Isayā 15
15
Piyāyi Min Môāp Tö Ngam Tēv
1Ngam ṙô ngam Tēv nö in Mô-āp. Pòn i el töhĕng mitööm Ār öp i Mô-āp nö piyāyi, ngaich vītu nö rö-övö, pòn i el töhĕng mitööm Kir öp i Mô-āp nö piyāyi, ngaich kētu nö rö-övö.
2Ngaich ök nö chuh Tīpòn inrē, chuh i nup chūökö latulöng, nö peuiny: ayôngö vah Nepō an Mô-ap, Metapā inrē: ṙòkhöre yin nö ngāṅnyö kui, ṙòkhöre nö kamöpngö sanôi samā re.
3El talöököre cha-a nö fūömṙatre tö sāk: i kui patī re inrē kö ayôṙa cha-a pōitô nö peuiny.
4Hū-a Hespòn Eliāleh inrē; sölngö nup pöönyṙô cha nö hāngö nö i Yāhas: lökten yip kumyung tarik aṅ Mô-āp nö pōitô nö hū-a; kichëyöre ap nômö ò nö in ò.
5Peūinyö Mô-āp ap nômö chu; pāngö yik mā ò nö i Sō-ar, i Eklātselīsīya. Pòn i paneūlö Lūhit cha-a nöng paneunyngöre nö peūlöre; pòn el talöökö Heronēm cha-a nö hūnyôre tö pinyāingö e.
6Kūö nup mak i Nimrim nö öt aṅhaṅvö min: pòn nyangngö nup kiyôp, öt teunglen inrē tö-ayal kiyôp, öt tö-ayāluvö inrē rōi nö umuh.
7Lökten nup töpōyen taneūngen cha, nuk halinngen cha inrē, min nö keūni tö cha nö ip kun töhëm mak i nup chōn tö tanyika.
8Pòn ngaich ök hinū-a nö vinngö chūök nö i kūöngö panam Mô-āp; sölngö nö i Eklēm ök inyôṙö ṙô, sölngö inrē nö i Pīrelim ök inyôṙö ṙô.
9Pòn tööḵlö nup mak Timòn tö mahām: pò chu min pōitöre kum tö lamöö in Timòn, in ò ap min lāyön tumlungnyöre nö ṙā-ang Mô-āp, i kui yip chööḵṙen im panam inrē.
Currently Selected:
Isayā 15: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
