Isayā 43
43
Kilēḵngôre Ngam Tēv Töre Min Nö Ṙānyen Më Tarik Re
1Ngö ṙô pöri ngam Mā Tēv töngamuh, anga-aṅ ngam vamīlen meh, Ō Yāköp, anga-aṅ inrē ngam mahachipngen meh, Ō Israĕl: Um pa-ekūö tön ngaich chin ṙānyen meh: havëken meh chin tö ngam minë-eny meh, chū-ö chu mana.
2Yē meh lök el mak, in meh chū-ö min; lök el tahël inrē ngaich anū-ö min nö öthōḵ nö pökngö tī tö meh: yē meh lök kūö tameūyö, ngaich öthō me-eṅ min ökngö; öt rēhĕn min ngam töhū kūö nö pachôllöngkūö nö i kui meh.
3Pò chu chū-ö Mā Tēv, Tēv meh Töhĕng Töhet in Israĕl, Mahayööken meh; kēten Aikup chin ngaich nö ṙāi meh lumnööṙö meh inrē Itī-ōpia, Sepa inrē.
4Pò meh töpōiṙāi i kūö chu, tö-eū-eu inrē, hāngenlōn chū-ö inrē tö meh; lökten chin min kētö tarik nö lumnööṙö meh, tarik tömaṙôngö inrē nö ṙënngen nômö meh.
5Um pa-ekūö; tön holtöṙah meh chin: kētöp kūön meh chin min nö ṙā-ang lā chuhöt, hamūlö meh inrē löktökūö lā sūng;
6Ngö ṙô chin min tö ngam lā kapā, Ṙā-angtī re; tö ngam lòhngö inrē, Heūlngöre man; kētö yip kikōnyö kūön chu ṙā-ang tömarôvat, yip kikānö kūön chu inrē ṙā-ang manā-angkūö ngam tumlat.
7Ṙòkhöre yip töhavëka tö minë-eny chu, yip tövīlöng tö chu inrē tö ineū-eu chu; vahī chu an; hôṅ, chū-ö chin vamī an.
Yik Israel Yik Mameuk Ngam Tēv
8Kētö yip tötmeuk tarik yip töng mātu, töthang inrē yip töng nānguvö.
9Hökngen yip pumnāmö tarik nö hēngö mūlö, hökngen yip tarik inrē nö hamūlö: Achiāp tökô in cha nö vë-eny ngih, hameukhömat ih inrē tö nuk lamā-urĕh? Hökngen cha nö kētö yip vamë-eny nö lā in cha, hòṅ cha nö chipngen: hēk hökngen cha nö hang, ngaich ngö ṙô, Kô-en ana.
10Yī-ö yin mameūkö chu, ṙô ngam Mā Tēv ngam tarik chu inrē katöllö chu: hòṅ yīö akahalōn ṙātö ellōn re inrē in chu, ngaich akaha elmat tö chu öich anga-aṅ; urēhĕkūö chu öt tēvu tö tö vī-i öt rēhĕn min nö lā unôichngöre tö chu,
11Höng chū-ö chin Mā Tēv; öt hōlu chin tö mahayööken.
12Ngāichô chin ve-eny, ngaich chin inrē hayööken, ngaich inrē hameukhöti, ngaich rö-öyö inrē tötohtöre tēv in yīö: lökten yin yī-ö vamënyen chu, ṙô ngam Mā Tēv, chū-ö chin inrē Tēv.
13Hôṅ, löktökūö ik misī chin Öich chū-ö Anga-aṅ; Öt hĕng tak tökô ṙamā-any nö ṙā-ang eltī chu: lā-evṙen chin ngaich achīö tökô nö asökngö tī chu tö e?
Rinānyö Ṙā-ang Pepilòn
14Ngö ṙô An ngam Mā Tēv, ngam ṙamānyen meh, ngam Tönghĕng Töhet aṅ Israĕl: Pòkūö yīö chin öich tīnhanga i Pĕpilön, ngaich kēten cha chū-ö min nö ṙòkhöre nö sā ma-afalngöre, pòrô yip aṅ Kāltī, ngaich nup ṙanāmölōn cha min nö havāngtu nö inrāmöre.
15Chū-ö chin Mā Tēv, Töhet in Meh, Vamīlen Israĕl, öp rācha yīö.
16Ngö ṙô an ngam Mā Tēv, ngam vamī talöökö nö el mai, kanröönö inrē nö el tökalēḵ mak;
17Ngam kamënyö inröl, kōra inrē, kumyung inrē nö kiyung; hulalngöre cha-a nö holtö ṙahre, Öt chōholre min cha-a hanyāngi cha-a min, ngaich sā hilā ëāṅvö nö nyangngö.
18Uh yin köpölōn tö nuk mu-urĕh, un rēhĕn nö ngëichka nuk hötṙeh.
19Yĕh meuk, vī tufömngöre chin; ngaich an nö sīöplöre öt meūkö e ömeh? Vī talöökö chin min el tönyalnyi kuyāyö.
20Eū-eu chin min tö töṙeūla aṅ elinchōn chakāl ôsrich inrē: pò chu kētö mak el tönyalnyi, tahël inrē el tönyalnyi kuyāyö, nö òk yip tarik chu, katöllö chu:
21Yip tarik vahī chu nö tarik chu pòn hōtu cha-a nö ṙô-òv tö nöinyö chu.
Tökööl Israel
22Sönngenre me-eṅ öt havëken chu, Ō Yāköp; me-eṅ pöri, Ō Israĕl, mahaṙeiken chu.
23Hö-ö man kētö kun sīṅp nö töföngö tökētu, öt rēhĕn öm eū-eu chu tö nup kahëtö meh in chu. Rö-ö chin lumnganken meh kētö tökētu, öt rēhĕn haṙiken meh tö tötahūsa paröm.
24Hö-ö me-eṅ havah lam-euṅh chu nö ṙāi tö rupīö öt rēhĕn öm hatööḵngen chu tö tösangöö kahëtö meh. Lumngānö chu pöri me-eṅ tö tökööl re, hachëyö chu me-eṅ tö öt lanöököre.
25Höng chū-ö chin Anga-aṅ samichngö nuk tanôichngen meh öich höng chööḵnyö töre: ngaich chū-ö min öt köpölōn tö nuk tökööl meh.
26Fēlen chu tā-a töi vë-ekūöre; hameuknyö ngam kahòkköre man, hòṅ meh hameuktu töchip.
27Köölö fālen ök yöng meh, ap vame-elkui meh inrē nö tôichngen nö in chu.
28Lökten chin hachōichngö yip mā ngam chūök töhet, ngaich chū-ö min kēten Yāköp, nö im öt inkôlò, Israĕl inrē im ötlinëkö elnang.
Currently Selected:
Isayā 43: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
