Isayā 33
33
Invëkö Hinòlṙen
1Tötkôlò man me-eṅ, me-eṅ kamil töt chehenre, ngaich rö-ö me-eṅ kīlö chehen; me-eṅ inrē tömichūḵ chanökhuṙen, ngaich cha-a nö öt michūḵ chanökhuṙen tī nö in meh! Yē meh ṙāngenre kil töt chehen re, ngaich kīlö min me-eṅ; yē meh keheūten michūḵ chanökhuṙen, ngaich cha-a nö in meh.
2Ō Mā Tēv aṙē-ĕlōn man yēḵ tö ih; ngaich in höng hökken meh: kaheuk peuheū man yēḵ öm kël cha, inyöölen ih inrē hē el kanihngen.
3Falngöre yip tarik i ṙënṙô öp tinṙōlen; parāti vē pumnāmö tarik i hē meh hachônglöre.
4Ngaich nup pôḵ meh min nö hamūlö sā tī nup kata-ëm nö hamūlö: sā röön hāyö cha-a min nö kumööi kui e.
5Hapōilöng an ngam Mā Tēv; pò ò nö iyöng lātulöng hatööḵlen Sīyôn an tö inkaha fālen lanöökö inrē.
6I nup hē meh min nö köp inyöölen nö pōyen, mikah, inkaha inrē: ngam pinhe-eṅkūö tö ngam Mā Tēv töpōi ṙāi nö chehen ò.
7Yĕh meuk, hū-a yin më töt pa-ekūö in ò nö lā-uk: kihīökkūö yin nö peuiny më tanölöṙô aṅ hôi nö vame-eny lanāmö.
8Piyāyi nup tökiröng talöökö, ṙā-ang röön re yip tarik kumröönköre: ngaich an nö filalngö ngam kinlēḵngô, öt kūöngen re an tö në elpanam, öt chumkūöṙen an tö tarik.
9Haṙivlōn an ngam panam öt kalē-en inrē: sirōngkūö an Lëpanön nyangngö inrē nö ngaich: sā elnyalnyi an Saròn; ngaich Pasān Kārmel inrē nö piṙōngngö nup rōi re.
Ṙô Ngam Tēv Nö In Yip Lā-al Re
10Ngaich chin hòṅ chōholre, ṙô ngam Mā Tēv; ngaich chin hòṅ hachônglöre; ngaich chin töngamuh hapōilöngö.
11Hakūön tö uk nëlö yin min, kumṙen tö kaṙālö afō yin min: tameūyö ap unhômö yīö mahaṙāpngen yīö min.
12Ngaich min yip tarik nöng sā finöngö lanit: sā kinūöltö töchökhu kaha, nup töfönghötvö nö i kūö tameūyö.
13Hangihtöre, tö tī chu, yī-ö tömarôvat: yī-ö inrē töröhta, akahngen ngam kumlēḵ chu.
14Pa-ekūö yip tököölö fālen i Sīyôn; rötlö yip töt tēv tö kinchëyöre. Achīö öp in hī min mi-iyöng el kūö ngam tameūyö töṙāpngö kūö? Achīö ap in hī min mi-iyöng el ngam tötnyangngö hanūṙökūö?
15Ngòh tölöök röön nö kiröönngöre, tölöökö ṙô inrē; ngòh töt chumkūöṙen tö taneunglen lamökten i inkihten, ngòh fumlinynyö kël re nö i ṙinapkö raneushö minyôiny-aṅ, ngòh tumlupngö kūö mahām, meuichngö mat re inrē nö i nginëchkö tötlöök;
16Iyöng lātulöng min anga-aṅ: ap chūök lanaklö ò min tö nyahatī tö ihong: kētu nyā-aṅkūö min anga-aṅ; köp min nup mak ò.
Ngam Kanòlò Min Unôich
17Meuk ap rācha min nup mat meh ip vanāyö: meuk öp töpōiti panam cha-a min.
18Piṙūtken pinhe-eṅkūö min ap ellōn meh: isuh ap kamūich, isuh ap kamlah lumngan masūl? Isuh ap kamheuṅk chūök chamônga?
19Öt meuk yip tötainy man min tarik, yip tarik lamöklö el kilööpre ṙô ötkô me-eṅ meūkö cha; yip tötohtöre ëlô lökten meh öt akaha elnang.
20Ngëichtökui Sīyôn, ngam elpanam chūök tökiröng nyinā-aṅ: meūkö Yērusalem nup min mat meh nö chēvhakaṙen aṅkūö, rūkui töt kē-ĕyö min, öt teuklöng min inrē nup tösaptu chōn, öt rēhĕn nup tökuvaha nö latôki.
21Umuh pöri ngam Mā Tēv nö in hī nö ip minā-aṅre, ip chūökö töpōiti ël tahël kun töhëm mak inrē; ötkô nup kupòk tö kaneūtu nö in e min, öt rēhĕn nup chōng töt pinhë-eṅvkūö nö lök umuh.
22Pò ngam Mā Tēv nö ma-akaha fālen hī, kamëtö chöngö hī ngam Mā Tēv, rācha hī an ngam Mā Tēv; anga-aṅ an min mahayööken hī.
23Tayōla nup inröt kanāmö meh; ötkô nup nö hangëḵlö rööntö ngam kanāmö meh, öt nyāknyi tī min tö ngam intĕh: ngaich michöö-öyö nup töpōyen aṅ kinīlö; kē lumnööṙöre ngaich ngam tökaròk.
24Öt ngö ṙô min yip aṅ panam, vahav chin: aṙēlöng tökööl min ngaich yip tarik mi-iyöng in e.
Currently Selected:
Isayā 33: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
