Isayā 32
32
Rācha Hol Tö Lanöökö
1Yĕh meuk, hĕng tak öp min rācha mahayöng nö i lanöökö, hayöng inrē yip kūön rācha nö i inkaha fālen.
2Ngaich min öp tarik nö sā chūök innyatlö tö kuföt, innyatlö inrē tö chanôchö panam; sā nup tahël mak i tönyôṙökūö chūökö, sā nyat öp tökiröng ihong ip tö cheingö panam.
3Ngaich nup mat cha yip mameuk min nö öt paṙeūma nup elnang cha inrē yip hamang min nö hang.
4Öp ellōn inrē tökurat min nö akaha elmat tö mikah, öp litāk yip tösiknyô min nö kaknyöre nö löökö ṙô.
5Öp tökulō-ov tarik min öt ngöhöre invëka nö tö-akaha, öt rēhĕn öp tö-akaha nö töt milip invëka min.
6Pò öp tökulō-ov tarik min nö ṙôtö kumlō-ov ngaich öp ellōn ò min nö vī öt lanöökö, harūnöre nö i inchōichngö, kaknyö tövaich inrē nö lā-al ngam Mā Tēv, nö ahatnyö aṅ ellōn ngam tökapahare, ngaich vīngen òk ngam töhaṙëhe nômö nö öt teunglen.
7Nup aṅtī ngam töt akaha inrē nö öt lanöökö: vī aṅtī re anga-aṅ tö tötlöök nö fëlngö ngam yāich nö aṅtī tö ṙô minyôiny-aṅ, nö pòrô ngam yāich nö chīpö ṙô.
8Ngam töt milip pöri vī talöökö nup töt milip; ngaich im öt milip min anga-aṅ nö iṙūöhen.
Inkāha Fālen Tö Ngam Chanòhòl
9Yī-ö kikānö töng kumchikngenre, chōholre yin, hang ṙô chu; yī-ö nyīö kikānö töt chumkūö-aṙen, kētö elnang re yin i ṙô chu.
10Pò nup sakāmö unôichrit töhĕng samyeūheu min nö tökihngen nö in yīö, yī-ö kikānö töt kūöngen re: pò öp panô-òṅ vāin min nö öt kôlò, öt yih min öp hē inmūlö.
11Yī-ö kikānö töng kumchikngenre, kichëyöre yin; hakihtenre, yī-ö tötkūöngenre: luhngö hilā re yin, chumlal inrē ngaich fūmlö sāk i ṙat yīö.
12Pò cha min nö kōk elngòh re tökūö nup tökôlò panô-òṅ, kūö nup töṙônguvö inrē vāin.
13Pò ngam tumlat vē tarik chu min nö sīöplö aṅkūö tö töchökhu kaha kun chōn; hôṅ, i kui nup patī ṙanāmölōn nö ṙòkhöre im töṙāmölōn elpanam.
14Pò nup patī rācha min nö ṙā-ayö; öp elpanam min töpōyen aṅkūö nö ṙā-ayö min; ngam rung töm chūök chamônga inrē min nöng kinlūhu nöng örheūheu, chūök ṙanāmölōn nup hanchōn köttö chūök nup töṙeūla inrē nö nyā;
15Hanöng saha öp ma-alaha nö hōngtu nö i kui hī nö ṙā-ang lātulöng, ngam tönyalnyi inrē nö vītöre nö panô-òṅ tötööḵlö tö ṙòng, ane inrē ngam töpōi aṅ panô-òṅ nö kaheuktu nö elchūölchōn.
16Ngaich min öp inkaha fālen nö iyöng el tönyalnyi, ngaich ap lanöökö min nö köp nö el ap panô-òṅ töpōyen aṅ tö ṙòng.
17Lanāmö min öp la-en ngam lanöökö; ṙanëmen öp tī ngam lanöökö inyönglen inrē nöng örheūheu.
18Ngaich min vē tarik chu nö tölām nö aṅ panam, iyöng el töt kanyīcha chūökö inrē, i töchēvhak inrē chūök haneūheu.
19Ha-öinytu pöri min angū-ö ngam fanukngö ngam elchūölchōn; ngaich ngam elpanam min nö piṙāptukui.
20Tökôlò yin yī-ö tameūich i taseū mak, samöömtö kalröön nuā köttö inrē.
Currently Selected:
Isayā 32: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
