1 KINṘÖTNGÖ 21
21
Kinṙeukö Ṙòken Tö Tāvit
(2 Sam 24.1-25)
1Ngaich söklöre Sātan nö lā-al Israĕl, hachōhöt ellōn Tāvit inrē nö kaheuk yik aṅ Israĕl. 2Ngö ṙô ngaich Tāvit tö Yô-ap tö yik yöngṙen kumyung inrē, Kuṙòh kaheuk yip aṅ Israĕl, löktö kūö Pirsīpā söl Tën, ngaich eūkö el nang chu, hòṅ chu akahalōn tö ṙôken cha. 3Ngö ṙô pöri Yô-ap, Ṙūötö ṙôken vē tarikre an yēḵ ngam Mā Tēv nö hēngòng tumvan ṙôken nö sāre töngamuh! Röh acha, mā chu rācha, nö ṙòkhöre cha-a nö tarik ngam Mā chu? Kūö yòh pankeh ngam mā chu nö hōtö töngatī? Kūö yòh ang min nö kētö fālen nö i kui Israĕl? 4Öt anhôṅngen pöri ngam ṙô ngam rācha tö Yô-ap. Lökten Yô-ap nö kiröönngöre nö keuheūt chuhure nö i Israĕl, ngaich yih nö havan nö i Yērusalem. 5Ngaich kētö ṙôken yip tökaheūkö tarik ang Yô-ap nö in Tāvit. Israĕl nö ṙòkhöre hĕng milīön hēngòng köṅny tarik hamôknyö sanët. I Yūtā inrē fënòng sat anāi köṅny hamôknyö sanët. 6Hö-ö pöri anga-aṅ nö hamūlhöt Lēvi Penyamin inrē nö im kinṙeūkö pò ngam chöngö ök rācha nö sahō-o Yô-ap.
7Kunyāhalōn pöri ngam Tēv tö e, ngaich anga-aṅ nö hachökö Israĕl. 8Ngaich ngö ṙô Tāvit tö ngam Tēv, Pōihangṙen chin köölö fālen in e tö chu ngaich la-evṙen tö e. Vë-ekūö meh pöri chū-ö töngamuh, öm kēngö ngam öt lanöökö ngòh tarik meh; tön ngaich chin kulō-ovṙen. 9Ngaich ngam Mā Tēv nö vë-ekūö Kāt, ök in Tāvit mameuk, nö ngö ṙô, 10Kuṙòh ngö ṙô tö Tāvit, Ngö ṙô an ngam Mā Tēv,Lūöi nup kahëtö chu min in meh; hēngö atöllö më-eṅ in u, hòṅ chu tī-iv tö e in meh; 11Lökten Kāt nö yih nö in Tāvit ngaich ngö ṙô tö ò, Ngö ṙô an ngam Mā Tēv, Kē öp lōnre man: 12Kömayē-ĕ lūöi samyeūheu inyāichö; hēk inrē lūöi chumngëṅtö öm halëli tö yip lā-alre, I saha ngam sanët yip lā-al meh nö kô-òl nö in meh; hēk inrē lūöi sumkam öp sanët ngam Mā Tēv, invah tölëlngö kūö impanam, öp ma-ahānga ngam Mā Tēv nö keuheūt në panam Israĕl nö fëlhanga. Atöllö lōnre man ngaich töp ṙô chu sap ṙô ò ngam tamīnten chu. 13Ngaich ngö ṙô Tāvit tö Kāt, kiröngö kanihngen chin; hökngen chu fuk eltī ngam Mā Tēv, tön kiröng ap miṙēlōn ò; uh pöri chū-ö hökiṙen fuk eltī tarik.
