Isayā 27
27
1Ip sakāmö angū-ö ngam Mā Tēv nö ip manā-anyre tökiröng töngëḵ inrē sanët nö hachök ngam Ṙēv ngam töveut pēch, ngam Ṙēv pēch tösalūöna; ngaich anga-aṅ min nö kapahatī tö ngam tulan el mai.
2Ip sakāmö angū-ö: hĕng öp panô-òṅ vāin, tikökhökūö e yin.
3Haköpkö e chin chū-ö Mā Tēvl kaheuk ṙētak chin min ṙösö e: hòṅ e nö öt hachökka tö yô-òv, aṅten e chin min tö hatööm sakāmö inrē.
4Öt in chu tanānyö; hōḵ nup öre töchökhu kaha kun chōn nö lā-al chu kiyung! Ngaich öre chū-ö öich lök i kui u, ngaich föngngö u öre chū-ö.
5Hēk inrē hökngen ò nö kiṙapkö ngam kumlēḵ chu hòṅ ò nö vī lanāmö nö in chu; hôṅ, hökngen ò nö vī lanāmö nö in chu.
6I nup sakāmö yamih min ang Yāköp nö ṙēhtöre, pöpnyöre kūö ṙòng min inrē Israĕl: ngaich hatöö-ölkūö ngih panam min cha-a tö ṙòng.
7Ngāichö vah tī ang tö ò nö fëlö cha yip famëlan? Hēk inrē kapahatī ang nö sā finëlngö cha yik töfëli tö ò?
8Ip kinlaha ṙôkö, hē meh tīnngörit ò, ngaich lā-al kūö ò me-eṅ; ngaich anga-aṅ nö kēngen ò nö aṅtī tö chanökhuṙenre ip sakāmö kuföt chuhöt.
9Lökten ön ngih min kanöölö fālen Yāköp nö ahetlöngö, angū-ö an tökôlò tī ngam kinëngö tökööl ò; hē ò nö vī nup ihong öp tahāklö nöng sā töpaṙöla ihong nup tösōngö ngaich laköli, hòn öt hēk nö asöklöngö Asērim tö ngam insā tēv tavūöi inrē.
10Pò ngam tölaklöng elpanam nö kapöyiṙen, ṙā-aiṙen nö öt elyöngö, sā el tönyalnyi: in e min nup kun nuā nö nyā-aṅvkūö, in e inrē nö ṙōlahaka, ngaich keuheūt tö nup pak umuh.
11Ngaich yē nup pak umuh nö nyangngö, ngaich cha-a min nö likölngö u; yih min yip kikānö, ngaich föngtökūö u; pò cha nö tarik töt akahaṙa; lökten anga-aṅ öp vamī-i cha nö öt aheūkölōn min tö cha, anga-aṅ inrē öp vamī-i cha min nö öt hameuktö miṙēlōn nö in cha.
12Ngaich ngö inlahen min angū-ö ip sakāmö angū-ö, tö ngam Mā Tēv min nö pitōngnyö nup ṙòng nö ṙā-ang im tötaṙēchlöng Tahël i nup Kun Töhëm Mak i Aikup, ngaich yī-ö min hĕng hĕng tak inmūlö, Ō yī-ö kūön Israĕl. 13Ngaich ngö inlahen angū-ö min ip sakāmö angū-ö, tö öp yöng römpet min nö föönyukūö; ngaich kunyī-inyre min cha-a yip tö-öhngen nö rö-övö ip panam Asīriā, acha-a inrē yip tökavali nö ip panam Aikup; ngaich min cha-a nö salām ngam Mā Tēv nö i kui ngih töhet rôngö i Yerusalam.
Currently Selected:
Isayā 27: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
