Isayā 35
35
Talöökö Hanëtö
1Ṙāmölōn min öp elinchōn töp chūökö inrē töngesngö; ṙāmölōn ngam tönyalnyi inrē, pöpnyöre kūö ṙòng inrē sā pūl.
2Pōyen panöpnyöre kūö ṙòng angū-ö min, ngaich ṙāmölōn ṙô nö tikökṙôre: kētu min öp kanôlò Lëpanön nö in e, öp tölngö lanöökö Kārmel Saròn inrē: meuk kanôlò ngam Mā Tēv min cha-a ngam tölngö minā-aṅ Tēv hī.
3Hangëken nup töt kalē-en yin kël hakôpkö nup tökichëyöre kui kinmônö.
4Ngö ṙô tö cha yip töt kalē-en ellōn, Hangëṅeṅre yin, ui pa-ekūö: yĕh meuk, yih an min ngam Tēv yīö nö kumtö invahalvah, kumtö inṙënngö aṅ im Tēv: yih an min nö hayööken yīö.
5Ngaich min yip tötmeuk nö löpnyöre kūö mat, nup elnang yip töthang inrē nö löpnyörekūö.
6Ngaich öp tökaṙòk tarik min nö tisôköre sā hāt, tikökṙôre min inrē öp litāk öp tötsalōhoṙō: pòn eltönyalnyi min nup mak nö pòplö, el tönyalnyi inrē nup kun töhëm mak.
7Ngaich min ngam töpachāla elmat kuyāyö nö vītöre nö mak törūngö ngaich ngam töyal tumlat nö löklö mak: im elyöngö nup am aṅ elinchōn, i chūök u nö hulalhaka, nup kiyôp min holtö tafūyu tö nup kinpāp inrē.
8Ngaich tökiröng talöökö min ap umuh, talöökö inrē ngaich kaheūkö min angū-ö nö Talöökö Hanëtö; öt lök in e min yip tökuvīö; talöökö cha pöri min angū-ö: öt kānken e min yip kumröön tarik, hôṅ, yip tökulō-ov.
9Öt umuh min lāyön, ötrēhĕn nup töyal töṙeūla min nö kiröönngöre nö umuh, öt kôti anū-ö min nö umuh; yip töhavaha pöri mahavötköre nö umuh:
10Ngaich havantöre min yip töhavaha tö ngam Mā Tēv, ngaich yih nö i Sīyôn nöng tikökṙôre; ngaich i kui cha min öp tötchanūhuvṙen ṙanāmölōn: ngaich cha-a min nö teūngen tö ṙanāmölōn, ngaich ngam miṙivlōn töngam anū-unglōn min nö falngöre.
Currently Selected:
Isayā 35: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