14Lökten ngam Mā Tēv nö tīntö tölëlngö kūö invah nö i kui Israĕl; ngaich sat anāi köṅny yik tarik Israĕl töfukngö. 15Ngaich ngam Tēv nö tīntö ök ma-aṅhānga nö i Yērusalem nö halëlngö e; hē ò pöri nö rultöre nö halëlngö e, meuk ngaich ngam Mā Tēv, ngaich ṙā-al lōnre tök tötlöök; ngö ṙô ngaich anga-aṅ tök ma-ahānga ök mahalëlhanga; Ngāichö tölngö an: ṙā-ang tīre man ngaich, Ngaich ök ma-ahānga aṅ im Mā Tēv nö sökhaka nö ranghö ök chūök pinṙōngö sāiny Ōrnan ök aṅ Yapus. 16Chingòhlö matre ngaich Tāvit ngaich meuk ök ma-ahānga ngam Mā Tēv nö sökhaka ihôi ngam tumlat töm halīöngö, hanyākhaka ök sanët nö eltī ò nö i kui Yērusalem. Ngaich Tāvit tö yik mā inrē, nö hayūtöre tö sāk, ngaich fātngö kūöre nö afukngöre. 17Ngaich ngö ṙô Tāvit tö ngam Tēv, Röh öich öt chū-ö kamëtö chöngö kinṙeūkö tarik? Chū-ö chin tököölö fālen tö tī-iv inrē tö tökiröng öt lanöökö. Asuh ap tī vē, vē töng sīṅp? Ō Mā Tēv, vë-ekūö meh chin, in chu tī man yĕh tö ngam këlre i patī öp yöng chu inrē; uh pöri ngam tö lëlngö kūö invah nö i kui vē tarik meh.
18Ngaich ök ma-ahānga aṅ im Mā Tēv nö tölṙô Kāt nö ngö ṙô tö Tāvit nö hōten Tāvit nö kiröönngöre nö vīlö tahāklö ngam Mā Tēv nö el ök chūök pinṙōngö sāiny Ōrnan ök aṅ Yapus. 19Lökten Tāvit i ṙô Kāt nö kiröönngöre, ök ṙô ò nö i minë-eny ngam Mā Tēv. 20Ṙòng höichṙen ang Ōrnan nö piṙōng vīt; havöölö kūöre anga-aṅ ngaich meuk ök ma-ahānga, ngaich yik tö fëntak kikōnyö kūön ò yik mī-in ò nö hayunngöre. 21Hē Tāvit nö yih nö in Ōrnan, ngëicha ngaich Ōrnan ngaich meūkö Tāvit ngaich kunyī-inyre nö ṙeū-eung ël ök chūök pinṙōngö sāiny, salāmö Tāvit ngaich anga-aṅ nö fātngökūöre nö el tumlat. 22Ngaich ngöṙô Tāvit tö Ōrnan, Kētö ngam chūök pinṙōngö sāiny in chu hòṅ chu in e tī vīlö tahāklö ngam Mā Tēv, kētö e in chu nö i ṙôköṙāire hòṅ ngam tölëlngö kūö invah nö lāröön nö in vē tarik. 23Ngaich ngö ṙô Ōrnan tö Tāvit, Kē-ĕ e man; hökngen ngam mā chu, ngam rācha nö kahang lōnre löp tölöök in ò; yĕh meuk, kētö në kōiny chin inrē nuā nö töföngö tö ngam mūngöre minë chōn ngam pinṙōng sāiny, tö minë vīt inrē nö ṙòng tökētu. Kētö u chin nö ṙòkhöre. 24Ngö ṙô pöri ök rācha Tāvit tö Ōrnan, Hö-ö, hòṅ havaha e chin nö asöö-ö ṙāi, hö-ö chin hòṅ kē inlāhen meh nö kētu nö im Mā Tēv, öt ötrēhĕn hòṅ kētö töföngö tö kētu nup töt ṙāiyu tö tī chu. 25Lökten Tāvit nö kē-ĕ kūö Ōrnan töhumlum tafūölòng siköl lumngan nö ṙāi ngam chūök. 26In e tī ang Tāvit nö vīlö tahāklö ngam Mā Tēv ngaich kētö töföngö tökētu, inlāmö inrē tökētu, ngaich havëkö ngam Mā Tēv, ngaich sap ṙô ò anga-aṅ nö aṅtī tötameūyö nö ṙā-ang el halīöngö nö el ök tahāklö töföngö tökētu. 27Ngaich ngam Mā Tēv nö tölṙô ök ma-ahānga; ngaich anga-aṅ nö hayulhöt ök sanët nö el inyulre.
28Hē e hē Tāvit nö meuk ngam Mā Tēv nö sap ṙô ò nö el ök chūök pinṙōngö sāiny Ōrnan ök aṅ Yapus, in e ngaich anga-aṅ nö kētö tö kētu. 29Pò ök inrukui ngam Mā Tēv, ök vahī Môsös nö el tönyalnyi, ök tahāklö töföngö tö kētu inrē hē e nö ik lātulöng chūökö i Kipīön; 30Öt kô pöri Tāvit nö chuh in e nö hatöntöre nö im Tēv pò ò nö pa-ekūö tök sanët ök ma-ahanga ngam Mā Tēv.
Currently Selected:
1 KINṘÖTNGÖ 21: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
