Isayā 11
11
Ngam Pūlngö Lanāmö
1Ngaich yih min nö umuh öp lamöknyö kaha Yēsī nö meuinynyi, ngaich ṙôngu min öp pak lamöknyö ip ṙĕh:
2Ngaich ngam ma-alaha aṅ im Mā Tēv min nö teungtöre nö i kui ò, ngam ma-alaha mikah mikah elmat inrē, ma-alaha inkaha pinhe-eṅkūö inrē tö ngam Mā Tēv;
3Angū-ö min ööi ò im pinhe-eṅkūö tö ngam Mā Tēv: hö-ö min anga-aṅ nö akah fālen nö sā matre, öt rēhĕn nö vë-a nö sā elnang re nö hang:
4Holtö lanöökö pöri min ang-aṅ nö akah fālen yāich, ṙōngö tī inrē anga-aṅ nö vëkö töyāichö ellōn ing panam: chökṙen ngih panam min anga-aṅ nö aṅtī tö öp tinkung elvāng ò, fëlngö tötlöök inrē nö aṅtī tö unhômö nup minuh ò.
5I ṙat ò min ap lanöökö nö nyanëk ṙat, ngam kanô-en inrē nö nyanëk el ulāvö ò.
6Ngaich min öp am aṅ el inchōn nö iyöng nö holtöṙah kūön sīṅp, ṙōlhak inrē min lepöt nö holtöṙah tökūöṅnö sīṅp; holre inrē kūön nuā tö kūön lāyöng inrē tö töha-òknyu alaha, hachō-o min anū-ö tö tökūöṅnö nyīö.
7Holkūöre min kan nuā tö öp për nö nyā-aṅvkūö; ngaich nup kūön u min nö holtöṙahre nö ṙōlhaka: nyā kiyôp min ngam lāyön nö sā kūö kōiny nuā.
8Öp nyīö min inrē töṙòngmö pamôḵ nö nyamtô nö i kui kilmīṙö pēch, öp nyīö min inrē töṙā-ai kūö nö pōḵ nö sëphöt tīre nö el kilmīṙö pēch.
9Hö-ö cha-a min nö chök öt rēhĕn nö kapah nö i kui minë töhet rôngö chu: pò ngam panam min nö tööḵlö tö inkaha aṅ im Mā Tēv, sā minë mak nö hatööḵlö ngam mai.
Havan Min Yip Töhakövö (Tökēḵ-ě)
10Ngaich ngö inlahen angū-ö min ip sakāmö angū-ö, tö öp ṙĕh Yēsī, öp tö sökhaka nö minkahngö yip tarik, chöhö ò min vē pumnāmö tarik; ngaich öp chūök ò min nö ineū-euvö.
11Ngaich ngö inlahen min ip sakāmö angū-ö, tö ngam Mā min nö havan tö tīre nö hēk im innët heuh nö havan yip chööḵṙen yip tarik ò, yip tö-ōtren min, ṙā-ang Asīriā, Aikup, Patrôs, Kus, Ēlam, Aīnār, Hamat, ṙā-ang i nup kun panam ngam mai inrē.
12Ngaich anga-aṅ min nö asöklö minkahngö nö i pumnāmö tarik, hamūl yip tökavāli inrē aṅ Israĕl, hamūlö inrē yip tö parāti aṅ Yūtā löktökūö në töfën sinkeukngö ngih panam.
13Kē-ĕngre min inrē öp kumnyah elmat Ifrēm, cha-a min inrē yip mahakihten Yūtā nö rökiṙen: öt kunyaha elmat öp min Ifrēm tö Yūtā, öt hakihten Ifrēm inrē Yūtā.
14Ngaich cha-a min nö kiteūtöre nö el ranôṙö Filistain nö lā sūng; holre cha-a min nö hayëḵngen yip kūön aṅ lā chuhöt: kētö tīre cha-a min nö in Etöm Mô-ap inrē; ngaich yip kūön Amön min nö hang chöngö cha.
15Ngaich ngam Mā Tēv min nö hatngö tī tö ngam litāk ngam mai Aikup; ngaich anga-aṅ min nö aṅtī tö ngam tönyô kuföt nö aṅtī tö këlre nö harutkö ngam Tahël, ngaich fohngen e min nö sātö talöökö nö kun töhëm mak, ngaich vīten tarik nö lök in e nö nyôṙö röön nö kiröönngöre.
16Ngaich talöökö yip chööḵṙen tarik min öp umuh tökiröng, öp tö ōtre min, nö ṙā-ang Asīriā; sā re misī nö in Israĕl hē ò nö kunyī-inyre nö ṙā-ang panam Aikup.
Currently Selected:
Isayā 11: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
