Isayā 30
30
Chök Alāha Lanāmö Nö In Aikup
1Tötkôlò yin vē nyīö ma-ahôngen, ṙô ngam Mā Tēv, vē kamë inlēnö, hö-ö pöri nö ṙā-ang in chu; vē mahanyatngöre tö inyatngö, hö-ö pöri nö ngam aṅ in chu ma-alaha, pò cha nö hòṅ ṙūöhten ngam tökööl nö im tökööl.
2Yip kumröönngöre nö hòṅ chuh Aikup, hö-ö pöri nö havëtôre nö elvāng chu; nö hangë-eṅre cha-a nö i kumlēḵ Fërō, hayönglen re inrē nö elnyat Aikup.
3Lökten ap min kumlēḵ Fërō nö sinrōngkūö yīö, ap inyönglen inrē elnyat Aikup nö chinvīlö elkui yīö.
4Pò yip kūön rācha ò nö i Sō-an yip tanölöṙô ò inrē aṅ hôi nö yih nö i Hanes.
5Ṙòkhöre yip min nö sirōngkūö tö yip tarik tötkô nö kôlò tī tö cha, yip töt hamòlṙen ötrēhĕn nö kôlò tī, sinrōngkūö pöri minṙēngö inrē.
6Ngam ṙô ngam Tēv i nup töṙeūla Nēkĕp, Lökten impanam kanihngen chanökö inlöinyö inrē, löktö öp kan lāyön nö yih ap kōiny lāyön inrē, töp pēch inrē, tayuk nup kanôlò re cha-a nö i neūyö nup tö-ayal köttö, nup töpōi ṙai chehen cha inrē nö i uk ūṅt, nö chuh in yip tarik yip töthōḵ nö kôlò tī tö cha.
7Pò Aikup nöng chök alaha nö holṙen, öt taneungluṙen inrē: lökten chin kaheūkan nö Rāhap ap töt mahalöinyköre nöng ūichhaka.
Milôṙen Tarik
8Yĕh pöichö kuṙòh, kūichö e i ikūö cha i mat öp tömitāk, kūichö e inrē i mat līpöre, hòṅ e nö töhēṙu yanīhih nö töng örheūheu.
9Pò vē tarik nö ma-ahôngen, nyīö tö minyôiny-aṅ, nyīö töt hòṅ hang chöngö ngam Mā Tēv:
10Vē tö ngö ṙô tö yip mameuk, Uh yin meuk; tö yip pròfĕt inrē uh in vënyu nang tö nup töchiplen, vë-ekūö ih tö nup töfaṙëcha ṙô, vë-eny minyôiny-aṅ:
11Kānngöre yin töm talöökö, kānngöre töm kanröönö, viten ngam Töhĕng Töhet in Israĕl nö ṙā-ang re nö i kūö ih.
12Lökten an nö ngö ṙô ngam Töhĕng Töhet in Israĕl, Pò yīö ötkūöngen tö ngih ṙô, ngaich hayönglenre i inkihten öt lanöökö inrē, ngaich haköpngöre i kui u;
13Lökten ön ngih ötlanöökö min nö in yīö nö sā öp tömëngö töhòṅ fukngö, tikōlnyöre nö marô-òl chūök i kaha öp kinlōngö, öp tötaṙöli min nöng lūktenre.
14Ngaich anga-aṅ min nö sā tī öp vamī tanīöyö nö likukngö e, likukngö e nö kiṙöpiyö nö öt aṙēlöng nyaha; hòṅ e min nö öt hĕngtit linrākö tökôti nö tanôpnyö tameūyö nö ṙā-ang el tisum, hēk inrē ötkô nö fanòk mak nö el öp chūök mak.
15Pòn ngö ṙô ngam Mā Tēv, ngam Töhĕng Töhet in Israĕl, Yöölen yin min yĕi havan heuhtöre inrē; im höng nganöhö an ngam kumlēḵ yīö im inyönglen inrē: ngaich yī-ö sōḵ.
16Ngö ṙô pöri yī-ö, Hö-ö, pò ih hòṅ falngöre i uk kōra; lökten yin min falngöre: ane inrē, I uk nup töveut in min; lökten yip min lamū-u yīö nö töveut.
17I kanësô öp töhĕng tak min nö falngöre yip töhĕng köiny; i kanësô yip tötaneui tak min yī-ö falngöre: hanöng saha yīö min ötōtren höng sā kanāmö i kui ngam rôngö, sā pantēra inrē i kui ngam rung.
18Lökten an min ngam Mā Tēv nö höktöre, pò ò nö hòṅ aṙē-ĕlōn tö yīö, lökten ò min inrē nö hapōilöngö, pòn hòṅ aheūkölōn tö yīö: pò ngam Mā Tēv nö Tēv inkaha fālen; tökôlò yip cha-a yip hamökken ò.
