mihôiṅ ineū-euvö inrē.
Currently Selected:
Isayā 45: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
