Isayā 13
13
Chöken Min Pēpilön Tö Ngam Tēv
1Ngam lumngan Pĕpilön, tömeūkö tö Isayā ök kikōnyö kūön (Amôs).
2Asöklö minkahngö yin i kui ngam töngasngö rôngö, hachônglö ṙôre in cha, kuvāi kël re, hòṅ cha nö kuhēthötre nö el inkūp yip mā.
3Ngaich chin tölṙô ngam ahetlö chu, hôṅ, ngaich chin havëkö yip tökalēḵ tarikre kūö ngam lanīnö chu, cha-a yip töhapōilöngö nö i minā-aṅ chu.
4Sā ṙô yip tö kiröng tarik ap ṙënṙô yip tömaṙôngö nö i kui minë rôngö. Ṙënṙô tökalūöchöre nup pūlngö yip pumnāmö tarik tömūlhaka! Hamūl yip kumyung an ngam Mā Tēv yip tömṙôngö nö im kinyūngö.
5Yih yip nö ṙeūngö tömarôvat panam löktökūö manā-angkūö ngam halīöngö, anga-aṅ ngam Mā Tēv, nup aṅtī ngam tökiröng lanīnö ò inrē, nö tīṙōlngö ngam panam nö keuheūtngöre.
6Ayôṙa yin; tön röhta an ngam sakāmö ngam Mā Tēv; nö sā inlëlngö yanihih min nö ṙā-ang im Tökeuheūttöre Chöngö.
7Lökten min ṙòkhöre nup kël nö öt kalē-en, paṙöiyi ellōn tarik min nö ṙòkhöre inrē:
8Vööngö cha-a min; tarulköti chanökö haṙivlōn inrē cha-a min; chök yip min sā kikānö mahalöinyöre nö hòṅ kayôḵ: kö uṙëh yip min nö in höö sā tameūyö min nup arëkūö cha.
9Yĕh meuk, yih an ngam sakāmö ngam Mā Tēv, tötlē-ĕ, holtö tanānyö ingëṅṙö inrē; nö vīngen ngam panam nö öt aṅhavkūö, nö fëlngö tököölö fālen inrē nö in e.
10Pò minë taneūsömat ngam halīöngö minë tömūl taneūsömat inrē in e nö öt kētö yanāngö mat re min: sangūli min ngam tavūöi im röön ò nö kiröönngöre, hö-ö min ngam chingëṅt inrē nö kētöp yanāngö re.
11Ngaich chū-ö min sācha tī töm panam tökūö tökööl cha, yip tötlöök inrē tökūö kanöölö fālen cha; ngaich chū-ö min, vīten ngam nganë-eṅkūö mahakeūlenre nö rö-ö, ane inrē tumṙeūtö kanësen ngam töpahë-evö.
12Vīten tarik chin min nö iyāich sā tö pahīöya humlum, ngam tarik nö sā inyāichö töhet humlum aṅ Ôfir.
13Lökten chin min vīten minë halīöngö nö kayīna kiyinka inrē min ngam tumlat nö ip chūök re, i lanīnö ngam Mā Tēv yip tömaṙôngö, ip sakāmö inngëṅṙô tanānyö ò.
14Ngaich ngö inlahen angū-ö min, nö sā töt hamūlö tö tarik, cha-a min nö kö kö havööngökūö tarik nö in yip tarik ò, kö falngöre inrē min tarik nö i panam re.
15Kö kuringnyu min yip tö kē-ĕ tökūö sanët.
16Yip tënö kūön cha min inrē nö pinyënyö i kūö cha; kē-ĕ aṅ min nup patī cha inrē, ötlēkaṙen inrē yip pīhö cha.
17Yĕh meuk, haruhlö alaha yip aṅ Mīt chin nö lā-al cha, yip tötkūöngenre min tö rupīö, i humlum inrē, hö-ö cha-a nö ööire tö e.
18Ngaich nup linreny cha min nö panyënyö kūö tö yip ṙāl tarik; hö-ö cha-a min inrē nö aṙē-ĕlōn nö i aṅ el chūök kanūönö; öt ṙā-al nyīö min nup mat cha.
19Ngaich Pĕpilön ngam ineū-euṅ në pūlngö, tövai nö tö-eū-eu aṅ Kaltī min nö sā hē tinṙōlngö Sôtòm Kômòra inrē tö ngam Tēv.
20Öt hētu min angū-ö ngaich nö aṅhaṅvkūö, ötrēhĕn min angū-ö nö iyöngka ël i tumköl chap tarik: öt rēhĕn min yip aṅ Arēpia nö vītö rūkui re nö umuh; öt rēhĕn min yip yōm sīṅp nö tölṙô nup sīṅp re nö hulalngöre nö umuh.
21Umuh pöri min nö ṙōlhaka nup tötainy aṅ el inchōn el ngam tönyalnyi; tööḵlö min nup el patī cha inrē tö nup töhaṙivlōn ṙô chehechōn; iyöng umuh inrē min ôsrich, kiṙīöm inrē min nup satīör nö umuh.
22El nup chūök kumyung cha min inrē nup am aṅ el inchōn nö av, el nup patī rācha tö vai inrē nup chakāl: röhta yanihih öp ṙētak ò, ngaich nup sakāmö ò min nö öt marô-òten.
Currently Selected:
Isayā 13: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
