Isayā 29
29
Tötlöök Sakāmö Yeruselem
1Mah Ariĕl Ariĕl, ngam elpanam chūök Tāvit nö iyöng! Ṙūöhtö kūö ngam samyeūheu yin töm tahëng samyeūheu, nup tökiröng nyinā-aṅ nö havīöl ritre nö yih:
2Ngaich möl chū-ö min hakihten Ariĕl, ngaich öp miṙivlōn min nö umuh inrāmöre inrē; ngaich angū-ö min nö in chu nöng sā Ariĕl.
3Ngaich chū-ö min iyöngtöre lā-al meh öich havīlen meh, ngaich vītö chūök kinyīngö meh nö aṅtö chūök kumyung, afônglö nup chūök kinyīnhö chin min in meh.
4Ngaich me-eṅ min tumṙeūtuvö, ngaich löknyö kui tumlat ṙô min öm ṙô-òv, ap vanë-eṅ meh min inrē nö löklö el tumlat; ngaich ap ṙô meh min nö sā ṙô öp tö ulòhten nö i ma-alaha, löklö kui tumlat ap vamë-eṅ kūö meh inrē min nö chëṅcha ṙô nö löklö el tumlat.
5Ngaich pöri min öp ṙôken yip lā-al meh nö sā töpahīöya tumlat, ṙôken yip töpahë-evö inrē nö sā uk nëlö nöng chaṙēviṙen: hôṅ, höng chalôkö ti ap min.
6Chöhka an min tö ngam Mā Tēv yip tömaṙôngö nö hol tö kunṙôkö, kumyeūnö inrē, töpōyen ṙënṙô inrē, holtö lamfeui kuföt chanôchö mai inrē, hanūkūö tameūyö inrē mahaṙāphanga.
7Lā-al Ariĕl min yip ṙôngö pumnāmö tarik nö kiyung, ṙòkhöre yip lā-al ò nö kiyung öp töngëḵ chūök ò inrē, ap mahakihten ò inrē min nöng sā heūvö, öp heūvö hatööm.
8Ngaich ngö inlahen angū-ö min hē öp tarik tökapahare nö heūv ngaich yĕh meuk, heūvöre anga-aṅ nö nyā; aṅhen pöri ngaich ap ellōn ò nöng öt aṅhāṅv: hēk inrē sā ap tarik töhaṙehe nômö nö heūv, ngaich yĕh meuk, òk anga-aṅ; aṅhen hë pöri, ngaich yĕh meuk takngö anga-aṅ, ngaich ap ellōn ò inrē nö yal tönyā-aṅkūö: ngatī min vē ṙôngö pumnāmö tarik nö ṙòkhöre, vē kumyung nö lā-al ngam rung Sīyôn.
Töt-hakumkaṙen Ṙô
9Sökngöre yin pingangkūö inrē; kumchikngenre yin öt meuk inrē: mihiyōi-aṅ yin, hö-ö pöri nö kūö vāin; kalöva yin, hö-ö pöri nö kūö tökalēḵ ka-eūt.
10Pò ngam Mā Tēv nö hōngtö kui yīö tö ngam ma-alaha tölapat inṙôhò ngaich inrē nö tilupngö mat yīö, tö yik pròfĕt, kahultu kui yin inrē, tö yip mameuk inrē.
11Ngaich nup tömeūkö tö yīö nö vītöre nöng sā ṙô öp līpöre tö haköpikūö, öp tö kētu tö yip tarik nö ip töhĕng tak töhuveū-en nö kūich, nö ngö ṙô, Vë-ekūö meh chin, vë-ekūö ngih man: ngaich ngö ṙô anga-aṅ, Ötkô chin, pò e nö haköpikūö. 12Kētu ngaich ngam līpöre nö in ò öp töt kamūich, ngö ṙô, Vë-ekūö meh chin, vë-ekūö ngih man: ngö ṙô ngaich anga-aṅ, Hö-ö chin chū-ö kamūich.
13Ngaich ngam Mā nö ngö ṙô. Pò vē tarik nö ṙuöhtöre nö in chu, ngaich cha-a nöng elvāngre i minuh cha inrē nö milēḵṙen tö chu, kēngöp ellōn re pöri cha-a nö marôvat tö chu, ngaich ngam pinhe-eṅkūö cha tö chu nöng chöngö tarik nöng inköptö cha:
14Lökten, yĕh meuk hòṅ iṙūhen chin vī unṙëhe la-en in vē tarik, öp unṙëhe la-en pinngangkūö inrē ngaich payāyi min öp mikah cha yip tö-akaha tarik, hayūni min inrē öp mikah elmat nö in yip tö-akaha tarik cha.
Mineūkkö Mu-unôich
15Tötkôlò yip cha-a yip chamöh tö-aṙū-uti nö hayunngö öp inlēnö aṅ im Mā Tēv, el sinngūlö inrē nuk vahīṙen cha, ngaich ngö ṙô cha-a, Chiāp mameūkö hī? Chīāp inrē tö-akahakūö tö hī?
16Yī-ö mahavāngtö öp lātulöng alaha nup chehen nö lātaṙeū kaheuktu öp min vamī tanīönyö nö tilin; tö lökten ngam tövī-i min nö ngö ṙô tö ò ngam vamī-i e, Öt vī-i chu an; hēk inrē ngam tövī-i nö ngö ṙô tö ò ngam vamī-i e, Höng öt akaha an?
17Röh öng nöng rahëchtöreṙen, ngaich Lëpenön min nö vītu nö taṙeū tömiṙònglö; ngaich kaheuktu min ngam taṙeū tö miṙònglö nö el chūöl chōn.
18Ip sakāmö angū-ö yip töt hang min nö hang në ṙô ngam līpöre; nup mat yip töt meuk inrē min nö meuk; nö löknyö el öp tönyatngö löknyö el sinngūlö inrē.
19Yip yāich inrē min nö ṙūölöre ṙanāmölōn nö im Mā Tēv, yip yāich inrē min in vē tarik nö ṙāmölōn nö im Töhĕng Töhet in vē Israĕl.
20Pò ngam pinhe-eṅkūö min nö vītu nö rö-öv, ngam mumnônhanga inrē nö ṙāngenre, ngaich ṙòkhöre cha-a inrē yip hamökkö ötlanöökö nö rökiṙen yip vamīten tarik nö töfāluṙen nö ip chööḵnyi, ngaich ṙātö tinngöp ò öp vamë-a nö i kūö inkūp, ngaich hakānngökūö yip tölöök nö ip töng rö-ö.
21Lökten an ngam Mā Tēv nö ngö ṙô, ngam ṙamānyen Aprahām tö inlahen ngam patī Yāköp: Öt sirōngkūö an min Yāköp töngamuh, öt rēhĕn öp kūö ò min töngamuh nö lunyīngöre.
22Hē ò pöri nö meuk yip kūön re, nö ellōn ò, yip vahī në kuntī chu, cha-a yip min ma-ahetlö minënyö chu: hôṅ, ahetlö ngam Töhĕng Töhet yip min nö in Yāköp, söklöre inrē min cha-a nö ngāng alaha tö ngam Tēv Israĕl.
23Cha-a inrē yip tölō-ongkūö ellōn min nö vītöre nö akahaṙa, cha-a inrē yip mu-uyë-a min nö haköp minkahten.
Currently Selected:
Isayā 29: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
