Isayā 37
37
Hòṅ Halēnö Ngam Rācha Tö Īsayā
(2 Rāch 19.1-7)
1Ngaich ngö inlahen angū-ö, hē ök rācha Hēsikiā nö hāngö e, tikachngö inyut re ngaich anga-aṅ, ngaich kahumlöre tö sāk, chuh el patī ngam Mā Tēv ngaich. 2Tīnngen Ēliākim ngaich anga-aṅ, ök yōm patī, Sipnah inrē ök kamūich, tö yik minṙöinylen kūönṙô inrē nö kahūmöre tö sāk, nö chuh in ök pròfĕt Isayā ök kikōnyö kūö Amôs. 3Ngö ṙô ngaich cha-a tö ò, Ngö ṙô öp Hēsikia; Sakāmö kanihngen ön ngih, inkësö inrē, öt linëken inrē: pò vē nyīö nö yih nö im fīnötnyö re, ngaich öt kumlē-ĕvö nö kayô-òinyre. 4Lohten an ngam Mā Tēv ngam Tēv meh nö hang nuk ṙô Rapsakē, ök tötīntu tök yöng re rācha aṅ Asīriā nö miṙēngö ngam tö-aṅ Tēv ngaich vëkö nuk ṙô min nuk töhāngö tö ngam Mā Tēv ngam Tēv meh: lökten man yēḵ vë-ekūötēv vë-elkui vē chööḵṙen tö-ōtre.
5Yihtöre ngaich yik tarik ök rācha Hēsikiā nö in Isayā. 6Ngö ṙô ngaich Isayā tö cha, Ngö ṙô yin tö yöng re, Ngö ṙô An ngam Mā Tēv, Uh yin pa-ekūö tö nuk ṙô ahang yīö, nuk ṙô yik tarik ap rācha aṅ Asīriā nö ötlēkôre tö chu. 7Yĕh meuk, kēhöt ma-alaha chin min in ò, ngaich anga-aṅ min nö katūöya elnang nö hang, ngaich havantöre min nö i panam re; ngaich chū-ö min inrē vīten ò nö fukngö tökūö fël nö i panam re.
Söömtö Tahëng Chamökṙen Hēk Yik Aṅ Asirīa
(2 Rāch 19.8-19)
8Havanritre ngaich Rapsakē, ngaich kôtökūö tök rācha aṅ Asīriā nö kiyung lā-al Lipna: pò ò nö hāngan nö ngaich nö ṙā-ang Lakis. 9Ngaich anga-aṅ nö hang ineūkö Tīörhaka ök rācha aṅ Itiōpia, yih ap nö lā-al meh nö kiyung. Ngaich hē ò nö hāngö e, tīnngö ma-ahānga ngaich anga-aṅ nö in Hēsikiā, nö ngö ṙô, 10Ngö ṙô yin vë-ekūö ap rācha Hēsikiā aṅ Yūtā, ngö ṙô, ngö ṙô, Uh an ngam Tēv nö hachīlö meh ngam chūök meh hayönglenre, nö ngö ṙô, Öt kētu an min Yērusalem nö eltī ap rācha aṅ Asīria. 11Yĕh meuk, ngaich man hang tī yip rācha aṅ Asīriā tö në panam nö ṙòkhöre nö hatngö tī nö tīṙōlngö u: ṙānyu öm min me-eṅ? 12Kô nup tēv vē pumnāmö tarik nö ṙānyen cha, nup tötiṙōli tö yik yöng chu, Kōsen, Haran, Rēsef, tö yip kūön Ēten yip mi-ī Telasār? 13Isuh ap rācha aṅ Hamat, Isuh ap rācha aṅ Arpat, ap rācha inrē aṅ elpanam Sefarvēm, aṅ Hēna, Aivah inrē?
14Ngaich kē ök līpöre Hēsikiā nö ṙā-ang eltī yik ma-ahanga, vë-ekūö e ngaich: chuh el patī ngam Mā Tēv ngaich ang Hēsikiā, fehnyö mat e ngaich nö i kūö ngam Mā Tēv. 15Ngö ṙô ngaich ang Hēsikiā nö vë-ekūö ngam Mā Tēv, 16Ō Mā Tēv yip tömaṙôngö, Tev Israĕl amūichhaka nö ihôi nup kërup, Më-eṅ man Tēv, Me-eṅ höng hĕng tak i në pūlngö ngih tumlat nö ṙòkhöre; Me-eṅ man vamīlö halīöngö tumlat inrē. 17Ō Mā Tēv asītö elnang re man, öm hang; Ō Mā Tēv, milaklö mat re, öm ngëicha: hang në ṙô Senakerip në tö söömtu nö minṙēngö ngam tö-aṅ Tēv. 18Mā Tēv, kô-en yip rācha aṅ Asīriā nö tiṙōlngö nuk panam nö ṙòkhöre tö panam cha inrē. 19Ngaich nö kavalhöt nuk tēv cha nö i kūö tameūyö: pò u nö öt tēv, tön vahī kuntī tarik, chōn ihong inrē; lökten yip nö tiṙōlngö u. 20Ō Mā Tēv, Tēv ih, lökten man ngaich hayööken ih töngamuh ṙā-ang eltī ò, hòṅ në pūlngö në tumlat nö akahakūö tö meh öm Mā Tēv, Öm me-eṅ höng hĕng tak.
