Isayā 21
21
Mineukö Tinṙölngö Pēpilön
1Ngam ṙô nö ip el tönyalnyi im mai. Sā ngam lamfeui kuföt lā lòhngö nö tafūni röön, löktö el tönyalnyi angū-ö nö yih, ṙeū-eung ip panam pinhe-eṅkūö.
2Vënyu an nö in chu ngam tömeūkö tökihngen; ngam tömichūḵ inlahen nö i vahīṙen re tītö michūḵṙen inlahen nö i la-en re, kil an ngam kamil, Kuṙòh, Ō Ēlām; kayīngtöre, Ō Mītiā ṙòkhöre nup tin-ūnen meh nö vītu tö chu nö ṙāngenre.
3Lökten nup el ulāvö chu nö tööḵngen tö miṙivlōn; keuheūtngöre vah chin tökūö nup tö salòklöng chanökö, sā sinlòkö chanökö ngòh kamyôḵ kikānö: chök takô chin ngaich lökten chin ötkô hang; ngangngökūö chin ngaich lökten chu ötkô meuk.
4Uhā-a nômö chin pinëṅka chin ngaich tö pinhë-eṅkūö: ngaich öp chinṙivtö harap öp lōn chu nö vītöre nö kinchëyöre chu.
5Halēn mīs cha-a, ṙātö amahati cha-a, nyā cha-a ka-eūt cha-a: chōholre, yī-ö kūön rācha, hacham ngam lanaklö.
6Tön ngö ṙô an ngam Mā tö chu, Kuṙòh, ṙātö tarik amahati; höknyö ṙô ò nö ve-eny öp maheuṅkre:
7Ngaich hē ò nö meuk töhĕng kiteūm kumyung, tötahôlu nö i uk kōra, hĕng kiteūm köttö hĕng kiteūm ūṅt, ngaich hangihtöre min anga-aṅ nö i tölngö chumkūöṙen re.
8Ṙô-òv ngaich anga-aṅ nö sā lāyön: Ō Mā, öt heumkenre chin sökhaka i kui ngam chūök chamônga tö sakāmö ngaich ūichhakṙen el urôhòre hĕng mitööm:
9Yĕh meuk, yih yin nö ngaich vē tarik kumyung, tahôlre aṅ i uk kōra tarik: Ngaich ngö ṙô anga-aṅ nö sapṙô chu, Fukngö ök nö ngaich Pēpilön, fukngö ök nö ngaich; ṙòkhöre inrē nuk insā nuk tēv ò nö laköl nö el tumlat.
10Ō Me-eṅ pumṙōngnyö ṙòng sāiny chu, minë sāiny inrē im ël patī chu: ap ahang chu ngaich ṙā-ang im Mā Tēv yip tömaṙôngö, ngam Tēv Israĕl, vënyu nö ngaich tö chu nö in yīö.
Ṙô I Alāha Ītòm
11Ngam ṙô in Tūmah. Hĕng taka öp hamūken chu löknyö Sēir, Amahati tarik, sitih ang ngam hatööm? Amahati tarik, sitih ang ngam hatööm?
12Ngö ṙô ngaich ök amahati tarik, Ngaich an ngam peuheū nö yih, ngatī inrē ngam hatööm: Yē yīö min hòṅ hatöntöre, hatöntöre yī-ö: ngaich yih yī-ö hēk.
Ṙô I Alāha Arab
13Ngam ṙô in Arēpiā. El-inchōnngö Arēpiā yin min iyöng, Ō yī-ö tömūlö kinröönngö aṅ Tītān.
14Kētö mak cha-a nö in ò ngam töhaṙëhe nômö; ngaich yip aṅ öp panam Tīmā, nö höngkūö yip töpāngö nö kumtö nyā-aṅkūö.
15Pò cha nö falngöre tö nup sanët, nup sanët töhōknyu, ṙā-ang i nup linreny inrē tösōntu, ṙā-ang i tökalēḵ kinyūngö inrē.
16Pòn ngö ṙô ngam Mā nö in chu, I ël töhĕng samyeūheu, sā samyeūheu töhaṙāyö la-en, ngaich nup kanôlò Kītar min nö öt kô-òl kui: 17Öp chööḵṙen tum tak lumreny inrē, yip tökalēḵ tarik aṅ in yip kūön Kītar min nö öt ṙōl tit taka: pò ngam Mā Tēv ngam Tēv Israĕl, nö ṙô-òv tö e nö ngaich.
Currently Selected:
Isayā 21: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
