1 KINṘÖTNGÖ 16
16
1Ngaich cha-a nö kēhĕt ök kasòng chöngö ngam Tēv, ngaich ṙātö e nö el ök rūkui vahīlö Tāvit nö chūök e; kētö töföngö tökētu cha-a ngaich inlām tökētu inrē nö i kūö ngam Tēv. 2Ngaich hē Tāvit nö keuheūten nö kētö töföngö tökētu tökētu inrē inlāmö, hakôlò yik tarik ngaich anga-aṅ nö i minë-eny ngam Mā Tēv. 3Michööḵ yik Israĕl inrē nö ṙòkhöre, hĕnghöre kikōnyö kikānö inrē, kököhĕng vat tö rôti, hĕng michūöṙö alaha, kēk inrē nup tönyô angkūr.
4Vīlö yik rīkre inrē Lēvī anga-aṅ nö mameukṙen nö i kūö ngam kasòng chöngö ngam Mā Tēv nö mahavë-a, maha-öinytö tī, maha-öiny ngam Mā Tēv inrē, ngam Tēv Israĕl. 5Asaf ök yöngkūö, ṙanët ò yin vē Sakaria, Yē-i-el, Semīramòt, Yēhi-el, Matītiyā, Ēli-āp, Pennayā, Opĕtitöm. Yē-i-el inrē, ramöng hārp līör inrē, Asaf ök pamòng simpôl, 6Pennayā inrē tö Yahasī-el nak kūönṙô tö iṙūöhö ṙô nö föö römpĕt, nö i kūö ök kasòng kinlēḵngô ngam Tēv.
Tinkökö Nöinyö
(Sal 105.1-15; 96.1-13; 106.1,47-48)
7Ngaich ik sakāmö angū-ö ang Tāvit nö rĕhtenre nö vīlö nöinyö tö tikökö nö im Mā Tēv tö Asaf yik hol maneuk ò inrē.
8Ō ha-öny ngam Mā Tēv,
havëkö minë-eny ò,
Mikahtölōn in yip tarik tö
nup vahīṙen ò!
9Tikökhökūö ò, ha-öinyan
tīkökṙôre,
Vënyö nup pinngangkūö
la-en ò!
10Eu-eūre im töhet minënyö;
Hökngen nup ellōn yip chamöh
ngam Mā Tēv nö ṙāmölōn!
11Chöh ngam Mā Tēv tö ngam
kumlēḵ ò
Chöh ngam kūö ò inṙūöhen!
12Köpölōn tö nuk pinngang-
kūö la-en ò nuk tökeuheū-
ten,
Nuk pinngangkūö tī ò, inkaha
fālen ṙô ò,
13Ō kūön Aprahām ök tarik ò,
kikōnyö kūön Yāköp, yik ka-
töllö ò!
14Anga-aṅ an Mā Tēv, Tēv hī;
i në tumlat nup inkahafālen
aṅ in ò.
15Kūötenre an nö örheūheu tö
ngam kinlēḵngô aṅin ò,
ngam ṙô hachöngten ò, I
tököṅnyu tumköl chap,
16Ngam kinlēḵngô vahīten ò
in Aprahām,
ngam töchūöku kinlēḵngô ò
in Isāk,
17Ngam haköpngö ò inchöng-
ten in Yāköp,
Sā töt chanūhuvṙen kinlēḵngô
in Israĕl.
18Tö ngö ṙô, In meh tī chin min
kētö ngam panam Kanā-an,
nö minchööḵö meh nö amin.
19Hē cha nö ṙòngmö kūönen,
nö töt kaheuktu inrē, törahëich-
taṙen nö iyöng in e,
20Ṙeū-eung pumnāmö tarik söl
im tahëng, nöng karööna
röön,
löktökūö im töhĕng pūlngö söl
i tahëng tarik,
21Öthĕng tak halöngten an tö
mahakihten cha;
chöö-önyten cha an nö vëkö
rācha,
22Nö ngö ṙô, Un lūölka më
hacham kui chu,
Un hachökö më pròfĕt chu!
23Ṙòkhöre tumlat, tikökhökūö
ngam Mā Tēv!
Kaheuk sakāmö vënyö ngam
inyööken aṅ in ò.
