Isayā 16
16
Öt Maheūṅkkuvö Yip Môāp
1Söömtö nup kūön sīṅp in öp mahayöng ngam panam nö ṙā-ang Sēla ök lamā im tönyalnyi, in öp rung kikānö kūön Sīyôn.
2Pò e min, nöng sā nup chehenchōn sā töpayāyi fôngö, ngatī yip min kikānö kūön Mô-āp nö el ap talöökö invāngngö el mak i Āmön.
3Kētö inlēnö, akah fālen; vīten ngam nyat meh nö sā hatööm nö ellōn öp törònglö sakāmö: hayunngö yip töha-uknyu; un asōktu öp töt kamngu kū-öröön nö kiröönngöre.
4Hökngen öp töha-uknyu tö chu nö iyöng in meh; Mô-āp pöri, me-eṅ man yēḵ innyatngö ò i kūö öp kamë taneūngenre: pò ngam tömileūchen nö kil nö kētu nö im ranö-övö, ṙāngenre ngam kinīlö holre, keuheūtngöre vah mahakihten holre nö ṙā-ang im panam.
5Haköpi min öp kantēra rācha nö i miṙēlōn, hĕng tak inrē min öp amūichlöre nö ël e im kanô-en, nö el inrūkui Tāvit; kahôka, chöh inkaha fālen, veūten inrē nö la-evṙen, tö lanöökö.
6Ngaich in hang öp inkeūlen Mô-āp, yāhah inkeūṙö ana; ngam nganë-eṅkūö ò, inkeūlen ò, tanānyö ò inrē; höng törö-öv an ngam ineū-eure tö ò.
7Lökten an min Mô-āp nöng ayôngen Mô-āp, höng kö ayôṙa yip min: kūö ngam rööntö Kirharēsĕt min nö haṙivhu tö yīö, keuheūtngöre vah min nö hachökö.
8Pò nup taṙeūḵ Hespòn nö lëvngö tö öp vāin Sipma inrē; yip mākūö pumnāmö tarik ngaich nö likölngö nup chōn tökôlò in e; sölngö yip nö uroh nö i Yāsör, höng alēṙaṙen yip nö el tönyalnyi; ngaich nup pak ò nö nyākhakaṙen, havāngngöre nup nö ngaich tö ngam mai.
9Lökten chin min peuiny hol ṙô Yāsör nö peuiny öp vāin Sipma: ṙöösö meh chin min tö makmat re, Ō Hespòn, Ēlē-aleh inrē: pò ngam ṙô kinyūngö min nö fuk kui nup ṙòng sikehngö i kui nup töhamūlö inrē tö meh ṙòng taneūich.
10Kē-ĕyö ök inrē ṙanāmölōn, tök kumchiklōn inrē nö ṙā-ang ip panô-òṅ töpōyen aṅ tö ṙòng; öt tinkökuvö min el nup panô-òṅ vāin, öt rēhĕn ṙënṙô töṙāmölōn: öt ramöönnyuvö vāin nö ip kincheūich; vīten ngam kinrān vāin chin nö hūkö ṙināngenre.
11Lökten ngam aich chu nö ṙô-òv sā ṙô hāp tö pòkūö Mô-āp, minë puhū chu inrē tö pòkūö Kirhērĕs.
12Ngaich ngö inlahen angū-ö min, hē Mô-āp nö hameuktöre, hē ò nöng hacheiköre nö ip chūökö latulöng, ngaich yih min inrē nö vë-ekūötēv nö el öp töhet chūök ò, ngaich rö-ö pöri min anga-aṅ nö kô.
13Angū-ö ön ngih ṙô ngam Mā Tēv nö ṙô-òv nö in Mô-āp misī. 14Ngaich pöri ngam Mā Tēv nö ṙô-òv töngamuh, nö ngö ṙô, I el tölūöi samyeūheu sā samyeūheu ngòh töhaṙāyö la-en, ngaich ngam kanôlò Mô-āp min nö tumṙeūtu nö ahū-öyö, tö yip tömaṙôngö tarik; kūöntit min inrē yip chööḵṙen nöng öt kaheuku.
Currently Selected:
Isayā 16: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
