Isayā 38
38
Vāhav rācha Hesikīa, Öölö Inrē
(2 Rāch 20.1-11; 2 Kinṙöt 32.24-26)
1Hē nuk sakāmö anū-ö ang Hēsikia nö vahavö nö hòṅ kapah, yihtöre ngaich ök pròfĕt Isayā ök kikōnyö kūön Amôs, nö in ò, ngaich ngö ṙô tö ò, Ngö ṙô an ngam Mā Tēv, Halēnngen ngam patī re man; tön kapah man min, öt aṅ. 2Havööngökūöre ngaich Hēsikia nö i kaha patī, ngaich vë-ekūö ngam Mā Tēv, 3Nö ngö ṙô, Vë-ekūö meh chin Ō Mā Tēv, köpölōn tö inlaha chu ngaich lök i kūö meh i kanô-en holtö töteung ellōn inrē, ngaich Hēsikia nö peuiny. 4Ngaich yih ngam ṙô ngam Mā Tēv nö in Isayā, nö ngö ṙô, 5Kuṙòh, ngö ṙô man tö Hēsikia, Ngö ṙô an ngam Mā Tēv, ngam Tēv ök yöng meh Tāvit, Ngaich chin hang ṙô meh vë-ekūötēv, ngaich öich meuk nuk mak mat meh: yĕh meuk, taneui sīön samyeūheu tī chin ṙūöten në sakāmö meh. 6Ṙānyen meh chin inrē tö ngih elpanam ṙā-ang eltī öp rācha aṅ Asīriā: laklö ngih elpanam chin min inrē.
7Ngih ön min minkahngö nö in meh aṅ im Mā Tēv, tö ngam Mā Tēv min nö la-evṙen tö ngih ṙô ò; 8Yĕh meuk, vīten ngam nyat chin min i kui minë vanāngö meh, ngam tö ngaich nö lataṙeū tö vanāngö Ahas nö im tavūöi, nö heūlrit re nö söm vanāng, lökten ngam tavūöi nö söm vanāng nö heūlrit re nö im vanāngö ò sin nö kū-ötö lataṙeū.
9Tökūichö ön ngih tö Hēsikia rācha aṅ Yūtā, hē ò nö vahavö, ngaich lööken nö hēk tök invah re:
10Ngö ṙô chin, I saha ranòngti nuk sakāmö chu ngaich chū-ö min chuh kūö inkūp Anūlö; ngaich chin haṙöömiṙen tö chööḵ nuk samyeūheu re.
11Ngö ṙô chin, Hö-ö chin min meuk kūö ngam Mā Tēv, Anga-aṅ ngam Mā Tēv, i panam tö-aṅ; Hö-ö chin min ōtre mat meuk tarik öich in yip aṅ ngam panam.
12Ṙūöhöyö an ngam ṙētö chu, kē-ĕyö an inrē nö ṙā-ang in chu sā rūkui yōm pököre: lömngö ngam nômö re chin ngaich sā tī kumpāt hilā; rökiṙen chin min tö ò ṙā-ang im chūöktī kumpāt hilā: löktökūö ngih sakāmö i ngih hatööm min me-eṅ keuheūtö tī tö chu.
13Söllö peuheū chin hachēvngenre; sā lāyön, lökten anga-aṅ ngaich nö likölngö në tangëḵ chu: löktökūö ngih sakāmö i ngih hatööm me-eṅ min keuheūtngen chu.
14Sā öp tömarô-òl likeun chehechōn, ngatī tinkākö ṙô chū-ö; sā miṙivlōn pumpa chin: öt meuk në mat chu nö ngëichkö lātulöng; Ō Mā Tēv; taṙamtöre chin, me-eṅ man yēḵ chūök inköpngö chu.
15Sitih ṙô öich min? Hĕnghöre ṙô-òv an nö in chu ngaich tī tö e inrē: hòṅ haṙēmngö röönre chin kiröönngöre i tūmö në samyeūheu chu kūö ṙôkö miṙivlōn chu.
16Ō Mā lökten i në yin vē tarik nö aṅ, keuheūthötre inrē ngam nômö nö im ma-alaha chu: lökten man yēḵ havānö chu, vīten chu inrē aṅ.
17Yĕh meuk kūö lanāmö an nö in chu lökten chu kiröngö miṙivlōn: Hāngen pöri me-eṅ tö ngih nômö chu öm ṙānyö e ṙā-ang el anūlö chūök töchahū-uyö: pò meh ngaich kavalngö nuk tökööl chu nö lā-uk chu.
18Pò ngam Anūlö nö ötkô nö ha-öinyö meh, ötkô ngam kinpaha nö hapōilen meh: yip chamuh el anūlö ötkô nö meūkkö ngam kanô-en meh.
19Ngam tö-aṅ, anga-aṅ min maha-öinyö meh, sā chu chū-ö in ngih sakāmö: ngam yöng vē nyīö min meumkahtölōn cha tö ngam kanô-en meh.
20Höngöre an ngam Mā Tēv nö hayööken chu: lökten in min tikökṙôre tö në tinkökö chu i tö-inrötu ranöng irô-òtö sakāmö hī aṅ el patī ngam Mā Tēv.
21Ngaich ngö ṙô ang Isayā, Hökngen cha nö kē anychīr tömūlö, ngaich ṙātö e i kūö ngam vah nö intāp, ngaich lööken min anga-aṅ: 22Ngö ṙô inrē Hēsikia, Asuh ap min minkahngö hòṅ chu chuh el patī ngam Mā Tēv.
Currently Selected:
Isayā 38: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
