Isayā 14
14
Invānö Yip Tökēḵ-ě
1Pò ngam Mā Tēv min nö aṙē-ĕlōn tö Yāköp, ṙòngmö atöllen Israĕl an min, ngaich ha-ūichten cha nö im panam cha; hamūltöre min ap aṅ tahëng nö in cha, ngaich cha-a min nö köpta nö i patī Yāköp. 2Ngaich min yip tarik nö kē-ĕ cha, ngaich kēten cha nö i chūök cha: ngaich ngam patī Israĕl min nö amīnu tö cha i panam ngam Mā Tēv nö kikōnyö tarik cha kikānö inrē tarik cha: ngaich cha-a min nö kē-ĕ cha nö töhakövö, më töhakövö, ngaich cha-a min nö hayöng yip mahakihtenre.
I Panam Kupah Min Yip Rācha Pēpilön
3Ngaich ngö inlahen angū-ö min ip sakāmö ngam Mā Tēv min nö kē-ĕkūö meh tö haneūheu ṙā-ang ip miṙīvlōn meh, ṙā-ang i lumngan nuk la-en meh inrē i chūök meh vītuṙen kūönkūö, 4Lökten man kēlö ngih inchō-oṙô in öp rācha aṅ Pĕpilön ngö ṙô, Sitih ṙanāngen ang ngam mahakihten! öt ngöhören an ngaich ngam humlum elpanam!
5Likölngö ngam tinkung tötlöök an nö ngaich ngam Mā Tēv, ngam tinkung yip mahayöng;
6Ngam fanòh yip tarik im lanīnö nöng iṙūöhöti, yip mahayöng pumnāmö tarik nö im tanānyö, nö aṅtī tö inkihten öp tötkô nö lanakngen.
7Heūheure ön nö ngaich ngih panam, chēvhakaṙen: ngaich yin nö sayah köny ṙô nö tikökṙôre.
8Hôṅ, ṙāmölōn nö in meh në för chōn, nup sītör aṅ Lëpanön inrē, nö ngö ṙô, Hēngen tö meh tumṙeūtuvö, öt hĕng tak ngaich yamih kamūöl tö chōn in ih.
9Lataṙeū ngam anūlö nö kē-ĕyö nö pòkūö meh nö höng kūö meh ip yanīhih meh: kūö meh an nö halöinyka yip kupah, urōsen nö ṙòkhöre yip mākūö yip rācha pumnāmö tarik nö ṙā-ang el kantēra cha.
10Ngaich cha-a min nö ṙòkhöre nö ngö ṙô nö sapṙô meh. Ngaich öm me-eṅ inrē vīngöre öt kalē-en sā ih? Vingöre öm ngaich sā ih?
11Ngaich ök inkeūlen kanôlò meh nö kētu nö el Anūlö, öp ṙënṙô nup ranöng meh inrē: elkatòh meh nup kamlökö nö chamam meh, kinṙum meh inrē nup kamlökö.
12Sitih lökten öm suktöre ṙā-ang el halīöngö, Ō Taneūsömat Sakāmö kūön ngam Peuheū! Sitih lökngen öm kūöltuvö el tumlat, me-eṅ muhulaltö vē pumnāmö tarik nö lātaṙeū!
13Ngaich ngö ṙô me-eṅ ellōn re, Hòṅ yônlö chin el halīöngö, hapōilö ngam kantēra chin min lātulöng tö minë taneūsömat ngam Tēv; ngaich chū-ö min ūichngöre i kui ap rung rôngö tarik, i nup manā-ang kūö ngam lākapā:
14Yônlö chin min lātulöng tö rô-òl chūök minë taṙul; ngaich chū-ö min sā ngam Tötulönghöre.
15Sön pöri me-eṅ min kētu lātaṙeu el anūlö, ip manā-angkūö ngam Anūlö.
16Acha-a min yip mameūkö meh nö ngëichken meh nö lökhöt mat töcheūkti manëngö ngëichken meh min cha-a nö ngö ṙô, Anga-aṅ ang ngòh tarik vamīten ngam tumlat nö kayīna, ngam kumyinkö në pūlngö;
17Ngam vamīngen ngih panam nö el tönyalnyi, ane inrē tumṙōlngö nuk elpanam in e; ngam töt lamuhnyö yik tökē-ĕ tö ò nö chuh patī re?