19Pò yip tarik min nö iyöng Sīyôn nö i Yērsalem: hö-ö min me-eṅ ngaich ngöhöre ṙô peuiny; kô-en ap min nö aṙē-ĕlōn tö ṙô meh peuiny; yē ò min nö hang, sapṙô meh min anga-aṅ. 20Pòrô ngam Mā nö kē-ĕkūö meh tö nyā-aṅkūö inkihten mak inkihten inrē, sön min yip mahaköpten meh nö öt hanyāti nö hēk, kôta mat pöri min me-eṅ meuk yip Mahaköptöre. 21Minë elnang meh min inrē nö hang ap ṙô lā-uk meh, nö ngö ṙô, Ngih ön talöökö lök in e yin, yē yīö kān lāhāmö, yē yīö inrē kān lātavē. 22Ngaich yī-ö min hachōichngö kaha nup rupīö töka-īpö insātēv meh ane inrē nup töhaṙungtu ip töhaṙöichö humlum insātēv meh: kavalngö u min me-eṅ nö sā sin-òkkūö: ngaich ngö ṙô min me-eṅ tö ò, Kē-ĕngre man ṙā-ang hih. 23Ngaich anga-aṅ min nö kētö kumṙah kulöl meh, hòṅ meh aṅtī tö u teūich ngam tumlat: nya-aṅkūö inrē nup tösīöplöre ṙôken nö el ngam tumlat kôlò min angū-ö pōyen aṅkūö inrē: ip sakāmö angū-ö nup nuā meh min nö pōiti chūök nö nyā-aṅvkūö. 24Ngatī inrē nup kōiny nuā tö nup tö-ayal köttö kumköh ngam tumlat nö nyā tökuchik tönyô kiyôp, nup tö-ahetlöngö tö sanël tumlat haneui inrē. 25Ngaich kö aṅhaṅv kui min tömarô-òl kui rôngö, tömarô-òl kui rung inrē, tahël kun töhëm mak inrē, ip sakāmö tökiröng finëlhanga, hē nup chūök chamônga nö fukngö. 26Hēk inrē ngam yanāngö ngam chingëṅt min nö sā yanāngö ngam tavūöi ane inrē ngam yanāngö ngam tavūöi min nö sat chap, sā yanāngö tösat sumkam, ip sakāmö hē ngam Mā Tēv nö haṙung pinlāngen yip tarikre, ngaich halanken nup kūö nyaha cha.
Piyāyi Min Asirīa Töm Tēv
27Yĕh meuk, yih an ngam minë-eny ngam Mā Tēv ṙā-ang tömarôvat, hūkūö nö holtö tanānyö ò, ane inrē im lul tökufëi nö tafūnlöngö: tööḵlö minuh an tö tanānyö, ngam litāk ò inrē sā töhūkūö tameūyö:
28Ngam unhômö ò inrē sā öp tötaṙēchlöng töhëm mak, öp tösöllö nö i likeun, nö kichang vē pumnāmö tarik nö el kinchang sāiny öt inkôlò: inkāl elvāng inrē inlō-ongkūö nö el samā yip tarik.
29Tinköku yin min sā re tö el hatööm yē öp tökiröng nyinā-aṅ nö ahetlöngö; ṙanāmu ellōn inrē sā öp töhĕng tak kumröönngöre töfanööṙu yamônlö nö i kui ngam rôngö ngam Mā Tēv im Ihong Israĕl. 30Ngaich ngam Mā Tēv min nö vīten öp tölöök ṙô re nö hāngö, ngaich hameuktöre min nö ṙātö ngam këlre nö holtö lanīnöre nö tainy, öp tö hūṙökūö tameūyö inrē, nö larôka kūö, chanôich panam inrē, tökënngöre kumṙah inrē. 31Pòn kūö ṙô ngam Mā Tēv min yip aṅ Asīriā nö panyeny nö laköl, yip tö aṅtī tö chōn nö foh. 32I tum höt kūö öp töhalēnlöng tinkung, öp famuk kui ò min tö tī ngam Mā Tēv kumrööntö tāpret, hārp inrē: ngam kinyīnga kinyūngö inrē min aṅtī ò nö kiyūngö cha. 33Pòn tö misī-ilen Tôfet nö halēnlöng; hôṅ, halēnka an tökūö öp rācha; vī-i an tö ò nö aṙū-uti pōiti inrē: fônghaka nö umuh öp tameūyö pōyen ngòh inrē; öp unhômö ngam Mā Tēv nö sā nup töhëmlö töhūkūö Ihong, nö tōttökūö e.
Currently Selected:
Isayā 30: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
