1 KINṘÖTNGÖ 22
22
1Ngaich ngö ṙô Tāvit, Ihih öp min patī ngam Mā Tēv ihih inrē öp tahāklö töföngö tökētu tö Israĕl.
Halēnkö Minānlö Ngam Töhet Chūök
2Ngaich Tāvit nö tölṙô inmūlö yik aṅ tahëng yik mī-iyöng im panam Israĕl, ṙātö ṙamat ihong anga-aṅ inrē nö halēn nuk ihong minānlö ök patī ngam Tēv. 3Meukten tökiröng in chūökngö vët inrē ang Tāvit nö kīny nuk inkūp kūö talöökö tinkīök u inrē, tö nuk mās inrē nö pōyen öt kanṙeūken lumngan; 4Sītör savach öt kanṙeūken; pò yik aṅ Sitōn aṅ Tūrös inrē nö pōyen kum tö sītör nö in Tāvit. 5Pò Tāvit nö ngö ṙô, Ayal öp kūön chu kikōnyö Sòlòmön öt akaha inrē, ngaich öp patī ngam Mā Tēv tö mānlöngö nö hòṅ tölngö tövai, töhòṅ ineū-euvö kanôlòvö inrē nö keuheūtngöre chūök i në panam; lökten chin hòṅ halēnken e. Lökten Tāvit nö meukten nuk chehen e nö pōyen urēhĕkūö ò nö kapah.
6Havëtök kikōnyö ngaich anga-aṅ kūönre ang Sòlòmön ngaich kētö chöngö ò nö mānlö öp patī ngam Mā Tēv, ngam Tēv Israĕl. 7Ngö ṙô Tāvit tö Sòlòmön, Kakūönö, ellōnu chin tö minānlö öp patī i minë-eny ngam Mā Tēv ngam Tēv chu. 8Ngaich pöri ngam ṙô ngam Mā Tēv nö yih nö in chu, nö ngö ṙô, Pōihönyi man kitaknyö mahām kiyung inrē i tö kiröng kinyūngö; uh man mānlö öp patī i minë-eny chu, tön pōihönyṙen tī man kitaknyö mahām i kūö chu i kui ngih tumlat. 9Yĕh meuk kayônyu öp min kikōnyö kūön meh; tarik lanāmö öp min anga-aṅ. Kē-ĕkūö ò chin min tö lanāmö ṙeū-eung in yip mahavīlen ò tö kunyaha elmat tö ò; pò öp minënyö ò min nö kētö lanāmö chanëven inrē in Israĕl i nup sakāmö ò. 10Anga-aṅ öp min mamānlö öp patī nö i minë-eny chu. Kūön chu ap min, yöng ò chū-ö min inrē, haköpngö öp kantēra ò chin min nö rācha nö i Israĕl nö örheūheu. 11Yĕh pöchö, kakūönnö, in meh an yēḵ ngam Mā Tēv, hòṅ meh teunglen mānlö patī ngam Mā Tēv ngam Tēv meh, sā ṙô ò nö in meh. 12Ane pöri kē-ĕ kūö meh an yēḵ ngam Mā Tēv töhuneū-en mikah el mat inrē, hòṅ e hē ò nö kētö chöngö meh i kui Israĕl öm köp tī tö ngam chöngö ngam Mā Tēv meh. 13Ngaich më-eṅ min kôlò yē meh kūötenre haköp në inchöngten. Chöngö inrē tinöölô Môsös nö in yik Israĕl tö ngam Mā Tēv, Ngëḵ man yĕh, öt pinhë-eṅvkūö inrē. Um pa-ekūö, um ngangngö kūö inrē. 14Holtö yöng chanököre chin öich meukten chehen ngam patī ngam Mā Tēv hēngòng köṅny tālen humlum, hĕng milīön tālen rupīö, mās vët inrē öt kanṙeūken lumngan pò u nö pōyen anū-ö; savach ihong inrē maheukten chu. Ṙūten kūö u më-eṅ. 15Pōyen tarik man tötöla-evṙen: ṙamat ihong, mistīrī ihong mistīrī inrē, tökeuheūttör mihëṅṙö huneū-eu tarik inrē öt kanṙeūken, tö huveū-en i vinī-i. 16Humlum rupīö mās vët inrē: choholre man ngaich la-evṙen! In meh an yēḵ ngam Mā Tēv!
17Tölṙô yik yöngṙen i Israĕl ang Tāvit nö holṙen ök kūön ò Sòlòmön, nö ngö ṙô, 18Öt in yīö ang ngam Mā Tēv yīö? Röh ang nö kētö lanāmö nö in yīö nö keuheūtngöre lā-a? Pò ò nö ngaich nö kētö yip tarik aṅ ngam panam nö eltī chu; ngaich ngam panam inrē nö tumṙeūtu i kūö ngam Mā Tēv vē tarik ò inrē. 19Yĕh ngaich yin kētö kui lōnre ellōnre inrē chöh ngam Mā Tēv ngam Tēv yīö. Choholre mānlö ngam töhet chūök ngam Mā Tēv, hòṅ öp kasòng kinlēḵngô ngam Mā Tēv tö nup töhet inrē chūökṙen ngam Tēv nö kēhĕtvö nö el ap patī tö mānlöng i minë-eny ngam Mā Tēv.
Currently Selected:
1 KINṘÖTNGÖ 22: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
