1 KINṘÖTNGÖ 18
18
Mihôiṅ Yik Tarik Tāvit
1Unôich ngaich tö ngih ang Tāvit nö mihôiṅ tö yik aṅ Filistain ngaich hayöngö cha, kē-ĕ Kāt anga-aṅ tö nuk tuhēt e inrē nö ṙā-ang eltī yik aṅ Filistain.
2Mihôiṅ inrē anga-aṅ tö Mô-ap ngaich yik aṅ Mô-ap nö tarik Tāvit ngaich kētö masūl.
3Mihôiṅ inrē Tāvit tö Hatatēsör ök rācha aṅ Sōpah, lā Hamat, ik sā ò nö kiröönngöre nö asöklö ök minkahngö ò nö ik tahël Yūfrātīs. 4Hĕng köṅny nuk inröl kahë Tāvit nö ṙā-ang in ò, sat köṅny tarik aṅ uk kōra, nët anāi köṅny inrē kumröön kunyung; ngaich Tāvit nö rökngö inröt rôngö kalröön nuk kōra, hēngòng pöri nuk töṙātu i töhēngòng inröl. 5Ngaich hē yik aṅ Siriā i Tamaskös nö yih nö holṙen Hatatēsör ök rācha aṅ Sōpāh, ngaich Tāvit nö fël yik tönët anāi nët köṅny tarik aṅ Sīriā. 6Ṙātö amahati ngaich Tāvit nö i Sīriā i Tamaskös; ngaich yik aṅ Sīriā nö tarik Tāvit, ngaich kētö masūl. Ngaich ngam Mā Tēv nö kētö minhôiṅyö Tāvit ip töng kū-ö ò nö kiröönngöre. 7Kē nuk humlum lanaklö inrē Tāvit nuk kahëkö yik tarik Hatatēsör, kētu ngaich nö i Yērusalem. 8Ṙeū-eung Tiphat, Kun inrē, nuk elpanam Hatatĕsör, ang Tāvit nö pōyen kahë tö mās; anū-ö nuk vahī Sòlòmön mās mai machööḵlö, mās chūökṙen inrē. 9Hē Tō-u ök rācha aṅ Hamat nö hāngö Tāvit nö keuheutngöre vah tī nö mihôiṅ tö yik kumyung in Hatatēsör, ök rācha aṅ Sōpāh, 10Tinngö ök kūönre anga-aṅ kikōnyö ang Hatōram nö ik rācha Tāvit nö salāman, ha-öinyan inrē pò ò nö kiyung nö lā-al Hatatēsör ngaich mihôiṅ tö ò; pòn töṙōl heuh Hatatēsör nö kiyung nö lā-al Tō-u. Ngaich anga-aṅ inrē nö söömtö töṙōlkangen chehen, humlum, rupīö, mās inrē; 11Anū-ö inrē kahëtö Tāvit nö im Mā Tēv, holre tö nuk rupīö, humlum inrē nuk kahë ò nö in yik pumnāmö tarik; i Ētöm, Mô-ap, Amön, Filistain, Amelek inrē.
12Apīsāi, ök kikōnyö kūön Serūyā, nö hëvhör sīön köṅny fahël tö yik aṅ Ētöm el Achāṙö Sāl. 13Ṙātö amahati ngaich anga-aṅ nö i Ētöm; ṙòkhöre ngaich yik aṅ Ētöm nö tarik Tāvit. Ngaich ngam Mā Tēv nö kētö minhôiṅyö nö in Tāvit ip töng kū-ö ò nö kiröönngöre.
14Lökten Tāvit nö hayöng nö i kui Israĕl nö ṙòkhöre; ngaich anga-aṅ inrē nö chīpö tī ṙōngö tī inrē nö kahôkken yik tarik re. 15I kui yik kumyung ang Yôap ök kikōnyö kūön Serūyā; Yēhōsafat ök kikōnyö kūön Ahīlöt nö yōm kinṙötö; 16Sātòk inrē ök kikōnyö kūön Ahītöp tö Ahīmelek ök kikōnyö kūön Apiātör cha-a nak kūönṙô; Sēvsa inrē yōm kinūichö; 17Pennaya inrē ök kikōnyö kūön Yēhōyata i kui yik Chērit tö yik Pēlĕt inrē; ngaich yik kikōnyö kūön Tāvit nö yöngkūö yik mā nö i la-en ök rācha.
Currently Selected:
1 KINṘÖTNGÖ 18: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