18Ṙòkhöre yip rācha pumnāmö tarik, ṙòkhöre cha-a, haṙòh kui kanôlò re, nö kö el patī re.
19Ngaich pöri me-eṅ marôvat kavāliyö öm ṙā-ang im kui kupah re sā pak sin-òkkūö, inyut töfëli, öp tösāpiyö tö sanët, yik mameutti nö lātaṙeū nö i nup ihong el Anūlö; sā alaha kupah törööntukui.
20Hö-ö man min hamūltu in cha öm lāpi, pò meh piyāingö ngam panamre, ngaich tī man fëlngö yik tarik re; hö-ö öp min kūön tötlöökö la-en nö örheūheu nö köpö minë-eny.
21Halēn chūök finëlngö yip kūön ò tökūö kanöölö fālen yik yöng cha; hòṅ cha nö öt chōholre, nö amīnu töng tumlat, ngaich hatööḵöl kūö ngih panam tö nup elpanam.
Piyāyi Min Pēpilön Tö Ngam Tēv
22Chōholre chin min lā-al cha, ṙô ngam Mā Tēv yip tömaṙôngö, ngaich rökngö minë-eny tö yip chööḵṙen inrē nö ṙā-ang Pĕpilön, tö ngam kūön tökūön ngam kūön inrē, ṙô ngam Mā Tēv. 23Vīten e chin min inrē nö amin pôrkupain, törūḵngö mak inrē: ngaich chū-ö min aṅtī tö fanòh pinyāingö öich fòhngen e, ṙô ngam Mā Tēv yip tömaṙôngö.
Piyāyi Min Asirīa Tö Ngam Tēv
24Chūöku ṙô an ngam Mā Tēv yip tömaṙôngö, nö ngö ṙô, Kô-en nö sā ngam lōn chu, ngatī taneungtökūö min angū-ö; sā ök chööḵnyö chu inrē, ngatī min angū-ö nö sökhak:
25Likölngö öp aṅ Asīriā chin min ip panam chu i kui minë rôngö inrē öich rööntö kui ò: ngaich min ap kaneun ò nö kiröönngöre nö ṙā-ang in ò, ap lumngan ò min inrē nö kē-ĕngre nö ṙā-ang el ranôṙö ò.
26Angū-ö ön ngih chööḵnyi nö ing tumlat nö keuheūtngöre chūök: angū-ö ön ngih kël töhateutnyu nö i kui në pumnāmö tarik nö ṙòkhöre.
27Pò ngam Mā Tēv yip tömaṙôngö nö lōn tö e, achīö ap min tökô nö tahngen e? Ngam kël ò inrē nö hateutnyu, achiāp min tökô nö havöökūö e?
Piyāyi Min Filistāin Tö Ngam Tēv
28Ik samyeūheu ök rācha Ahas nö kapah ngih ṙô ngam Tēv.
29Ō Filistain, ṙòkhöre yī-ö, ui ṙāmölōn, tö ngam tinkung nö laköl nöng fanòh yīö: tön löknyö ip ṙĕh öp pēch min nö meutnyi öp pēch töhĕng rök kūö, ngaich ap kūön ò min nö tötameūyukūö kumteū nö pēch.
30Nyā öp min lanòh kūön yāich, ṙōlngöre min öp töhaṅten nö öt pinlānguṙen: ngaich chū-ö min fëlngen öp kūön meh aṅtī tö inyāichö, fëliyö min inrē yip chööḵṙen meh.
31Ō inkūp, ayôṙa man; hū-a man Ō elpanam; ngaich man höng changāchiṙen, Ō Filistain ṙòkhöre nup in meh; pòn löktö lā kapā öp lul nö yih ngaich öt hĕng tak tö payāyi nö ip mitöökö ò ip hē ṙētak.
32Asuh ap min töhĕng sanap ṙô yip ma-ahangkö pumnāmö tarik? Ngam Mā Tēv an vamītö chūök Siyôn ngaich in e min nö hanyathötre yip töhakihtuṙen tarik ò.
Currently Selected:
Isayā 14: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
