Isayā 22
22
Ṙô I Alāha Yerusalem
1Ngam ṙô ip achāṙö heūvö elmat.
Asuh ap halöiny meh töngamuh tö yīö ṙòkhöre i kui patī?
2Ō me-eṅ tötööḵlö tö inyôṙö ṙô tö taṙōlaṙen tökiröng elpanam, töṙāmölōn kun elpanam? Öt kūö sanët yik töfëli aṅ in meh nö fëli, hö-ö yik nö rēhĕn nö i kinyūngö nö kapah.
3Ṙongngörit yik mahayöng nö falngöre nö ṙòkhöre nyëkö yik tö yik lumreny: ṙòkhöre yik tökôti nö in meh nö nyëkö, yik tömarô-òlkūö nö falngöre.
4Lökten chin ngö ṙô, Chingā-angkūöre tö chu, hòṅ kihīökkūö chin peuiny; ui pītnyöre haṙamlōn chu, tökūö inyëngen ngam kikānö kūön ök tarik chu.
5Tön sakāmö ötkanô-òṅ an, rinööntö kui inrē, kinlūöchöre el kui inrē, aṅ im Mā, ngam Mā Tēv yip tömaṙôngö, el öp achāṙö heūvö elmat; tinṙölngö nup kinlōngö, pineunyhökūö minë rôngö inrē.
6Kēkö chòk an Ēlam, holre tö inröl tarik aṅ uk kōra inrē tarik; ngaich an Kir inrē nö ṙòngngö inyul lanaklö.
7Ngaich ngö inlahen angū-ö min, tö nup achāṙö min tö-atöllöng nö tööḵlö tö nuk inröl, tö aṅ uk kōra tarik inrē nö hatöököre nö i uk u nö i kūö inkūp.
8Ngaich anga-aṅ nö kēngö öp innyatngö Yūtā.
Ngaich me-eṅ ip sakāmö öm ngëichkö öp lanaklö vët inyut
el ngam patī el inchōn. 9Ngaich yī-ö meuk manëngnyö kaha ngam elpanam Tāvit, nö ṙōl anū-ö: ngaich yī-ö hamūl nup mak öp lātaṙeū törūngö mak. 10Ngaich yī-ö inrē kaheuk nup patī i Yērusalem, tiṙölngö nup patī yī-ö ngaich öi hangëṅlö ngam kinlōngö. 11Vī inchūökngö mak yī-ö inrē ihôi minë tönët kinlōngö nö chūök mak aṅ ngam hötṙeh törūngö mak: hö-ö pöri yī-ö ngëichken ò ngam tötī-iv tö e, öt rēhĕn yī-ö milēḵṙen tö ò ngam vamī-il e i tömisī.
12Im sakāmö angū-ö ngam Mā, ngam Mā Tēv yip tömaṙôngö, nö havëtö pineūinyö, miṙīvlōn inrē, nganānyö kui finūmṙat re inrē tö sāk hilā:
13Yĕh meuk ngaich, ṙanāmölōn kumchiklōn inrē, ṙinatnyö likeun kōiny nuā sīṅp inrē, kā alaha ngaich òk vāin inrē: tā-a töi nyā-aṅvkūö òk inrē, tön huṙöich in min kapah.
14Ngaich ngam Mā Tēv yip tömaṙôngö nö hameuktöre nö elnang chu, Kô ön min ngih ötlanöökö nö öt anhetlen nö ṙā-ang in yīö yē yīö öl kapah, ṙô ngam Mā Tēv, ngam Mā Tēv yip tömaṙôngö.
Ṙô Chamuh In Sěpnā
15Ngö ṙô an ngam Mā, ngam Mā Tēv yip tömaṙôngö, Kūṙòh, yihtöre man ip yōm chehehen in Sepna, öp yōm ngam patī, ngö ṙô, 16Asuh ap la-en meh ihih? Achīö ap in meh ihih inrē tö meh ngaich hulhöt anūlöre ihih? Hulhöt anūlö ò nö lātulöng, vīhöt chūök re inrē el ihong! 17Yĕh meuk, kalē-ĕti an min ngam Mā Tēv nö kavalngen meh nö sā tī tökalēḵ tarik; hôṅ, ngënö tī an min nö haṙūngö meh. 18Chuvilen meh an min kavallen meh inrē sā öp tökumul öm ël öp töpōiti panam; in e me-eṅ min kapah in e min inrē nup inröl nö kanôlò meh, me-eṅ sumrōngkūö ngam patī ngam Mā meh. 19Ngaich chū-ö min kuringngen meh ṙā-ang ip la-en meh, ṙā-ang öp chūök meh inrē öm tūöktu min tö ò lātaṙeū.
20Ngaich ngö inlahen angū-ö min ip sakāmö angū-ö, tö chu min havëkö öp tarik re Ēliyākim töp kikōnyö kūön Hilkiyā: 21Ngaich chū-ö min hayūtan tö tökiröng inyūt, ngaich hangëken ò min tö ngam fanūm ṙat meh, ngaich kētö eltī ò chū-ö min tö ngam inyöngö meh: ngaich anga-aṅ min nö yöng vē aṅ Yērusalem, ip patī Yūtā inrē. 22Ṙātö elranôṙö ò chū-ö min tö ngam tinkīök ngam patī Tāvit; ngaich löpnyökūö e min anga-aṅ, ngaich öt hĕng tak lamöptökūö; löptökūö e min anga-aṅ, ngaich öt hĕng tak lamöpnyökūö. 23Ngaich chū-ö min haköpngen ò sā kīny nö ip tököp chūök ò; ngaich anga-aṅ min nö kantēra rācha nö tö-eū-eu nö i patī ap yöng ò.
24Ngaich cha-a min nö eūmlen ò tö nup taṙòkhöre ineū-eu aṅ patī ap yöng ò, öp kūön lamöknyö in ò inrē, ṙòkhöre nup kun chūökṙen, löktökūö nup kōp chūökṙen, söl i nup kulah chūökṙen. 25Ip sakāmö angū-ö, ṙô ngam Mā Tēv yip tömaṙôngö, öp kīny tököp nö ip tököp chūökö nö tahöököinykūö min; kūöltu min angū-ö nö ngaich, fukngö ngaich, ngaich ap lumngan öp mi-in e nö rökiṙen; pò e nö ṙô ngam Mā Tēv.
Currently Selected:
Isayā 22: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
