1 KINṘÖTNGÖ 17
17
Ṙô Nātan Nö In Tāvit
(2 Sam 7.1-17)
1Iyöng el patī re ngaich Tāvit, ngö ṙô ngaich Tāvit, tö Nātan ök pròfĕt, Yĕh meuk, iyöng el patī chin chū-ö töchōntö sītör, ngaich pöri ngam kasòng kinlēḵngô ngam Mā Tēv nöng el katòh rūkui. 2Ngö ṙô ngaich Nātan tö Tāvit, Kē-ĕkūöre man töp ellōn meh, tön in meh an ngam Tēv.
3Im hatööm pöri angū-ö nö yih ngam ṙô ngam Mā Tēv nö in Nātan. 4Kuṙòh vë-eny nang ap tarik chu Tāvit, Ngö ṙô an ngam Mā Tēv: uh man mānlö patī chu tö chūök chu iyöng. 5Tön rö-ö chin iyöng elpatī hēten tö ök sakāmö chu hachōnyen Israĕl söl ing töngamuh, ngaich pöri chū-ö kiröönngöre löktökūö ngih rūkui söl i ngī-aṅ rūkui löktökūö ngih elyöngö inrē söl i ngī-aṅ elyöngö. 6I nup taṙòkhöre chūökö chūök chu havötköre in yip Israĕl, hĕng höiny milôhò öichu tö ṙô in yip kamhôka i Israĕl, yip tö tölöṙô tö chu nö hayōm vē tarik chu, öich ngö ṙô, Kūöyòh öyih öt mānlö patī chu tö töt chōntö sītör? 7Lökten man töngamuh ngö ṙô töp tarik chu Tāvit, Ngö ṙô an ngam Mā Tēv yip tö maṙôngö, Kē-ĕ meh chin ṙā-ang ip kiyôp, ṙā-ang i tinömkörit sīṅp inrē, pò meh hōtu rāchakūö vē tarik chu Israĕl: 8In meh chin inrē ip töng kū-ö meh kiröönngöre, ngaich inrē öich rökngen yik lā-al meh nö ṙòkhöre nö ṙā-ang i kūö meh; vīlö minë-eny meh chū-ö min inrē, sā minë-eny yip tökiröng ing tumlat. 9Ngaich chū-ö min halēnngö öp chūök vē tarik chu Israĕl, teūichten cha chin min inrē, hòṅ cha nö iyöng ip kanahngenre chūökö, nö öt hēk nö piyôka; yip töchökhuṙen tarik min inrē öt hēk nö halëlngen cha, sā ök lā urĕh, 10Löktökūö ök hē chu vīlö kamhôṅka i kui vē tarik chu Israĕl; tumṙeūtö yip lā-al meh chin min. Hēk inrē öich vë-eny nang meh tö ngam Mā Tēv nö mānlö patī meh min. 11Hē nup sakāmö meh min nö timtöre kūö öm chuh in yip yöng re, ngaich chū-ö min hachohlö öp kūön meh unôichrit meh, hĕng tak aṅ in yip kikōnyö kūön meh, haköpi ap min tö chu pūlngö ò, 12Anga-aṅ ap min mamānlö patī chu, ngaich chū-ö min haköpngö öp kantēra ò nöng örheūheu. 13Yöng ò Chin min, ngaich anga-aṅ min inrē nö kūön chu; hö-ö chin min kēngö öp tököp hanāngenlōn nö ṙā-ang in ò, sā tī chu kēngö e ṙā-ang in ò ök mu-urēhĕkūö meh, 14Haköpngen ò pöri chū-ö min el ngih patī chu im pūlngö chu inrē höng örheūheu köp min inrē öp kantēra ò nöng örheūheu. 15Sā minë ṙô nö ṙòkhöre, sā minë tömeūkö inrē nö ṙòkhöre, ṙô Nātan nö vë-ekūö Tāvit.
Ha-öīny Ngam Tēv Ang Tāvit
(2 Sam 7.18-29)
16Kuhēthötre ngaich Tāvit ūichngöre ngaich nö i kūö ngam Mā Tēv, ngaich ngö ṙô, Ō Mā Tēv, achīö öich chū-ö asuh öng inrē ngam patī chu, tö meh ngaich ngih rô-òlkūö tī kēten chu? 17Tökūöṅnö öng ngih nö i kūö meh, Ō Tēv; ngaich më-eṅ inrē ṙô-òv inrē tö ngam patī ngòh tarik meh öm marô-òtö ṙô, ngaich hameukhö mat chu tö mu-unôich tumkölchap, Ō Mā Tēv! 18Sitih huneū-euṙô öng Tāvit nö in meh nö kô-òren tökūö inpōilö ngam tarik meh? Pò meh akahalōn tö ngòh tarik meh. 19Ō Mā Tēv, kūö ngòh tarik re man, ane inrē sā öp lōn meh öm tī-iv tö në tökiröng, i minkahtölōn tö në tökiröng.
20Ō Mā Tēv, öt asā-av man, öt Tēvu inrē nö hol meh, sā nup ahang në el nang ih. 21Öp yòh ap pumnāmö tarik ing tumlat tö sā vē tarik meh Israĕl, vē havah ngam Tēv nö tarik ò, vīlö ngam minë-enyre më-eṅ nö kiröng nö pinhë-eṅkūö inrē, i tī meh ahōngö yik pumnāmö tarik nö i kūö vē tarik meh vē ṙahānyö meh nö ṙā-ang Aikup? 22Ngaich më-eṅ vīlö vē tarik meh Israĕl nö örheūheu nö tarik meh; Ō Mā Tēv, ngaich më-eṅ inrē vītöre Tēv cha.
23Ō Mā Tēv, yĕh ngaich man, hökngen ngam ṙô meh i ngòh tarik meh i inlahen inköpngö ngam patī ò nö örheūheu, ngaich më-eṅ sā ṙô meh ngaich öm ngatī tī; 24Ngaich min ngam minë-eny meh nö köp hapōilöng inrē nöng örheūheu, nö ngö, Ngam Mā Tēv yip tömaṙôngö ngam Tēv Israĕl, anga-aṅ an Tēv Israĕl, Ngaich ngam patī ngam tarik meh Tāvit min nö köp nö i kūö meh. 25Pò meh, öm Tēv chu, öm hameukhö mat ngòh tarik meh tö meh min mānlö patī ò; lökten ön ngòh tarik meh nö kôtökūö tö kumlēḵre nö havë-a nö i kūö meh.
26Ō Mā Tēv, më-eṅ man Tēv, tö ngaich öm kilēḵngôre tö ngih tölöök öm in ngòh tarik meh; 27Lökten man yĕh töngamuh kuchīkölōn hakôlò ngam patī ngòh tarik, hòṅ e nö iṙūöhen nö örheūheu nö i kūö meh; Ō Mā Tēv, pò öp töhakôlöng ṙô tö meh nö örheūheu nö tökôlò.
Currently Selected:
1 KINṘÖTNGÖ 17: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
