Isayā 28
28
Ṙô, Chamuh Im Lā Kapā Pūlngö
1Tötkôlò an ngam sapīöv inkeūlen mihiyōi-aṅ aṅ Ifrēm, tö ngam tö-umāingöre pūl ngam vanāyö ò, ngam mi-ikui ngam tökôlò achāṙö cha yip tötkôtökūö vāin!
2Yĕh meuk aṅhaṅv-in an ngam Mā tö tömihôiṅ tökalēḵ inrē; sā chanôichö tökënngöre kumṙah, töpalā-aiṙen kūö chanôchö, sā chanôchö ngam tökalēḵ mak nö taṙēchi, tī ò min nö tiṙölngö ngih panam nö aṅtī tö kël re.
3Rööntu kui min tö elröön öp sapīöv inkeūlen yip mihiyōi-aṅ aṅ Ifrēm:
4Tö ngam tö umāingöre pūl ngam vanāyö ò, ngam mi-ikui öp tökôlò achāṙö, min nö sā raneh ṙòng anychīr töngāṅv urēhĕkūö ngam sikehngö: öp tömeūkö töp mahatīönken e yē e nö ṙòngmö eltī ò ngaich nyā-aṅyö tö ò.
5Ip sakāmö angū-ö min ngam Mā Tēv yip tömaṙôngö nö sapīöv kanôlò, sapīöv inrē nö tövai, nö in yip chööḵṙen yip tarik ò:
6Ma-alaha inkaha fālen inrē nö in ò öp amūichhak nö akah fālen, kumlēḵ inrē nö in cha yip mahavööngökūö ngam kinyūngö nö i kūö inkūp.
Īsayā Tö Yip Mihiyōi-aṅ Prôfět I Yūtā
7Ngaich pöri vē inrē nö kūö vāin nö lō-ongkūö, kūö tökalēḵ inrē ka-eūt nö chatngen; lō-ongkūö yip kūönṙô tö yip pròfĕt inrē tökūö tökalēḵ ka-eut, ngaich yip nö ngeūṅktu tö ka-eūt, lō-ongkūö yik nö ngaich tö kūö tökalēk kā-eūt; vāchö mat yip tö maheuṅk re, kavē-ĕre yip nö i inkaha fālen.
8Pò nup mīs nö ṙòkhöre nö tööḵlö ël tö kuvav mum inrē lökten nö öt chūökuvö töhet.
9Chiāp min haköptö ò tö mikah, chiāp min inrē vahīlen ò nö tö akaha elmat tö ngam inhānga? Chā-a yip tufömngöre ṙinā-angkūö nö ṙā-ang i minë teh?
10Pò e nö chöngö i kui ngam chöngö, ṙak i kui ngam töṙak rahëchyen ihih, rahëchyen umū-aṅ.
11Hö-ö, tön lökten i tarik yip tökichëyöre ṙô tö tahëngö litāk inrē min anga-aṅ nö ve-ekūö vē tarik:
12Yip tö ngö elnang tö ṙô ò, Ngih an haneūheu, kētö haneūheu ò yin ngam töchei; ngih ön inrē haneūheul alaha; sönngenre cha-a nö öt hang.
13Lökten min ngam ṙô ngam Mā Tēv nö in cha nö chöngö i kui ngam chöngö; ṙak i kui ngam töṙak; rahëchyen ihih, rahëchyen umū-aṅ; hòṅ cha nö kiröönngöre, ngaich parātirit nö fukngö; laköl ngaich, tingöpöre inrē, kē-ĕ inrē.
