Isayā 18
18
Chökṙen Sutān Min Ngam Tēv
1Mah, ngam panam tölapūpaṙô rōi kël ngam lāmuh tö nup tahël Itīöpia:
2Ngam tamīntö yip lööṙöṙô nö lök el mai, nö chōng tö līpöre nö i kui mai, nö ngö ṙô, Kuṙòh, yī-ö töveut ma-ahānga, chu ip pumnāmö tarik tömarôlòng töfaṙëcha inrē, in yip tarik pinhë-eṅkūö löktökūö ök ranehlö cha höng iṙūöhen; öp pumnāmö tarik öp mumchööḵngö ramöön tö kui inrē öp tö panāmu tö tökāliṙat tö nup tahël!
3Ṙòkhöre yī-ö aṅ ngam panam, yī-ö inrē mī-i yöng el tumlat, ngëicha yin, yē ngam pantēra nö hatūöilöng nö i kui minë rôngö; hang yī-ö inrē yē ngam römpet nö föönyukūö.
4Tön ngaich an ngam Mā Tēv nö ṙô-òv nö in chu, nö ngö ṙô, Öt halönyköre chin min, el ngam chūök re chin min inrē ngëicha; sā öp ṙanācha hē el ranëtö mat ngam tavūöi sā öp taṙul tacham ip ṙanāchö hē ṙòng taneūich.
5Pòn lā-urĕh ngam ṙòng taneūch, yĕn ngaich nö paṙōngi öp panöpnyö ṙòng ngaich ngam pūl nö vīngöre nö tököiny nö angkūr, ngaich anga-aṅ min nö kamöpngö nup kun pak nö aṅtī tö kinmöp rōi chōn, ngaich min nup pak tölarāiköti nö kē-ĕyö tö ò ṙāli inrē.
6Ngaich anū-ö min nö holre nö ṙā-ayö nö i nup töyal chehechōn ngam rôngö i nup töṙeūla inrē el ngam tumlat: ngaich min nup töyal chehechōn nö i kui u tö sikehngö ṙòkhöre inrē nup töṙeūla ing tumlat nö i kui u min hē el laneūichö.
7Hē e min angū-ö öp raneushö nö kētu im Mā Tēv yip tömaṙôngö aṅ in yip tarik tömaṙôngö aṅ in yip tarik tömarôlòng töfaṙëcha inrē aṅ in yip tarik inrē pinhe-eṅkūö hētentö ranehlö cha höng iṙūöhen; öp pumnāmö tarik öp mumchööḵngö ramööntö kui inrē öp tö panāmu tö tökāli ṙat tö nup tahël, ip chūök minë-eny ngam Mā Tēv yip tömaṙôngö i kui Rung Siyôn.
Currently Selected:
Isayā 18: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
