Isayā 17
17
Chöken Min Sirīa, Israel Inrē
1Ngam ṙô ngam Tēv nö in Tamaskös. Yĕh meuk, kē-ĕyi an Tamaskös nö öt elpanam, ngaich min angū-ö nö fônghaka nö tinṙōltit.
2Ṙā-ayö nuk elpanam Arōer: chūök töṙeūla nup min, nup muhulalhaka min, ngaich öt hĕng tak min tökuṙë-etī tö u.
3Öt ngöhören min inrē ngam chūök kumyung nö in Ifrēm ngam pūlngö inrē nö in Tamaskös, yip chööḵṙen inrē aṅ Sīriā; ngaich cha-a min nö sā kanôlò yip kūön Israĕl, ṙô ngam Mā Tēv yip tömaṙôngö.
4Ngaich ngö inlahen angū-ö min ip sakāmö angū-ö, tö ngam kanôlò Yāköp min nö ahöyi, ngam tökiröng alaha ò inrē min nö cheukyeungngöre.
5Ngaich angū-ö min nö sā öp tarik mahamūl ṙòng taneūich re i nup tösökhakṙen sāiny, ngaich nup kël ò min nö uvòhlö nup ṙòng, hôṅ, sā öp töhĕng tak min angū-ö chamap pintū-u sāiny nö el Achāṙö Rifēm.
6Sön min umuh tö-ōtre töchāpö, sā kinyinkö öp ôliv chōn,el kui öp lamātulöng pak nët hēk lūöi nup ṙòng, fën hēk taneūi i rōi nup manā-angkūö pak öp töpōyen ṙòng chōn, ṙô ngam Mā Tēv, ngam Tēv Israĕl.
7Ip sakāmö angū-ö min hĕng tak öp tarik ngamëchkö ngam Vamī-ire ngaich nup mat ò min nö milēḵṙen tö ngam Töhĕng Töhet in Israĕl. 8Hö-ö min anga-aṅ nö ngëichkö kuntī ò, öt rēhĕn min anga-aṅ nö milēḵṙen tö u nup vahīṙen kuntī ò, öt rēhĕn tö ngam Asērim, hēk inrē minë insā ngam tavūöi.
9Ip sakāmö min angū-ö nup tökalēḵ elpanam ò nöng sā nup chūökö töṙā-aiṙen nö el inchōn i kui rôngö inrē, nup töṙā-aiṙen nö ṙā-ang i kūö yip kūön Israĕl; ngaich angū-ö min nö töthaṅhavkūö.
10Pò meh ngaich vaichngen ngam Tēv re ngam inyööken meh, öt chumkūöṙen inrē tö ngam ihong kumlēḵ meh: lökten man teūichtö tökôlò chōn, ngaich asöklen ò ip töharīkngöre insök:
11Ip sakāmö meh teūichten e ngaich kalonglen e me-eṅ, ngaich ip peuheū me-eṅ vīten ap kulöl nö pöpnyörekūö ṙòng: ngaich pöri öp ṙòng nö falngöre ip sakāmö miṙivlōn tökalēḵ miṙivlōn inrē.
Ötkô Min Yip Tö Kunyahalōn
12Mah, ngam inyôṙö ṙô tarik tömaṙôngö, ngam inyôṙö ṙô sā ṙôktô minë mai; ngam tinfālen pumnāmö tarik inrē, yip tö tafālṙen nö sā röön nup tökalēḵ mak!
13Tafālaṙen yip min pumnāmö tarik sā röön töpōyen mak: vëken u pöri min anga-aṅ, ngaich anū-ö min nö marôvat nö falngöre, ngaich lū-u min nö sā uk nëlö nö urēhĕkūö ngam kuföt nup mī-i kui rôngö, ane inrē sā pitung öp töchavīlöng nö urēhĕkūö öp chanôchö.
14Ip harap ngaich meuk pinhë-eṅkūö; ngaich hö-övö anū-ö urēhĕkūö ngam peuheū. Angū-ö ön min minchööḵö cha yip kamīlö hī minchööḵö cha inrē yip mu-ulāingen hī.
Currently Selected:
Isayā 17: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