Rööntö Machööḵ-lö Sīyôn
14Lökten yin hang ṙô ngam Mā Tēv, yī-ö mumnônhanga tarik, yī-ö mahayöng vē tarik vē aṅ Yērusalem:
15Pò yīö ngaich ngö ṙô, Ngaich in vītö kinlēḵngô im kinpaha, ngaich in inrē hō-en höö lōn tö ngam chūök kupah; yē ngam töyahlö chinökṙen min nö lök muh, öthō min angū-ö nö söl in ih; pò ih ngaich vīten minyôiny-aṅ inrē öi hayunngöre:
16Lökten an ngam Mā Tēv nö ngö ṙô, Yĕh meuk, ngaich chin ṙātö ihong rööntö machööḵlö Sīyôn, tö kalaha nganëḵeṅ ihong, töpōiṙāi ihong sinkeukngö nö tököp: öp ṙamātö ellōnre min öt kunrātuṙen.
17Ngaich chū-ö min vī ngam töṙak nö inkaha fālen, lanöökö inrē ngam kinlahkūö panam: ngaich min öp tökënngöre kumṙah nö ahëmngö nup innyatngö minyôiny-aṅ, ngaich min nup mak nö ṙööingö tī töp chūök inyunngö.
18Ngaich min ngam kinlēḵngô meh i kinpaha nö hö-övö, ngam hanô-òlōn meh inrē i chūök tökapah nö ötköp min; hē ngam, töyahlö chinökṙen nö lök umuh min, ngaich yī-ö min rööntukui tö e.
19I tum van e nö lök muh, kumröön e min yī-ö; pòn kaheuk peuheū min angū-ö nö lök umuh, kaheuk sakāmö hatööm inrē: ngaich angū-ö min nö rö-ö, höng pinhë-eṅkūö pöri ngam mikah elmat tö ngam inhānga.
20Pò ngam chamam nö cheūta yĕn hateūtnyöre ngam tarik nö ël e; ngaich ngam kinṙum inrē nö cheūktāk yē ò nö kahūmöre tö e.
21Pò ngam Mā Tēv min nö chōholre sā re nö i kui öp rung Perasim ngaich tainy min anga-aṅ sāre nö el achāṙö Kīpiön, pò ò nö hòṅ la-evṙen tö ngam la-enre, tötohtöre la-en ò, hateungtökūö ngam tīre anga-aṅ inrē, tötoh hë tī ò.
22Uh yin yĕh ngaich lökten töngamuh öi mumnônhanga, hòṅ minë inlök yīö nö öt vī-i nö ngëḵ: nö kinheūtngen, nö tötheūliṙen inrē, ngam ahang chu ṙā-ang im Mā, ngam Mā Tēv yip tömaṙôngö, i kūö ngih tumlat nö ṙòkhöre,
Mikah Ngam Tēv
23Kētö elnang re yin, hang ṙô chu inrē; hangihtöre, hang vanë-eṅ chu inrē.
24Höng iṙūötī öp ṙung tarik kumköh tumlat nö kuköh tumlat yĕn hòṅ teūich? Höng irūhötī öp ṙung nö fung tumlat kiṙöp tökumulngöre inrē nö el ngam taṙeū ò?
25Yē ò nö ngaich nö ṙākö tī tö kūö ngam tumlat röh öp ṙung nö tūingö tösah vīt, pirāt nuk kūmin inrē, ngaich hatöök nup vīt tö pārli inrē nö el nup töhalēnö chūök nup tahëng mihëṅṙö inrē vīt nö lā kūöngö?
26Pòn chīpö tī ngam Tēv ò nö hachōten ò, ngaich nö haköpten ò inrē.
27Pò nup tösah vīt nö öt sōngnyu ṙòng tö nup tökeut aṅtī, öt rēhĕn öp kalröön inröl nö chuvālö nö i kui nup kūmin; fohnyu pöri nup tösah vīt tö chōn, nup kūmin inrē tö kun chōn.
28Kiṙöpö nup sāiny rôtī; pò ò min nö ötkô nö örheūheu tī nö pirōngö u; pòrô nup kalröön inröl ò kōra ò inrē nö pirātö u, hö-ö anga-aṅ nö pahīöyi tī tö u.
29Angū-ö ön ngih inrē, ṙamā-ang im Mā Tēv yip tömaṙôngö nö yih, nö pinngangkūö inlēnö, mikah inrē tölngö lanöökö.
Currently Selected:
Isayā 28: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