24Vënyö ngam kanôlò ò in
yip pumnāmö tarik,
minë pinngangkūö la-en ò in
yip tarik!
25Tön kiröng an ngam Mā
Tēv töhòṅ kiröngö nöinyö,
Töhòṅ pahë-evö an inrē nö
tulöng tö nup tēv.
26Pò nup tēv yip tarik nöng
insātēv;
Vamīlö halīöngö pöri ngam
Mā Tēv.
27Ineū-eu, minā-aṅ inrē i kūö
ò;
kumlēḵ, ṙanāmölōn inrē im
chūök ò.
28Ha-öiny ngam Mā Tēv, Ō
mupīhö tarik,
ha-öiny ngam Mā Tēv kanôlò
kumlēḵ inrē!
29Ha-öiny ngam Mā Tēv tö
ineū-eu minë-eny ò;
Kētö tökētu, yihtöre i kūö ò!
Salām ngam Mā Tēv haṙāköre
im töhet;
30Kichëyöre i kūö ò, ṙòkhöre
tumlat;
hòn, köp öthētu nö halöinyköre.
31Hökngen minë halīöngö nö
ṙāmölōn, ngam tumlat inrē
nö haṙamlōnre,
hökngen u nö ngö ṙô in vē
pumnāmö tarik, Hayöng an
ngam Mā Tēv!
32Hökngen ngam mai nö ṙënuṙô,
tö nup aṅ e inrē,
hökngen nup elngāṅṙö nö
hapōilôre, tö nup aṅ e inrē!
33Ngaich tikökṙôre min nup
chōn el inchōn nö ṙāmölōn
I kūö ngam Mā Tēv, tön yih an
nö akah fālen ngih tumlat.
34Ō hā-öiny ngam Mā Tēv, pò ò
nö tölöök;
pòn köp ngam hanāngen ò nö
örheūheu!
35Ngö ṙô inrē:
Ṙānyen ih, Ō Tēv inyööken ih,
hamūlö ih hayööken ih
inrē ṙā-ang in yip pumnāmö
tarik, hòṅ ih ha-öiny ngam
töhet minënyö meh,
Ineū-eu yēḵ inrē im nöinyö
meh.
36Tökôlò an yēḵ ngam Mā Tēv,
ngam Tēv Israĕl, nö töng öt
chanūhevṙen!
Ngö ṙô ngaich yik tarik Āmen! Ha-öiny ngam Mā Tēv yēḵ
Vë-ekūötēv Nö I Yeruselem, Kipīön Inrē
37Ṙāngen Asaf ngaich Tāvit nö umuh tö yik hol maneuk ò inrē i kūö ök kasòng kinlēḵngô ngam Mā Tēv nö iṙūöhen nö meukṙen nö i kūö ngam kasòng chöngö nö asā la-en töhĕng sakāmö, 38Opĕtitöm inrē tö yik tötafūöl anāi hëvhöre hol maneuk cha; Opĕtitöm pöri, ök kikōnyö kūön Yētūtun, Hōsā inrē nö yōmkūö inkūp. 39Ṙā-ayö inrē Sētòk ök kūönṙô yik hol maneuk ò inrē kūönṙô nö i kūö ngam inrūkui ngam Mā Tēv ik latulöng chūökö ök i Kīpīön, 40Nö föng tökētu nö im Mā Tēv el ök tahāklö töföngö tökētu nö örheūheu peuheū harap, sā kinūchngö e nö im chöngö ngam Mā Tēv i inchöngten Israĕl tö ò. 41Hol cha ang Haman Yētūtun, yik hol cha tökatöllöng töpötiṙen nö minënyu nö ha-öiny ngam Mā Tēv, tökūö ngam tököp hanāngenlōn ò nöng öt chanūhuvṙen. 42Inu ang Haman Yētūtun inrē tö römpĕt simpôl inrē nö i ëlö tinkökö tö ranöng töhet tinkökö inrē. Vīlöngö yik kikōnyö kūön Yētūtun nö ik inkūp.
43Ṙòkhöre ngaich yik tarik nö kö kiröönngöre nö i patīre, chuh patī re inrē Tāvit nö hakôlò yik aṅ patī re.
Currently Selected:
1 KINṘÖTNGÖ 16: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