Ṙô Īsayā Nö Ik Rācha
(2 Rāch 19.20-37)
21Ngaich ang Isayā ök kikōnyö kūön Amôs nö ngö ṙô, nö söömhöti nö in Hēsikiā, Ngö ṙô An ngam Mā Tēv, ngam Tēv Israĕl, Pò meh vë-ekūö chu öm lā-al Sanakerip öp rācha aṅ Asiria, 22Ngih ön ṙô ngam Mā Tēv tö inlahen ò:
Öt kūöngenre an tö meh ngam rēlö kikānö kūön Sīyôn minônngen meh an inrē nö hayīölngen meh: kichinykūöre an nö in meh ngam kikānö kūön Yērusalem.
23Achiāp miṙēngö meh öt lahēkö el nang meh inrē, lā-al chīö öm inrē öm hapōilö ṙô re môklökūöre inrē öm lātulöng? Öm höng lāklö ngam Töhĕng Töhet in Israel.
24Miṙēngen ngam Mā man ngaich öm lökten in yip tarik meh, ngaich inrē öm ngö ṙô, Holtönë töpōyen chin inröl min öich yih i kui minë tömarô-òl kui rôngö, öich asöl hötre in nup latuhēt alaha Lëpanön: ngaich chū-ö min inrē kūöltö nup sītör chōn tömarôlòng nup för inrē chōn tölöök umuh: ngaich kuhēthötre chū-ö min el ap manā-angkūö rô-òlkui ap in ò, in öp el inchōn ò töpòyen aṅkūö tö ṙòng el panô-òṅ ò.
25Keuheūten chin ngaich ul, òk mak inrē, aṅtī tö kulôichröön re chin min inrē hanyôngö nup tahël Aikup.
26Hö-ö öm ngaich hang tī chu misī tö e marô-angen, ngaich vīlö e hē nuk misī? Ngaich chin töngamuh hateungtökūö e, tö meh min öm piyāingö nup tökinlōngu panam nö payāi nö fônghakṙen.
27Lökten yip aṅkūö e nö tökūöṅnö kumlēḵ, vööngen yip nö ngaich kalūöchöre el kui inrē; höng sā kiyôp ngam el kahôyö yip, sā nup tö-ayālö rōl kun chōn inrē, sā nup tingūyö i kui patī, sā öp panô-òn sainy inrē urēhĕkūö e nö sīöplö aṅkūö.
28Akahalōn pöri chū-ö tö anūichö meh, tö kunnyī-iny meh, tö kunhēthöt meh inrē, tö ngam tanānyö meh tö chu inrē.
29Kūö ngam tanānyö meh tö chu, ngam kanësen meh inrē nö yih nö elnang chu, lökten chin kavòkhötkūö ngam inkāl elvāng inrē nö i minuh meh, ngaich chū-ö min havöökūö meh ip talöökö löktö meh sin öm yih.
30Angū-ö ön min ngih minkahngö nö in meh: i ngih yin min samyeūheu nyā-aṅvkūö tö nup töng samīöplöre, ngaich im innët samyeūheu tö nup ṙamā-ang in u nö sīöp; ngaich im linūöi samyeūheu yī-ö teūich hamūl inrē, teūichtö vāin inrē, ngaich nyā ṙòng u. 31Ngaich yip chööḵṙen töt kô-òngvah aṅ patī Yūtā min nö hēk nö ṙēhtöre nö eltumlat, ngaich ṙôngu nö lātulöng. 32Pòn löknyö ël Yērusalem min nö kiröönngöre yip chööḵṙen, löknyö ip Rung Sīyôn inrē yip töt kô-òngvah min; hateungngö e an min ngam kumlēḵlōn ngam Mā Tēv yip tömaṙôngö.
33Lökten an; ngam Mā Tēv nö ngö ṙô tö inlahen ap rācha aṅ Asīriā, Öt yih ap min nö i ngih elpanam, ötrēhĕn nö lirenynyö chòk, öt rēhĕn nö yih nö i kūö e nö kumtö lanaklö, ötrēhĕn nö afônglö chūök re nö lā-al e. 34Löktö im talöökö ò nö yih, ngaich lök in e min anga-aṅ nö havanritre, ngaich öt hēk min anga-aṅ nö yih nö i ngih elpanam, ṙô ngam Mā Tēv. 35Pò chu min laklö ngih elpanam öich hayööken e, öich chööḵnyöten tö re, chööḵnyötentö ök tarik chu inrē Tāvit.
36Kiröönngöre ngaich ök ma-ahanga ngam Mā Tēv, ngaich ik elyöngö yik aṅ Asīriā nö fëlngö yik tö taneui köiny hēngòng hëvhöre anāi: ngaich hē yik tarik nö ka-euilökūö nö chōholre tö peuheū, yĕh meuk ṙòkhöre cha-a nöng alaha kupah. 37Lökten Senākerip ök rācha aṅ Asīriā nö kiröönngöre ngaich havan, nö iyöng Ninēve. 38Ngaich ngö inlahen angū-ö hē ò nö salām nö el pati Nisròk ök tēv ò, ngaich Atrammelek Sarēsĕr inrē tö yik kūön ò kikōnyö nö fëlngen ò nö aṅtī tö fël: meutngö cha-a ngaich nö ip panam Araret. Hayöng ngaich nö ṙënngen ò ang Ēsarhatön ök kikōnyö kūön ò.
Currently Selected:
Isayā 37: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
