Isayā 34
34
Öt Hakòlò Yip Lā-al Re An Min Ngam Tēv
1Haröhtöre tā-ih, öi hang yī-ö pumnāmö tarik; hangihtöre inrē yī-ö tarik; hökngen ngih tumlat nö hang, nup tanöö-öl e inrē; ngam panam, nup chehen lamöklö in e inrē.
2Pò ngam Mā Tēv nö lanīnuvö nö in vē pumnāmö tarik nö ṙòkhöre, angëṅṙö tanānyö inrē nö in yip kumyung in cha: hatngö tī an min nö fëlngen cha, kēten cha an nö in öp famëlhanga:
3Kavāli min inrē yip töfëli in cha, veūklö min öp inngeūṅtö nup tökapah alaha cha, yëngö min inrē minë rôngö nö i nup mahām cha.
4Ngaich ṙòkhöre min nö ayëṙi nup aṅ ngam halīöngö, ngaich minë halīöngö min nö löömi sā chatrāi: ṙòkhöre nup aṅ u min inrē nö chaṙēvi, sā öp tönyīkngö rōi chōn inrē ip anychīr chōn.
5Pò ngam sanët nö töö-öngkūö nö òk nö el halīöngö: yĕh meuk, yônti an min nö i kui Ētöm, i kui yip tarik inrē törūtivah tö chu, nö im inkaha fālen.
6Tööḵngen an ngam sanët ngam Mā Tēv tö mahām, kiröng alaha an nö ngaich tökūö tösangöö holtö mahām kun pököre tökiröng pököre, holtö tö sangö el kilpong kūön sīṅp: pò ngam Mā Tēv nö kētö tökētu nö i Pòrah, i panam Ētöm inrē yip tö pōihangvah nö fëli.
7Peūtöre min nö hol cha nup hanchōn kōiny nuā, holtö nup kōiny inrē nup nuā; ngaich min ap panam cha nö hiyōi tökūö mahām nup pitung cha inrē nö sangööṙu nö kiröng alaha.
8Pò e nö sakāmö invahalvah aṅ im Mā Tēv, samyeūheu inṙënngen i kinīlö Siyôn.
9Ngaich nup kun töhëm mak min in e nö vīngöre nö paröm, nup tumlat e inrē nö ihong töhūkūö, ngaich min ap panam umuh nö vītöre nö paröm töhūkūö.
10Ötrēhĕn tö hatööm ötrēhĕn tö sakāmö min angū-ö nö hannyangngen kūö; ngaich min öp lul e nö öt heumköre nö kū-ötö lātulöng: ngaich angū-ö min nö öt aṅhaṅvkūö nö kaheuk tumköl chap; öt hĕng tak min lamök in e nöng örheūheu söl môkö.
11Yōm e pöri min nup Peliken Pôrkupāin inrē; iyöng ël e min mingeūṅkö kavöö inrē: ngaich anga-aṅ min nö hateut öp tökuvaha kinlūöich elkui nö i kui e, öp ihong inrē töng öt aṅhaṅv alaha.
12Havëkö yip mā min cha-a aṅ kūö ngam pūlngö, öt hĕng tak pöri min umuh; ṙòkhöre min yip kūön rācha min nöng törö-övö.
13Sīöplö min inrē nup töchökhu nö ël nup patī rācha ò, nup töchökhu rōi inrē nö el nup chūök kumyung; ngaich angū-ö min nö elyöngö am aṅ el inchōn, chūök nup Ôsrich.
14Ngaich min nup hanchōn töṙeūla el tönyalnyi nö meuk kūö re tö nup am aṅ el inchōn, nup kōiny pököre inrē nö mëkö öp holre; hôṅ, iyöng in e min öp tökiröng chehechōn mahavöt hatööm, ngaich kôtökūö min tö chūök re nö heūheure.
15In e min öp mingeūkö nö vīlö uhum re, ṙōlhaka ngaich, yum uhöö inrē hamūlö u inrē nö el nyat ò: hôṅ, in e min nup matēṙö nö hamūlöre, kö hol tö pīhöre.
16Chöh aṅmat ngam līpöre ngam Mā Tēv yin, vë-ekūö e ngaich: öt hĕng hang min tö në törö-övö; öt hĕng nòng min töhòṅ pīhövö: pò ngam elvāng chu nö chöngu nö ngaich tö e, hamūlö cha inrē öp ma-alaha aṅ in ò.
17Ngaich anga-aṅ inrē nö kalah taneūngen tökūö cha, ngaich öp kël ò nö michöö-öng e nö in cha nö aṅtī tö tökuvaha: ngaich cha-a min nö örheūheu nö amīnutö e, iyöng in e min cha-a nö kaheuk tumköl chap.
Currently Selected:
Isayā 34: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
